Read Kpelle Wule-woo-ŋa 119 Bible Online

Wule-woo-ŋa 119 - Kpelle bible

Wule-woo-ŋa 119

¹Lûwa káa diai dîa dísɔŋ fé dîa, díkɛ díɣeniɛi kɛ̀ yɛ̂ɛ berei Yâwɛɛ ŋɔtɔ̂ŋ wóo káa lai.

²Lûwa káa diai dîa da sîa a Yâwɛɛ ŋɔtɔ̂ŋ-ŋai wóo, díkɛ ŋɔtɔ̂ŋ-ŋai mɛi kâa a dílii kéleei.

³Lûwa káa diai dîa dífa mɛni nyɔ́mɔɔ da kɛi, kɛ́lɛ da sîa Yâwɛɛ ŋɔtɔ̂ŋ lá-woo mai.

⁴Yâwɛɛ, í tɔ̂ŋ-ŋa tɛ̀ɛ kúpɔ, í mó kûa a gɛɛ kú sía a díwoo a teniŋ ƃô pere.

⁵Gɛ́ kili kɛ-zu kɛ́ ƃò ńyêei a gɛɛ ŋá sía a ítɔ̂ŋ-ŋai a teniŋ ƃô-pere, dímɛi káa pere su.

⁶Ŋà sìa a ítɔ̂ŋ-ŋai wóo, gɛ̀ ní fé pâi ŋumɛ̂i.

⁷Ŋà ítɔ̃yâ mɛni ŋá tée perei maa kɔ̂ri, ŋa pâi ílaa maa tɛ̂i a ńii kélee.

⁸Ŋa pâi ítɔ̂ŋ-ŋai mɛi kâai. Óo Yâwɛɛ, ífe íyee kùla ḿû.

⁹Nyáŋkpa a pɔ̂ri ŋɔɣéniɛi mɛi káa pere kɛ̂i léŋ a m̀aa waa? Ǹyaa nɔ́ ƃa é sía a ítɔ̂ŋ-ŋai wóo.

¹⁰Ŋa íkɔ̂rii a ŋ́gili kélee. Ífe nɛ̀ɛ naa ŋá ítɔ̂ŋ-ŋai kara.

¹¹Ŋà ítɔ̂ŋ láa ŋ́gili ŋá a gɛɛ fé sɔnyɔ̂ŋ kɛ̀ a yá.

¹²Ŋà ílaa maa tɛ́, óo Yâwɛɛ, ítɔ̂ŋ-ŋai lɛ́ ḿâ.

¹³Dɔŋ-ŋai ya dɛ̀ɛ kúpɔi, ŋa pâi m̀ɛni ƃôi nûa dîa.

¹⁴Ítɔ̂ŋ-ŋai maa mɛni lɛ̂lɛɛi a ńîa é tɛ́ɛ la tɔɔ-laa ma.

¹⁵M̀ɛni-ŋai yà mò ḿâi, ŋá gélee maa kɔ̀ri, díkɛ ƃò ŋ́gili ŋá.

¹⁶Dímaa mɛni lɛ̂lɛɛi a ńîa. Fé pâi niâi da ma.

¹⁷Ńzoŋ a ǹɛ́lɛɛ, ńyãai a íyee mu-nuui a gɛɛ ŋ́gɛ ƃò ɣele ma ŋ́gɛ ísɛŋ lɛ́ɛi mɛi kâa.

¹⁸Ŋ́ɛi lá ƃó a gɛɛ ŋá kwaa káa, ŋá dɔ̃yâ mɛni mĩli-mĩliɛɛ-ŋai naa káa ítɔ̂ŋ a ǹɛ̂i.

¹⁹Ŋá kɛ̀ ɣéniɛi su kpuai ǹɔii ŋí ma ƃɛ́. Ífe ítɔ̂ŋ-ŋai lòo ḿâ.

²⁰Ítɔ̂ŋ-ŋai maa mɛ̂ni a ńii sóŋ kpɔ́ a ŋ̀ánaa. Ŋa ŋ̀wɛ̂li ŋá ítɔ̂ŋ-ŋai kɔ́lɔŋ a tãi kélee.

²¹Ya zu-mɛni kɛ̂tɛ-ƃelai kula maa kɛ, diai dífa ítɔ̂ŋ-ŋai mɛi kâai, í dínaɣaŋ láa.

²²Ŋ́uŋ ma ƃó diai yêei ńarânii díkɛ ɣɛ́lɛ maa kûla ŋ́gbonôi, kpɛ́ni fêi, ŋa ítɔ̂ŋ-ŋai mɛi kâa.

²³Ǹûa láa túɛ-ƃelai da kɔ̀yaŋ dí gbã tée ḿberêi, kɛ́lɛ ŋ́gaa nɔ́ ítɔ̂ŋ-ŋai maa kɔ̂rii.

²⁴Ísɛŋ lɛ́ɛ-ŋai da ńii làa, díkɛ ńdeniŋ tɔ̀ɔ.

²⁵Kɔlɔ a kpɛɛ ḿâ, ŋ́gɛ ƃò lâani muluŋ su. Gɛ́ ŋá ḿu-siɣe yɛ̂ɛ berei í íkono tèe lai.

