Read Kpelle Wule-woo-ŋa 138 Bible Online

Wule-woo-ŋa 138 - Kpelle bible

Wule-woo-ŋa 138

¹Deeƃé ŋɔwulei Óo Yâwɛɛ, ŋa ísɛɣɛi fêi a ŋáwala-wala laai kélee. Ŋa wule toôi yâ ŋ̀âla-ŋai kélee ŋɛ́i-tuɛ.

²Ŋá ŋ́ɛi pìlaŋ í Ɣâla-pɛrɛ Kɛ́tɛi ma, ŋá ŋ́uŋ maa pîlaŋ, ŋá sɛɣɛi-fei tɛɛ ípɔ. Ŋa pâi ílaa maa tɛ̂i, íwɛli-kɛ maa kpanaŋɔɔi da íteniŋ ƃô-laai mɛ̂ni ma, kpɛ́ni fêi íkɛ̂tɛi ítɔ̂ŋ kpanaŋɔɔ é tɛ́ɛ sɛŋ kélee ma.

³Tãi ŋá ítòli lai, íŋoo mɛ̀ni, íwala-wala tɛ̀ɛ ḿbɔ, nyii ŋgbonoi kpanaŋ.

⁴Yâwɛɛ, gâloŋ-ŋai díkaa ŋ̀éniɛi sui, díkelee da pâi ílaa maa tɛ̂i, kpɛ́ni fêi da íkono-tee woo-ŋai mɛ́ni.

⁵Da pâi wule toôi é pîlaŋ m̀ɛnii ma ya gɛ́i, é pîlaŋ ífolo-laa kɛ́tɛi ma.

⁶Berei máŋ íkaa la sɛŋ kélee mɛi, íkaa diai dí maa-yeŋɔɔi dí mɛ̂ni ma, ǹyaŋ diai díŋɛi tɛ̂ɛi, í díkɔlɔŋ.

⁷Tãi mɛni kpɔ̂lu a tînaŋ la ḿâi, ya ḿɛi kâa. Ya tɔ̂ɔ ŋ́gbɔara-ƃelai dîa, í ŋuŋ maa ƃó díyêei a íwala-wala-laai.

⁸M̀ɛnii í mòi, ya pâi gélee ŋ̀aa see kɛ̂i. Óo Yâwɛɛ, íwɛli-kɛ-maai káa naa wɔ́lɔ-wɔlɔ. Díi yá gɔ́ɔ pîlaŋ, gbéli kpɛ́ɛ.