Read Kpelle Wule-woo-ŋa 141 Bible Online

Wule-woo-ŋa 141 - Kpelle bible

Wule-woo-ŋa 141

¹Deeƃé ŋɔwulei Óo Yâwɛɛ, ŋa ítôli. Kpɔŋ ḿâ a maa félaa. Tãi ŋà ítòli lai, íwoli tɔ́ɔ ḿâ.

²Íyee sée ŋá ɣâla fɛli wooi mu yɛ̂ɛ kéreŋ-sɛŋ kúŋ nɛ̃ɛ nyii da dɛ̀ɛ ípɔ. Tɔɔ ŋà ńyee tɛ̀ ɣelêi, é kɛ́ yɛ̂ɛ zâlai da gùla yâ a ɣele wûlii.

³Óo Yâwɛɛ, ye ńa-gbɔ mɛi káa. Kɛ́ a ńa mɛi káa nuu.

⁴Gɛ́ a gɛ́ɛ ḿve ŋ́gili ŋá sìa a pere nyɔ́mɔɔ. Ífe nɛ̀ɛ naa kwa ŋ̀wana-lɔ̂ɔ-ƃela kú tûa-pere é kɛ́ tɔnɔ. Ífe nɛ̀ɛ naa ŋá kɛ́ a díkuu-ŋai su-ƃelai da.

⁵Tɔɔ ǹúu sã́a-ŋai dí ŋ́gula maa kɛ́, dí ńdeniŋ tɔ́ɔ a wɛli kɛ́ maa, kɛ́lɛ, ḿve pâi ńyee seêi ŋ̀wana-lɔ̂ɔ-ƃelai díƃaa-kɛ maai mu, kpɛ́ni fêi, ŋ́gaa nɔ́ wɔ́lɔ Ɣâla fɛlîi é pîlaŋ díŋwana-lɔ̂ɔ-tuai ma.

⁶Tãi dílaa túɛ-ƃalai da kulâi la gɔni yêei tôŋ su dítooi, da pâi ŋ́oo siɣêi a tɔ̃yâ.

⁷Yɛ̂ɛ berei tí núu a kɔi têe la é ḿela-ƃelai, bere ƃé díkao táa-taai la m̀olôŋ lá-ƃerei.

⁸Kɛ́lɛ, yái í káa a Ŋ̀wála-wâla kélee Yâwɛɛi, yá nɔ́ ƃé ŋ́gili tɔɔ̂i yâ. Ŋ́gili tɔɔ̂i ímaa kɔ̃ɔ laai ma. Ífe nɛ̀ɛ naa ŋá sáa.

⁹Ífe nɛ̀ɛ naa ŋá tóo m̀are-ŋai ŋá ŋ́gbɔara-ƃelai da dɛ́ ḿberêi.

¹⁰Tɔ́ɔ ŋ̀wana-lɔ̂ɔ-ƃelai dí kɔ́ a díkpɔɔi ƃare-ŋai, ŋ́gɛ tɛ̂ɛ ŋuŋ mâ ƃóɔɔ.