²⁶M̀ɛni kélee ŋa gɛ́i, ŋá gélee ƃò yâ, ǹyaŋ í ŋ́oo su tòo. Ítɔ̂ŋ-ŋai lɛ́ ḿâ.

²⁷Gɛ́ ŋá ítɔ̂ŋ-ŋai ŋá káa. Ŋa pâi ŋ́gili ŋá siâi é pîlaŋ íkɛ mɛni kpaya-kpayaai dîa.

²⁸Ńii a toôi pôlu a ŋ̀ánaa. Gɛ́ ŋ́gbonôi é kpanaŋ yɛ̂ɛ berei í íkono tèe lai.

²⁹Ífe nɛ̀ɛ naa ŋá pîlaŋ pere nyɔ́mɔɔ ma, í ítɔ̂ŋ lɛ́ ḿâ ísɔŋ lɛ̂lɛ-laai sârai.

³⁰Ŋa ŋ̀wɛ̂lii ŋ́gɛ ƃò a teniŋ ƃô-nuu. Ŋa ítɔ̂ŋ-ŋai kélee maa mɛni láa ŋ́gili ŋá.

³¹Ŋ́gaa ísɛŋ lɛ́ɛi pôlu, Yâwɛɛ. Ífe ǹɛɛ naa ŋá ŋ̀umɛ.

³²Ŋa pâi ítɔ̂ŋ-ŋai mɛi kâai, kpɛ́ni fêi, ya pâi táre támaa tɛɛ̂i ḿbɔ.

³³Óo Yâwɛɛ, ítɔ̂ŋ-ŋai lɛ́ ḿâ, ǹyaŋ ŋa pâi siâi a díwoo a ɣele kélee.

³⁴Ítɔ̂ŋ ŋáa lɛ́ ḿâ, ŋa pâi m̀ɛi kâai. Ŋa pâi m̀ɛi kâai a ńii kélee.

³⁵Gɛ́ ŋá sía a ítɔ̂ŋ-ŋai wóo, kpɛ́ni fêi zu ƃé ŋa lii-nɛ̃ɛ sɔlɔ ƃô naa.

³⁶Gɛ́ ítɔ̂ŋ-ŋai maa mɛni kɛ́ ƃò ńii su é tɛ́ɛ la tɔɔ-laa ma.

³⁷Ífe ǹɛɛ naa ŋ́ɛi kɛ́ ƃò sãâ kpɛ́ni-kpɛni-ŋa dîa, kɛ́lɛ, fúlu-laa tɛɛ ḿbɔ yɛ̂ɛ berei í íkono tee lai.

³⁸Íkono teei ŋ̀aa-see kɛ́ ńyêei, ńyãai a íyee mu nuui. Gono teei ŋí ƃé ya gɛ̀ diai yêei da íwoo mɛnii.

³⁹Ŋ́gula diai yêei da kɛ̂ woo yɔ̂ŋ pilîi ḿâi, kpɛ́ni fêi, ya mɛni ŋá tèe a tɔ̃yâ-pere.

⁴⁰Ŋa ŋ̀wɛ̂lii ŋ́gɛ ítɔ̂ŋ-ŋai mɛi kâa. Fúlu-laa nina tɛɛ ḿbɔ, kpɛ́ni fêi, íkaa a tɔ̃yâ Ɣala.

⁴¹Óo Yâwɛɛ, íwɔlɔ-wɔlɔ wɛli kɛ-maai lɛ́ ḿâ. Ǹɛ́ ḿâ í ŋ́uŋ ma ƃó yɛ̂ɛ berei í íkono tèe lai.

⁴²Gɛ̀ ní ŋa pâi pɔrîi diai wóo su toôi da kɛ̂ ńarânii, kpɛ́ni fêi, ńâai a íwoo.

⁴³Ŋ́gɛ a tɔ̃yâ ƃó nuu a ɣele kélee, kpɛ́ni fêi, ŋ́gili tɔɔ̂i ítɔ̂ŋ-ŋai dîa.

⁴⁴Ŋa pâi ńyee sêei ítɔ̂ŋ mu, wɔ́lɔ-wɔlɔ da wɔlɔ-wɔlɔ.

⁴⁵Ŋa pâi kɛ̂i a ŋuŋ-ma ƃóɔɔ, kpɛ́ni fêi, ŋa kɔ̂i a gɛɛ ŋá ísɛŋ lɛ́ɛi mɛi káa.

⁴⁶Ŋa pâi ítɔ̂ŋ-ŋai maa mɛ̂ni ƃôi kâloŋ-ŋa dîa, ǹyaŋ ŋumɛ fé pâi ŋ́gɛ̂i.

⁴⁷Ŋa lii-nɛ̃ɛ sɔlɔ ƃô ítɔ̂ŋ-ŋai mɛi káa sârai, kpɛ́ni fêi díwɛli káa ḿâ.

⁴⁸Ítɔ̂ŋ lɛ̂lɛɛi a ńîa, ŋa ńyee see m̀u, ŋa pâi ŋ́gili-ŋa siâi é pîlaŋ ísɛŋ lɛ́ɛi ma.

