Read Kpelle Wule-woo-ŋa 118 Bible Online

Wule-woo-ŋa 118 - Kpelle bible

Wule-woo-ŋa 118

¹Óo ka sɛɣɛi-fei tɛɛ Yâwɛɛ pɔ́, kpɛ́ni fêi, zɔŋ lɛ̂lɛɛi. Ŋɔwɛli kɛ́-maai káa a wɔ́lɔ-wɔlɔ wɛli kɛ-maa.

²Eezuɛ-ƃela, ka m̀ó kâai, “Ŋɔwɛli kɛ́-maai káa a wɔ́lɔ-wɔlɔ wɛli kɛ-maa.”

³Tɔɔ zâla láa soŋ-ƃelai dí m̀ó dîyɛɛi, “Ŋɔwɛli kɛ́-maa káa a wɔ́lɔ-wɔlɔ wɛli kɛ-maa.”

⁴Tɔɔ diai da yâo Yâwɛɛ mai, dí m̀ó dîyɛɛi, “Ŋɔwɛli kɛ́-maa káa a wɔ́lɔ-wɔlɔ wɛli kɛ-maa.”

⁵Ŋá kɛ̀ mɛni kpɔ̂lu su, ŋá Yâwɛɛ tóli. È ŋ́oo mɛ̀ni, é ŋ́uŋ ma ƃó.

⁶Yâwɛɛ káa ŋ́gɔlɛ, fé pâi yaôi. Núu-kpune fa pɔ̂ri mɛni da kɛ̂i a ńyãa.

⁷Yâwɛɛ káa ŋ́gɔlɛ, gɛ́ kpɔŋ mâa tɛ̀ɛ ḿbɔ. Ŋa pâi ŋ́gbɔara-ƃelai yée mɛi ɣâlei kâai.

⁸Ǹɛ̂lɛɛi núu é gíli tɔ́ɔ Yâwɛɛ ma, é tɛ́ɛ la núu-kpune ma.

⁹Ǹɛ̂lɛɛi núu é gíli tɔ́ɔ Yâwɛɛ ma, é tɛ́ɛ la núu láa túɛ-ƃela dîa.

¹⁰Ŋ́gbɔara-ƃela támaa dí tìnaŋ ḿâ. Kɛ́lɛ ŋá díyee mɛi ɣâle Yâwɛɛ ŋɔwála-walai sârai.

¹¹Dí tìnaŋ ḿâ ńyee kélee mɛi. Kɛ́lɛ ŋá díyee mɛi ɣâle Yâwɛɛ ŋɔwála-wala-laai sârai.

¹²Dí tìnaŋ ḿâ yɛ̂ɛ kɔ̃iŋ-ŋa, kɛ́lɛ Yâwɛɛ ŋɔwála-wala-laai è dí kèreŋ nɔ́ yɛ̂ɛ ŋɔŋ a gbɔrɔ kpala kèreŋ.

¹³Dí pɛ̀lɛ ḿâ a ŋwana-lɔ̂ɔ-pere díkɛ pà ḿbaâi, kɛ́lɛ Yâwɛɛ è kpɔ̀ŋ ḿâ.

¹⁴Yâwɛɛ è ŋ́uŋ ma ƃò, é ŋ́gbonôi kpanaŋ.

¹⁵Ka káwoli tɔ́ɔ Ɣâla ŋɔnûai dílii-nɛ̃ɛ kula-woo-ŋai dîa dípɛrɛ-ŋai mu. Da môi dîyɛɛi, “Yâwɛɛ è gɛ̀ tí a ŋɔwála-wala-laai.

¹⁶Ŋɔwála-wala-laai sârai ƃé kwaa kúkpɔara-ƃelai yée mɛi ɣále la. Yâwɛɛ wála-walai kɔ́ su.”

¹⁷Fé pâi saâi, kɛ́lɛ ŋa pâi lɛɛ̂i ɣele ma m̀ɛni lɛ́lɛɛ-ŋai Yâwɛɛ a gɛ́ ḿîi ŋá maa tuŋ ƃó nûa dîa.

¹⁸A ŋ́gula maa kɛ́ kpɔ́ a ŋ̀ánaa, kɛ́lɛ vé niî fáa ní ma ŋá sáa.

¹⁹Ŋ̀âla-pɛrɛ Kɛ́tɛi ŋɔkpôŋ-ŋai lá ƃó ḿberêi a gɛɛ ŋá lɔ́ naa, ŋá sɛɣɛi-fei tɛɛ Yâwɛɛ pɔ́.

²⁰Yâwɛɛ ŋɔpɛ́rɛi lá kpoŋ ká ŋí. Dɔ̃yâ-ƃelai nɔ́ ƃa tɛ̂ɛ naa dí lɔ́.

²¹Ŋá ílaa maa tɛ̀, kpɛ́ni fêi, ya ŋ́oo mɛni, íkɛ ŋ́uŋ ma ƃò ŋ́gbɔara-ƃelai yêei.

²²Gɔnii nyii bɛ́rɛ tɔɔ-ƃelai dí díŋɛi nàɣiŋ mɛi, a nâa kɛ́ a bɛ́rɛi sonoŋ su-kɔnii gbîŋ-kpiŋ.

²³Yâwɛɛ ƃé m̀ɛnii ŋí kɛ̀. Gáa kúŋɛi a mɛni mĩli-mĩliɛɛ.

²⁴Vóloi ŋí ƃé Yâwɛɛ è kúkpɔara-ƃelai yée mɛi ɣâle la. Kwaa kú m̀aa lii-nɛ̃ɛ kula.

²⁵Kúŋuŋ ma ƃó Yâwɛɛ, kúŋuŋ ma ƃó. Yâwɛɛ, gɛ́ m̀ɛnii kélee kwa kúyee pìli zui, é ƃûu ƃó kúyêei.

²⁶Tɔɔ Ɣâla é lûwa láa ǹúui ma nyii pà Yâwɛɛ láai sui. Kwa lûwa toôi yâ Yâwɛɛ ŋɔpɛ́rɛi mu.

²⁷Yâwɛɛ káa a Ɣâla. Zɔŋ lɛ̂lɛɛi kúmɛni ma. Ka gúui kɔ́ɔ pîlaŋ, ká tóu laa soŋ káyee ŋá ka kɛ̀ sìa, ka kɛ́ lì ŋ̀âla-tebelei ma pere.

²⁸Yá ƃa Ŋáɣâlai, ŋa pâi sɛɣɛi-fei tɛɛ̂i ípɔ. Ŋa pâi kɛ̂i ílaa kɛ́tɛi maa tûŋ toôi, kpɛ́ni fêi, Ŋáɣâlai ƃa yá.

²⁹Óo ka sɛɣɛi-fei tɛɛ Yâwɛɛ pɔ́, kpɛ́ni-fei, zɔŋ lɛ̂lɛɛi. Ŋɔwɛli kɛ́-maai káa a wɔ́lɔ-wɔlɔ wɛli kɛ-maa.