Read Kpelle Wule-woo-ŋa 139 Bible Online

Wule-woo-ŋa 139 - Kpelle bible

Wule-woo-ŋa 139

¹Deeƃé ŋɔwulei è bɔ̃yɛ ŋ̀ule-too núu kɛ́tɛi pɔ́ naai Óo Yâwɛɛ, ya ńii su káa, í ḿaa mɛ̂ni kélee kɔ́lɔŋ.

²Í tãi kɔ́lɔŋ ŋa kɛ́ ḿvii tɔɔ̂i la, kpáa máŋ ŋà kɛ̀ tíi kɛ̂i. Ya lɛ̂ɛ kwaa kôyaa ma í ŋá kili-ŋa sîai kélee kɔ́lɔŋ.

³Ya ŋ́gâa à kɛ̀ ŋ́gaa ḿvii tɔɔ̂i, kpaa máŋ ŋà kɛ̀ tíi kɛ̂i. Í ńdûa-pere kélee kɔ́lɔŋ.

⁴Ŋá lɛ́ɛ pâi lônoi, yà kɛ̂ a m̀ɛnii kɔ́lɔŋɔɔ ŋa pâi môi.

⁵Íkaa kpɔ́ ḿela kélee ma. Ya ḿɛi kâa a íwala-wala-laai.

⁶Ítarêɛi ḿaa mɛ̂ni kélee su, ḿva táre zui.

⁷Mí ƃé ŋa pû íyêei ŋá lí naai? Mí ƃé ŋa kûla íŋɛi ŋá lí naai?

⁸Ŋà tɛ̀ ŋ̀ele-kɔlɔŋ su, íkaa naa. Ŋá máŋ lí saa táa, íkaa naa.

⁹Ŋá máŋ koôŋ ŋá lí vóloi kulâi pere, kpaa máŋ ŋá lí kpɔ́ kwaa kôyaa ma vóloi liî pere,

¹⁰ya kɛ̂ naa íkɛ ńdeniŋ tɔ̀ɔ. Ya kɛ̂ naa íkɛ kpɔŋ mâa tɛ̀ɛ ḿbɔ.

¹¹Ŋa pɔ̂ri gbínii marê kɛ̂i a gɛɛ é ńoo, kpaa máŋ gwaa ponoɔɔi dínaŋɔ̂ɔi ḿâi é kɛ́ a kpíni,

¹²kɛ́lɛ, kpíni fé a kpíni í mɛni ma. Gbínii su ponoɔ̂ɔi nɔ́ yɛ̂ɛ ɣele lá ƃóɔɔ í maa mɛ̂ni ma. Kpíni da fólo díkaa nɔ́ a sɛŋ tɔ̂nɔ í maa mɛ̂ni ma.

¹³Yá ƃé ŋ́gbono kwaa kélee ma kpɛ̀tɛ. Tãi ńee è ḿaa kôo sìɣe lai, yá ƃé ḿbù gîe ma goo-ƃɔlɔŋ su.

¹⁴Ŋà ílaa maa tɛ̂i kpɛ́ni fêi í ŋ́gbɛ̀tɛ a mĩli-mĩli pere. M̀ɛnii ya gɛ̀i, gáa a núu tɛ̂i mɛni mĩli-mĩliɛɛ. Ŋá m̀ɛnii ŋí kélee kpɔ́ kɔ́lɔŋ a ǹɛ́lɛɛ.

¹⁵Tãi íkɛ̀ ŋ́gao kpɛtɛ̂i la ƃɛ́i núu da fa pɔ̂ri ǹaa kâai, Í íkpɔɔ tãi sìɣe íkɛ ḿbù gîe ma ńee kɔɔ-ƃɔlɔŋ su, tãi ŋá kɛ́ ƃɔlɔ̂i la naa nyii núu da fé gɔ́lɔŋ, íkɛ a gɔ́lɔŋɔɔ a gɛɛ ŋ́gaa naa.

¹⁶Í ŋ́gàa, dí lɛ́ɛ pâi ḿaa sɔlɔ ƃôi. Ŋá kɛ̀ ɣéniɛi kélee káa íyêei íkɔlɔi su dí tá kɔ́ɔ é lɛ́ɛ pâi pîlani.

¹⁷Óo Ɣâla, íkili-ŋa sîai tâmaai a sɛŋ fa pɔ̂ri ŋ̀á kâai.

¹⁸À kɛ̀ ŋà dílôno, da pâi kɛ̂i a dítamaa é tɛ́ɛ ŋaya ma. Ŋá máŋ ŋɛ́i lá ƃó, íkaa nɔ́ ŋ́gɔlɛ mâ.

¹⁹Óo Ɣâla, ŋa ŋ̀wɛ̂lii a gɛɛ í ŋ̀wana-lɔ̂ɔ-ƃelai páa. Ŋa ŋ̀wɛ̂li ǹúu paa-ƃelai dítee ḿbôlu.

²⁰Da kɛ̂ mɛni nyɔ́mɔɔ-ŋa kpɛtɛ̂i é pîlaŋ ḿâ, dí kɛ́ mɛni nyɔ́mɔɔ-ŋa ƃò é pîlaŋ yâ.

²¹Óo Yâwɛɛ, diai íƃɛlɛ kpɛɛ̂i dí koi, díƃɛlɛ kpɛɛ̂i ŋ́goi. Diai dítɔɔ̂i yái, díƃɛlɛ fé ŋ́goi.

²²Díƃɛlɛ kpɛɛ̂i ŋ́goi é tɛ́ɛ gɛ̂i ma. Díkaa a ŋ́gbɔara-ƃela.

²³Óo Ɣâla, ḿaa kpɛ́ɛ í ŋákili-ŋa sîai kɔ́lɔŋ, ńzu kɔ̂ɔŋ í ŋákili-ŋa sîai kɔ́lɔŋ.

²⁴Ḿaa kpɛ́ɛ í gáa à kɛ̀ ŋwana-lɔ̂ɔ káa ŋ́gbonôi, í ḿɛi káa wɔ́lɔ-wɔlɔ pere su.