⁴⁹Gono-teêi í gɛ̀ ńyãai ŋ́gaa a íyee-mu nuui ńyêei, a kili-kɛ-zu kɛ́ ńyêei.

⁵⁰Tãi ŋá kɛ̀ mɔ̃̂lɛi, lai í ŋáa nɛ̀nɛ, kpɛ́ni fêi, íkono-teei è fúlu-laa tɛ̀ɛ ḿbɔ.

⁵¹Ŋɛi-tɛ-ƃela díkaa nɔ́ ɣɛ́lɛ-maa kulâi ŋ́gbonôi, kɛ́lɛ, ḿve niî ńyee kula ní ítɔ̂ŋ mu.

⁵²Óo Yâwɛɛ, ítɔ̂ŋ-ŋai í wɔ́lɔ dɛ̀ɛ a tãi su kôyaai, m̀aa mɛ̂ni kíli káa ŋ́a, ǹyaŋ da ŋá nɛ̀nɛ.

⁵³Tãi ŋa ŋ̀wana-lɔ̂ɔ-ƃelai kâa la díkɛ ítɔ̂ŋ kàrai, ńii a ŋwâna a ŋánaa.

⁵⁴Gɛ̀ ɣéniɛ kpuai ŋa gɛ́ ɣele mai, ŋa wule támaa pɔ̃yɛɛ a pîlaŋ ítɔ̂ŋ-ŋai dîa.

⁵⁵Yâwɛɛ, íkili a kɛ̂ nɔ́ ŋá gbínii su, ŋ́gɛ ŋ́gili-ŋa sìa é pîlaŋ ítɔ̂ŋ-ŋai dîa.

⁵⁶Ńii a nɛ̃̂ɛ ŋà kɛ̀ ítɔ̂ŋ-ŋai ŋaa-see kɛ̂i.

⁵⁷Óo Yâwɛɛ, yá nɔ́ ƃé ŋa íwɛ̂lii, ŋa ŋ́gono tée a gɛɛ ŋa pâi ítɔ̂ŋ-ŋai mɛi kâai.

⁵⁸Ŋa ímarê kɛ̂i kpɔ́ a ńii kélee a gɛɛ í malôŋ káa yɛ̂ɛ berei í íkono tèe lai.

⁵⁹Ŋá nâa ńzɔŋ kɔ́lɔŋ, ǹyaŋ, ŋa nâa ŋ́gono tée a gɛɛ ŋá kɛ́ ísɛŋ lɛ́ɛi pôlu.

⁶⁰Ḿve pâi ḿvii tɔɔ̂i ítɔ̂ŋ-ŋai mɛi káa mɛ̂ni ma.

⁶¹Ŋ̀wana-lɔ̂ɔ-ƃelai da ƃáre tɛ́ ḿberêi, kɛ́lɛ, ḿve nîi nia ní ítɔ̂ŋ mâ.

⁶²Ŋa ŋ́ɛi láa ƃò a gbíni sâmai, ŋ́gɛ ílaa maa tɛ̀ íteniŋ ƃô mɛni ŋaa téɛɛi mɛ̂ni ma.

⁶³Diai kélee da tíi kɛ́ yɛ̂ɛi díkaa a nâoi-ni, da diai da ítɔ̂ŋ-ŋai mɛi kâai.

⁶⁴Óo Yâwɛɛ, ǹɔii láa fɛ̂ɛi a íwɔlɔ-wɔlɔ wɛli-kɛ-maai. Ítɔ̂ŋ-ŋai lɛ́ ḿâ.

⁶⁵Óo Yâwɛɛ, ya íkono-tee-ŋai ŋàa sèe kɛ́, ǹyaŋ, ísɔŋ lɛ̂lɛɛi ńyãai a íyee-mu nuui ḿɛ̂ni ma.

⁶⁶Táre da mɛni ŋá káa tɛ́ɛ ḿbɔ, kpɛ́ni fêi, ńâai a ítɔ̂ŋ-ŋai.

⁶⁷Ŋa kâa mɛni nyɔ́mɔ kɛ̀ ílɛɛ pâi ŋ́gula maa kɛ̂i, kɛ́lɛ ŋa íwooi mɛi kâai sâai ŋí su.

⁶⁸Ítûa-pere lɛ̂lɛɛi, ísɔŋ lɛ́lɛɛ. Ítɔ̂ŋ-ŋai lɛ́ ḿâ.

⁶⁹Ŋ̀ɛi-tɛ-ƃelai da lɛ́ɛ kɛ̀ a ńaa, kɛ́lɛ, ŋa pâi ísɛŋ lɛ́ɛi mɛi kâai a ńii kélee.

⁷⁰Mɛni ŋá káa fé díyêei, kɛ́lɛ, ńii a nɛ̃ɛ̂i ítɔ̂ŋ mɛ̂ni ma.

⁷¹È kɛ̀ a ǹɛ́lɛɛ í ŋ́gula-maa kɛ́ kɛ̀, kpɛ́ni fêi è gɛ̀ ŋá ítɔ̂ŋ mɛi káa.

