Read Kpelle Wule-woo-ŋa 14 Bible Online

Wule-woo-ŋa 14 - Kpelle bible

Wule-woo-ŋa 14

¹Deeƃé ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni mai Diai dífa mɛni ŋá kaai, da mò dílii su dîyɛɛi, “Ɣâla fé ɣele ma.” Díkelee kpɔ́ díwôyai. Da mɛni nyɔ́mɔɔ maa pɔlɔ-pɔlɔɔ sii támaa kɛ̀. Ɣâla nîa mɛni kɛ́ nuu tɔnɔ kpîŋ fé dísama.

²Yâwɛɛ káa ɣâla-taa gɛ́ núu-kpune kàa ǹɔii ma ƃɛ́. A díkâai à kɛ̀ dí táreɛ̂i, kpaa máŋ díta a vɛ̀li tɔ̃yâ-pere su.

³Díkelee da kula Ɣâla ŋɔpere sãai ma, da wôya mɛni tee-tee pú díŋuŋ su. Ɣâla nîa mɛni kɛ́ nuu tɔnɔ kpîŋ fé dísama. Vé tí a dɔnɔ kpîŋ.

⁴Yâwɛɛ è m̀o ǹyɛɛi, “Táre da fé ǹûa ŋwana-lɔ̂ɔ-ŋai ŋí ŋuŋ su? Díƃoo ƃé m̀oɔɔ̂i? Da ŋánûai miî yɛ̂ɛ núu a kɛ̀ kpólo miî. Dífa wɔ́lɔ ḿvɛ̀li ńyãa, Yâwɛɛ a dɔnɔ kpîŋ.”

⁵Da pâi yaôi a zu kɛ́tɛ dímaa kɛ́ kpɛ̀liŋ, kpɛ́ni fêi, Ɣâla káa dɔ̃yâ-ƃelai kɔlɛ gɛ́ dímaa kɔ̃ɔ.

⁶Káai a zɔnyɔ̂ŋ-ƃelai ka gɛ̀ ǹii-maa yeŋ-ƃelai dí mɛni kpɛtɛɛ-ŋai kɛ́ too pôlu a zu kɛ́tɛ. Kɛ́lɛ Yâwɛɛ ƃà díŋuŋ ma ƃó-nuu.

⁷Ŋa Ɣâla fɛlîi a gɛ́ɛ Eezuɛ ŋɔƃálo-laai é kúla Zãiyɔŋ. Tãi Yâwɛɛ a pâi gɛ̂i la Eezuɛ-ƃelai dí kɛ́ ŋɔ́nɔ ƃûu ƃoi, dílii a pâi nɛ̃ɛ̂i.