Read Kpelle Wule-woo-ŋa 13 Bible Online

Wule-woo-ŋa 13 - Kpelle bible

Wule-woo-ŋa 13

¹Deeƃé ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni mai Óo Yâwɛɛ, lé tãi ƃé ḿaa mɛ̂ni kili a pâi toôi la íkili ŋái? Lé tãi ƃé ya pâi íŋɛi tínanîi la ḿbɔ naa perei?

²Ŋa pâi ńii kpelêi mɛni-soli su tãi ɣɛɛlu yée mu? Tãi ɣɛɛlu ƃé ŋa pâi kɛ̂i la lii-too pôlu su a kpíni da foloi? Tãi ɣɛɛlu ƃé ya pâi ǹɛɛ̂i naa ŋ́gbɔara-ƃelai yée é tɛ́ɛ ḿâi?

³Óo Ŋáɣâlai Yâwɛɛ, ŋ́gaa, í ŋ́oo su-too. Ŋ́gbonôi kpanaŋ, ífe ǹɛɛ naa ŋá sáa.

⁴Ífe ǹɛɛ naa ŋ́gbɔara-ƃelai dí m̀ó dîyɛɛi, “Kúyee aâ tɛɛ m̀a.” Ífe ǹɛɛ naa ŋ̀gbɔra-ƃelai dí lii-nɛ̃ɛ kula ńyee mɛi ɣále mɛ̂ni ma.

⁵Kɛ́lɛ ńâai a íwɔlɔ-wɔlɔ wɛli-kɛ-maai mɛ̂ni. Ŋa pâi lii-nɛ̃ɛ kulâi, kpɛ́ni fêi, yâ pâi ŋ́uŋ ma ƃôi.

⁶Ŋa pâi wule toôi yâ, óo Yâwɛɛ, kpɛ́ni fêi, ya mɛni lɛ́lɛɛ támaa kɛ́ mî.