⁷²Ítɔ̂ŋ lɛ̂lɛɛi ḿɛ̂ni ma, é tɛ́ɛ zɛŋ-kaoi nyii kélee gáa ǹɔii sui ma.

⁷³Yá ƃé ŋ́gbɛ̀tɛ, íkɛ ḿɛi kâa. Mɛni ŋá káa tɛ́ɛ ḿbɔ, a gɛɛ ŋá ítɔ̂ŋ-ŋai kɔ́lɔŋ.

⁷⁴Diai da ƃâa kɛ̀ yâi, tãi da ŋ́gàa lai, dílii a nɛ̃̂ɛ, kpɛ́ni fêi ńâai a íkono-teei.

⁷⁵Yâwɛɛ, ŋá gɔ́lɔŋ a gɛɛ ya mɛni ŋá tèe a teniŋ ƃô-pere, ǹyaŋ í ŋ́gula-maa kɛ̂ kpɛ́ni fêi, íteniŋ ƃôɔɔi.

⁷⁶Tɔ́ɔ íwɔlɔ-wɔlɔ wɛli-kɛ-maai é ŋáa nɛnɛ, yɛ̂ɛ berei í íkono tèe la ńyãai a íyee-mu-nuui ńyêei.

⁷⁷Ŋɛ́i malôŋ káa gɛ̀ ní ŋa pâi lɛɛ̂i ɣele ma, kpɛ́ni fêi, ńii lâai ítɔ̂ŋ mɛ̂ni ma.

⁷⁸Ǹɛɛ naa ŋ̀ɛi-tɛ́-ƃelai dí ŋumɛ kpɛ́ni fêi dílɛɛ pɛ̀lɛ ḿâ, mɛni a kpèra ḿâ, ŋa pâi ŋ́gili ŋá siâi é pîlaŋ ísɛŋ lɛ́ɛ-ŋai dîa.

⁷⁹Tɔɔ diai da ƃaa-kɛ-maa tɛ̂ɛ ípɔi, dí pá ḿbɔ, diai kélee dí ítɔ̂ŋ-ŋai kɔ́lɔŋ.

⁸⁰Tɔɔ ŋá ítɔ̂ŋ-ŋai mɛi káa a teniŋ ƃô làa, à kɛ̀ tí, ŋumɛ fé pâi ḿbaâi.

⁸¹Óo Yâwɛɛ, ŋa lɛɛ ímaa kpɛ́nîi a gɛɛ í ḿbalo kɔlɔ a kpɛɛ ḿâ. Ńâai a íwooi.

⁸²Ŋa lɛ́ɛ íkono-teei maa kpɛ́nîi ŋ́ɛi láa fa ŋɔ́nɔ pɔ̂ri ƃôi, ŋ́gɛ ímarê kɛ̀, “Lé tãi ƃé yà pâi kpɔnîi la ḿâi?”

⁸³Kɛ̂i fé ŋɔnɔ ḿâ yɛ̂ɛ sua-kɔlɔ-gonoŋ nyíi m̀ɔ̂ɔi, é máŋ kɛ́ tí, ḿve nîi nia-ní ítɔ̂ŋ-ŋai dîa.

⁸⁴Tãi ɣɛɛlu ƃé ŋa pâi kɛ̂i ímaa kpɛ́nîi lai? Lé tãi ƃé ya pâi diai mɛni ŋánaa kɛ̂i a ńyãai kula-maa kɛ̂i lai?

⁸⁵Ŋ̀ɛi-tɛ-ƃelai nyii-ŋai dífa ítɔ̂ŋ-ŋai mɛi kâai, da lóa-ŋa tée ḿberêi a gɛɛ dí ńzoŋ.

⁸⁶Ítɔ̂ŋ-ŋai kélee káa a tɔ̂ŋ-ŋa nyii núu a pɔ̂ri gíli tɔɔ̂i dîai. Nûa da lɛ́ɛ kɛ̂i a ńaa, díkɛ mɛni ŋánaa kɛ̀ a ńyãa. Ye kpɔŋ ḿâ.

⁸⁷Díyee ǹyɛɛ é nâa pɔ̂ri ḿâ ḿbaa mɛ̂ni ma, kɛ́lɛ, ḿve nîi ḿbɔlu tɔ̀ɔ ní ítɔ̂ŋ-ŋai dîa.

⁸⁸Íyee sée ḿù íwɔlɔ-wɔlɔ wɛli-kɛ-maai mɛ̂ni ma, a gɛ́ɛ ŋá ítɔ̂ŋ-ŋai mɛi káa.

⁸⁹Óo Yâwɛɛ, íwooi a pâi kɛ̂i nɔ́ naa wɔ́lɔ-wɔlɔ. Gáa nɔ́ Ɣâla-taa wɔ́lɔ-wɔlɔ.

⁹⁰Íteniŋ ƃô-laai káa nɔ́ naa a tãi kélee diai kélee pâi pâi dímɛni ma. É síɣe tãi í ǹɔii lâa la ǹâai, gáa nɔ́ nîi naa.

