Read Kpelle Wule-woo-ŋa 115 Bible Online

Wule-woo-ŋa 115 - Kpelle bible

Wule-woo-ŋa 115

¹Yâwɛɛ, laa maa tɛ̂ fé kúmɛni ma, fɛ̂ɛ nɔ́ yá tɔnɔ kpéŋ. M̀ɛni ma, fɛ̂ɛ kú ífolo-laai mɛni ƃó, íwɔlɔ-wɔlɔ wɛli kɛ-maai, da íteniŋ ƃô-laai.

²Ǹɔii ŋuŋ-ŋai da kúmarê kɛ̂i “Káɣâlai kɔɔ,” lé mɛni ma?

³Kúɣâlai káa ɣâla-taa. M̀ɛnii kélee a ŋ̀wɛ̂lii, ǹyaa ƃé a gɛ̀.

⁴Díɣâla-ŋai kpɛtɛɛ̂i a káne-ŋa da gôo-ŋa. Núu-kpune-ŋa ƃé díkpɛ̀tɛ a díyee.

⁵Díla káa dîa kɛ́lɛ dífa lôno. Díŋɛi káa dîa, kɛ́lɛ dífa kwaa kâa.

⁶Díwoli káa díŋuŋ ma, kɛ́lɛ dífa mɛni mɛ̂ni, dísũa káa dîa, kɛ́lɛ dífa sɛŋ kúŋ mɛni.

⁷Díyee káa dîa, kɛ́lɛ dífa sɛŋ kíli kɔ̀lɔŋ, díkɔɔ kɛ́ ƃò dîa, kɛ́lɛ dífa pɔ̂ri siâi. Díkɔŋ lá wolo káa dîa, kɛ́lɛ díwoo fa kûla.

⁸Diai díkpɛ̀tɛi, díkaa nɔ́ yɛ̂ɛ dia, ǹyaŋ bere nɔ́ ƃé gáa la a diai da lâa a diai.

⁹Eezuɛ-ƃela, ka láa maa tɛ̂ tɛɛ Yâwɛɛ pɔ́. A kpɔ̂ŋ kâa, gɛ́ kámaa kɔ̃̂ɔ.

¹⁰Káai a Ɣâla ŋɔsâla láa soŋ-ƃelai, ka láa a Yâwɛɛ. A kpɔŋ kâa, gɛ́ kámaa kɔ̃̂ɔ.

¹¹Káai ka Yâwɛɛ fɛ̀lii, ka láa la. A kpɔ̂ŋ kâa gɛ́ kámaa kɔ̃̂ɔ.

¹²Kúmaa mɛni káa Yâwɛɛ kíli ŋá. A pâi lûwa lâai kûa. A pâi lûwa lâai Eezuɛ-ƃelai da zâla láa soŋ-ƃelai kélee dîa.

¹³Yâwɛɛ a pâi lûwa lâai diai kélee dîa da ƃaa kɛ́-maa tɛ̀ɛ bɔ́i, gbaya-kpaya da bɛlɛ-pɛlɛɛ.

¹⁴Tɔɔ Yâwɛɛ é nîa-pɛlɛɛ tɛɛ kápɔ, é lûwa láa kâa ka dîa-ni.

¹⁵Tɔɔ Yâwɛɛ é lûwa láa kâa. Ǹyaa ƃé ŋ̀elei kpɛ̂tɛ da ǹɔii.

¹⁶Ŋ̀elei káa a Yâwɛɛ ǹyaa tɔ̂nɔ pɔ́ɔ. Kɛ́lɛ è ǹɔii tɛ̂ɛ núu-kpune pɔ́.

¹⁷Zaa-ƃelai dífa Yâwɛɛ láa maa tɛ̀. Diai kélee da saai, da fa pɔ̂ri ǹáa maa tɛ̂i.

¹⁸Kɛ́lɛ kúai ɣele mai, kwa pɔ̂ri sɛɣɛi fêi tɛɛ̂i bɔ́ é síɣe sâa ma é lí tuɛ-pere wɔ́lɔ-wɔlɔ da wɔ́lɔ-wɔlɔ. Ka Yâwɛɛ láa maa tɛ́.