⁹¹É síɣe tãi ḿa í zãai kélee kpɛ̀tɛ lai, díkaa nɔ́ niî a díkɛ pêre yɛ̂ɛ berei í mò lai, kpɛ́ni fêi díkelee díkaa a íyee mu-ƃela.

⁹²Eî kɛ̀ ítɔ̂ŋ fé a ŋálii-nɛ̃ɛ kɔ́ɔ pîlanii, ŋ́âi pà lɛɛ̂i mɔ̃lɛi ŋá sáa.

⁹³Ḿve pâi wɔ́lɔ ńyee kulâi ísɛŋ lɛ́ɛi mu, kpɛ́ni fêi zârai ƃé ŋ́gaa la a ḿvulu.

⁹⁴Ŋ́gaa a ípɔɔ, ye ḿalo mî. Ŋa kɔ̂i a gbanaŋɔɔ a gɛɛ ŋá ítɔ̂ŋ-ŋai mɛi káa.

⁹⁵Ŋ̀wana-lɔ̂ɔ-ƃelai da ḿaa kpɛ́nîi a gɛɛ dí ḿbaa, kɛ́lɛ, ŋa pâi ŋ́gili-ŋa siâi é pîlaŋ ítɔ̂ŋ-ŋai dîa.

⁹⁶Ŋá gɔ́lɔŋ a gɛɛ sɛŋ kélee kɔ́yɛŋ káa m̀a, kɛ́lɛ, ítɔ̂ŋ-ŋai kɔ́yɛŋ fé m̀a.

⁹⁷Ítɔ̂ŋ wɛ́li káa ḿâ. Ŋa ŋ́gili ŋá sìa a é pîlaŋ m̀a é síɣe ɣele-wala ma é tóo ɣele-wulii ma.

⁹⁸Ítɔ̂ŋ káa ńyêei a tãi kélee, a gɛ́ ŋà táre a tɛɛ ŋ́gbɔara-ƃelai kélee dîa.

⁹⁹Ŋà mɛni ŋá kàa é tɛ́ɛ ŋásɛŋ lɛ́-ƃelai kélee dîa, kpɛ́ni fêi ŋà ŋ́gili ŋá sìa é pîlaŋ ísɛŋ lɛ́ɛ-ŋai dîa.

¹⁰⁰Ŋá mɛni ŋá káai kɛ̂tɛi é tɛ́ɛ ǹúu-pɔlɔ-ŋai dîa, kpɛ́ni fêi ŋa ítɔ̂ŋ-ŋai mɛi kâa.

¹⁰¹Ŋà ńyee kúla kpɔ́ ŋwana-lɔ̂ɔ-tùa kélee su, kpɛ́ni fêi, ŋa ŋ̀wɛ̂lii a gɛɛ ŋá íwooi ŋ̀aa sèe kɛ́.

¹⁰²Ḿve tá ḿbôlu tɔɔ ní ísɛŋ lɛ́ɛi da ma, kpɛ́ni fêi, yá kpíŋ ƃa ŋásɛŋ lɛ́-nuui.

¹⁰³Ísɛŋ lɛ́ɛi lɛ̂lɛɛi, ǹɛ̃ɛ̂i kpɔ́ é tɛ́ɛ kɔ̃́iŋ-wulɔ ma!

¹⁰⁴Ŋà táre sɔlɔ ƃô ítɔ̂ŋ-ŋai su, m̀ɛni ma, tua-pere nyɔ̂ŋ kélee ƃɛlɛ-kpɛɛi ŋ́goi.

¹⁰⁵Íwooi káa a kpáleŋ-soŋ ŋ́gɔɔ mu pono mɛ̂ni ma, gɛ́ ƃò a kwaa ponoɔɔ a gɛɛ é ḿberêi pono.

¹⁰⁶Ŋà ḿvoo kpɔ́ a gbanaŋɔɔ a gɛɛ ŋá ńyee see ítɔ̂ŋ mu nyii gáa a íteniŋ ƃô sɛŋ-lɛɛi.

¹⁰⁷Óo Yâwɛɛ, ŋá mɔ̃́lɛ-laai su kɛ̂tɛi a ŋánaa. M̀ɛni ma, ḿbalo mî yɛ̂ɛ berei í íkono tèe lai.

¹⁰⁸Oó Yâwɛɛ, íyee see mî ŋá sɛɣɛi-fêi Ɣala fɛli-wooi mu, í ítɔ̂ŋ lɛ́ ḿâ.

¹⁰⁹Ŋà ŋá fúlu-laai sêe a sɛ́ɣɛ ítɔ̂ŋ-ŋai mɛni ma a ɣele kélee, kɛ́lɛ, ḿva nîa ítɔ̂ŋ ma.

¹¹⁰Ŋ̀wana-lɔ̂ɔ-nuui a ƃáre tɛ́ ḿberêi, kɛ́lɛ ḿve niî ítɔ̂ŋ-ŋai kara ní.

¹¹¹Ítɔ̂ŋ-ŋai díkaa a ŋ́gɔ̃liŋ wɔ́lɔ-wɔlɔ da wɔlɔ-wɔlɔ. Da ńii làa.

¹¹²Ŋa gbɛtɛ ŋ́gili-ŋa a gɛɛ ŋá ítɔ̂ŋ-ŋai mɛi káa, é lɛ́ɛ la zu ŋá sáa.

¹¹³Diai dífa ƃaa-kɛ-maa tɛ̂ɛ ípɔi, díƃɛlɛ fé ŋ́goi a dɔnɔ kpîŋ, kɛ́lɛ, ítɔ̂ŋ lɛ̂lɛɛi a ńîa.

¹¹⁴Ya ƃé yà ḿɛi kâa íkɛ ḿaa kɔ̃̂ɔ. Ŋ́gili tɔɔ̂i íkono-teei ma.

¹¹⁵Káai kákaa a sɔnyɔ̂ŋ kɛ́-ƃelai, ka kula ŋ́gɔlɛ. Ŋa pâi ńyee seêi Ŋáɣâlai ŋɔtɔ̂ŋ-ŋai mu.

¹¹⁶Wála-wala-laa tɛɛ ḿbɔ yɛ̂ɛ berei í íkono tèe lai, gɛ̀ ní ŋa pâi kɛ̂i ɣele ma. Ífe ǹɛɛ naa ńii é tóo pôlu ŋákili-kɛ-zui su.

¹¹⁷Ye ńzoŋ, gɛ̀ ní ŋa pâi ŋuŋ-maa ƃô sɔlɔ ƃôi, gɛ̀ ní ŋa pâi ŋ́oli tɔɔ̂i ítɔ̂ŋ-ŋai dîa a tãi kélee.

¹¹⁸Diai dífa díyee sèe ítɔ̂ŋ-ŋai mui, ya íyee kùla dímu. Díwôya mɛni kpɛtɛɛ-ŋai káa nɔ́ kpɛ́ni-kpɛni.

¹¹⁹Ya ŋ̀wana-lɔ̂ɔ-ƃelai sôŋ nɔ́ yɛ̂ɛ kala nyii ya gɔ̀ɔ í bilii, m̀ɛni ma, ítɔ̂ŋ-ŋai lɛ̂lɛɛi a nîa.

¹²⁰Yá nɔ́ ƃé ŋa yaôi yâ. Ŋa yaôi kpɔ́ í mɛni ŋá téɛɛi ma.

¹²¹Ŋà tûa a téniŋ ƃô-pere lɛ́lɛɛ. Ífe ńdũaŋ ŋ́gbɔara-ƃelai dîa.

¹²²Íkono tée a gɛɛ ya pâi kpɔnîi íyee-mu nuui ma. Ífe ǹɛɛ naa ŋ̀wana-lɔ̂ɔ-ƃelai dí ḿɔ̃lɛ.

¹²³Ŋa lɛɛ íƃalo-laa kpɔŋ-mai perêi kâai, ŋ́ɛi fa ŋɔ́nɔ kwaa kâa. Ŋɛ́i káa nɔ́ niî íŋuŋ-ma ƃôi perêi kâai yɛ̂ɛ berei í íkono tèe lai.

¹²⁴Tûa a ńyãa yɛ̂ɛ berei íwɔlɔ-wɔlɔ da wɔlɔ-wɔlɔ wɛli-kɛ maai káa lai, í ítɔ̂ŋ-ŋai lɛ́ ḿâ.

¹²⁵Ŋ́gaa a íyee-mu nuu. Ŋ́gɛ ŋá mɛni ŋákaa, a gɛɛ ŋá ísɛŋ-lɛɛi kɔ́lɔŋ.

¹²⁶Yâwɛɛ, tãi aâ seri a gɛɛ í mɛni su too, kpɛ́ni fêi ínûai da ítɔ̂ŋ-ŋai kàra.

¹²⁷Íwooi wɛ́li káa ḿâ yɛ̂ɛ gôo. Íwooi wɛ́li káa ḿâ é tɛ́ɛ gôo lɛ́lɛɛ ma.

¹²⁸M̀ɛni ma, ŋà ńyee sée ísɛŋ-lɛɛi mu, tùa-pere nyɔ̂ŋ ƃɛlɛ fé ŋ́goi.

¹²⁹Ísɛŋ-lɛɛi lɛ̂lɛɛi. M̀ɛni ma ŋa ńyee see mù a ńii kélee.

¹³⁰Í íwoo-ŋai ŋá lɛ̀, ǹyaŋ dípà a kwaa ponóɔɔ, dí tare lɛ́ diai dîa dífe táre nii.

¹³¹Ítɔ̂ŋ-ŋai wɛ́li káa kpɔ́ ḿâ a ŋánaa, m̀ɛni ma ŋa dí maa kpɛ́nîi kpɔ́ a ŋ́oli láa ƃóɔɔ.

¹³²Tínaŋ ḿbɔ naa pere í malôŋ káa, yɛ̂ɛ berei ya gɛ̀ la a diai í díwɛli nii.

¹³³Ye mɛi káa yɛ̂ɛ berei í íkono tèe lai a gɛɛ fa lâa too la. Ífe ǹɛɛ naa sɔnyɔ̂ŋ yée é tɛ́ɛ ḿâ.

¹³⁴Ŋ́gula mî diai ḿɔ̃̂lɛi yêei, a gɛɛ ŋá ítɔ̂ŋ-ŋai mɛi káa.

¹³⁵Ǹɛɛ naa íkɛ-naa-laai é lûwa láa ḿâ. Ítɔ̂ŋ-ŋai lɛ́ mí ḿâ.

¹³⁶Ŋa wɔ̂lɔi kpɔ́ a ŋánaa, kpɛ́ni fêi ǹûai dífa díwoli tɔ̀ɔ ítɔ̂ŋ-ŋai dîa.

¹³⁷Yâwɛɛ, íkaa a teniŋ ƃô-nuu, ǹyaŋ ítɔ̂ŋ-ŋai sã̂ai.

¹³⁸Dɔ̂ŋ-ŋai ya dí tɛɛi, dílɛ̂lɛɛi, dí kɛ́ ƃò a tɔ̃yâ.

¹³⁹Ŋa ńii ŋwána kpɔ́ yɛ̂ɛ ŋɔŋ, kpɛ́ni fêi ŋ́gbɔara-ƃelai da díyee kúla ítɔ̂ŋ-ŋai mu.

¹⁴⁰Íkono têei káa a tɔ̃yâ. M̀ɛni ƃé ŋá ŋ̀wɛ̂li-ni la a ŋ̀ánaa.

¹⁴¹Ŋ́guro-tei, ḿɛlɛ kpɛ̂ɛ díkoi. Kɛ́lɛ, ḿva ńyee kùla ísɛŋ lɛ́ɛi mu.

¹⁴²Íteniŋ ƃô-laai a pâi kɛ̂i nɔ́ naa wɔ́lɔ-wɔlɔ, ǹyaŋ ítɔ̂ŋ káa a tɔ̃yâ.

¹⁴³Mɛni kpɔ̂lu da lii-too pôlu káa ḿâ, kɛ́lɛ ítɔ̂ŋ-ŋai da lii sêe tɛ̀ɛ ḿbɔ.

¹⁴⁴Ísɛŋ lɛ́ɛ-ŋai dí teniŋ ƃôɔɔi. Mɛni ŋá káa lɛ́ ḿâ, gɛ̀ ní ŋa pâi lɛɛ̂i ɣele ma.

¹⁴⁵Óo Yâwɛɛ, ŋa ítôlii kpɔ́ a ńii kélee. Ŋ́oo su tòo, gɛ̀ ní ŋa pâi ítɔ̂ŋ-ŋai mɛi kâai.

¹⁴⁶Ŋa ítôli, Ŋ́uŋ ma ƃó mî, gɛ̀ ní ŋa pâi ítɔ̂ŋ-ŋai mɛi kâai.

¹⁴⁷Ɣele é lɛ́ɛ pâi ƃɔ̂i, ŋa wɔ̂lɔ yâ kpɔŋ mâa mɛni ma. Ŋ́gili tɔɔ̂i íkono têei ma.

¹⁴⁸Kpíni a pɛ̀lɛ, ḿva nyîi. Ŋà kɛ̂ ŋ́gili ŋá siâi gɛ́ pìlaŋ ísɛŋ lɛ́ɛ-ŋai dîa.

¹⁴⁹Óo Yâwɛɛ, íwoli tɔ́ɔ ḿâ, kpɛ́ni fêi íwɛli kɛ́-maai káa naa wɔ́lɔ-wɔlɔ. Ŋ́ɛi malôŋ káa mî, ífe ǹɛɛ naa ŋá sáa.

¹⁵⁰Ŋ́gbɔara-ƃela ŋwana lɔ̂ɔ-ŋai da lɛɣɛ̂i a ńyãa, ǹûai ńyii ŋai dífa ítɔ̂ŋ-ŋai mɛi kâai.

¹⁵¹Oó Yâwɛɛ, kɛ́lɛ ílɛɣɛ̂i a ńyãa, ǹyaŋ ítɔ̂ŋ-ŋai kélee káa dɔɔ̂i.

¹⁵²Ŋa wɔ́lɔ ítɔ̂ŋ-ŋai maa kɔ́ri, í gɛ́ díkɛ ƃò naa wɔ́lɔ.

¹⁵³Ŋá mɔ̃́lɛ-laai káa, í ḿalo mî, kpɛ́ni fêi, ḿve niî ńyee kula ní ítɔ̂ŋ-ŋai mu.

¹⁵⁴Ḿaa kɔ̃ɔ í ḿalo mî. Ŋ́uŋ maa ƃó yɛ̂ɛ berei í íkono tèe lai.

¹⁵⁵Ŋwana-lɔ̂ɔ-ƃelai dífe pâi ƃálo-laa sɔlɔ ƃôi, kpɛ́ni fêi, dífa díyee sèe ítɔ̂ŋ-ŋai mu.

¹⁵⁶Kɛ́lɛ, Yâwɛɛ, íŋɛi-maloŋ kâai su kɛ̂tɛi. Í maloŋ-kaai lɛ́ í ḿalo mî.

¹⁵⁷Ŋ́gbɔara-ƃelai da diai ḿɔ̃lɛi dí tâmaai, kɛ́lɛ ḿva fɛ̂ɣɛ a gɛɛ ŋá ńyee sée ítɔ̂ŋ mu.

¹⁵⁸Tãi ŋa ǹúu-pɛlɛ-ƃelai tí kàa lai, díƃɛlɛ a kpɛ̂ɛ ŋ́goi, kpɛ́ni fêi, dífa díyee sèe ítɔ̂ŋ-ŋai mu.

¹⁵⁹Óo Yâwɛɛ, ye gáa berei ŋá ítɔ̂ŋ-ŋai wɛ́li ní lai. Ḿalo mî, kpéni fêi íwɛli-kɛ-maai maa fa fâleŋ.

¹⁶⁰Ítɔ̂ŋ ŋuŋ ƃa tɔ̃yâ Ítɔ̂ŋ-ŋai sã̂a, gɛ́ ƃò naa wɔ́lɔ-wɔlɔ da wɔlɔ-wɔlɔ.

¹⁶¹Ńuu wála-walaa-ŋa dí pɛ̀lɛ ḿâ a wôya-pere, kɛ́lɛ, ŋá ƃaa-kɛ-maa tɛ̂ɛ ítɔ̂ŋ pɔ́.

¹⁶²Ńii nɛ̃ɛ̂i íkono-tee-ŋai mɛ̂ni ma, ńii nɛ̃ɛ kpɔ́ yɛ̂ɛ núu a tɔɔ-sãa kɛ́tɛ sìɣe toôi.

¹⁶³Lɛ́ɛ mɛni sii kélee kpɔ́ wɛ́li kpɛɛ̂i ḿâ a ŋ̀ánaa, kɛ́lɛ, ítɔ̂ŋ wɛ́li káa ḿâ.

¹⁶⁴Fólo kélee ŋa ísɛɣɛ̂i fè gîei lɔ́ɔlu mɛi-feerɛ, íteniŋ ƃô-mɛni ŋá téɛɛi mɛ̂ni ma.

¹⁶⁵Diai kélee ítɔ̂ŋ wɛ́li káa diai, lii-see káa dîa, dítɔɔ̂i kpanaŋɔɔ, ǹyaŋ sɛŋ da fé naa ńyii a pɔ̂ri gɛ̂i dí tóo.

¹⁶⁶Óo Yâwɛɛ, ŋa ímaa kpɛ́nîi a gɛɛ ímalo mî, ǹyaŋ m̀ɛnii ya ŋ̀wɛ̂lii ǹya ƃé ŋa gɛ̀.

¹⁶⁷Ŋá ńyee sée ísɛŋ lɛ́ɛ-ŋai mu, ŋá díwɛli ni kpɔ́ a ńii kélee.

¹⁶⁸Ŋa ítɔ̂ŋ-ŋai da ísɛŋ lɛ́ɛ-ŋai mɛi kâa. M̀ɛni-ŋai ŋà gɛ̀i, ya dí kâa.

¹⁶⁹Óo Yâwɛɛ, tɔ́ɔ ŋá kpɔŋ-mâ Ɣala fɛli-wooi é seri yâ. Mɛni ŋákaa tɛ́ɛ ḿbɔ yɛ̂ɛ berei í íkono tèe lai.

¹⁷⁰Íwoli tɔ́ɔ ḿvɛli-wooi ma, íŋuŋ-mâa ƃó yɛ̂ɛ berei í íkono tèe lai.

¹⁷¹Ŋá pâi kɛ̂i nɔ́ ílaa-maa tɛ̂i, kpɛ́ni fêi ya ítɔ̂ŋ-ŋai lɛ̀ ḿâ.

¹⁷²Ŋa pâi wule toôi é pîlaŋ ítɔ̂ŋ ma, kpɛ́ni fêi ítɔ̂ŋ-ŋai díkaa a tɔ̃yâ.

¹⁷³Kɛ́ nɔ́ a íkpîŋ kpɛtɛɛ a tãi kélee a gɛɛ í kpɔŋ-maa tɛɛ ḿbɔ, kpɛ́ni fêi ŋ́gaa nɔ́ ítɔ̂ŋ-ŋai pôlu,

¹⁷⁴Óo Yâwɛɛ, ŋ́ɛi káa nɔ́ wɔ́lɔ íperêi ŋ́uŋ maa ƃó mɛni ma. Ŋá koi-nɛ̃ɛi káa ítɔ̂ŋ su.

¹⁷⁵Fúlu-laa tɛ̀ɛ ḿbɔ a gɛɛ ŋá ílaa maa tɛ́. Tɔɔ ísɛŋ-lɛɛi é kpɔŋ-mâa tɛ̀ɛ ḿbɔ.

¹⁷⁶Ŋa kɛ̀ nɔ́ sia-siai yɛ̂ɛ ƃála a làŋ. M̀ɛni ma, í ńyãai ŋ́gaa a íyee-mu nuui ŋ́gɔ̂ri, kpɛ́ni fêi ḿve tá ńyee kula ní ítɔ̂ŋ-ŋai mu.