Read Kpelle Wule-woo-ŋa 142 Bible Online

Wule-woo-ŋa 142 - Kpelle bible

Wule-woo-ŋa 142

¹Deeƃé ŋɔwulei è bɔ̃yɛ a tãi è kɛ̀ la gɔni-woloi sui. Ɣâla fɛli woo Ŋá Yâwɛɛ tòli a gɛɛ é kpɔŋ ḿâ. Ŋá pɛ̀lɛ a gɔ́ɔ.

²Ŋá ŋámɛni-ŋai kélee kpɔ́ pù ŋ̀ɛ́i. Ŋá ŋámɛni kpɔ̂lu-ŋai kélee ƃò m̀a.

³Tãi ŋámɔ̃leŋ fíi a kɛ̂ kpɛɛ̂i lai, ǹyaa ƃé m̀ɛnii kɔ́lɔŋ a pɔ̂ri gɛ̂i. Berei nyii ŋa tɛ̂ɛ lai, ŋ́gbɔara-ƃelai da ƃáre tɛ̀ naa lòo-pere su ḿɛni ma.

⁴Tãi ŋà ŋ́gɔlɛ mâ kàa lai, ḿva núu da kàa a gɛɛ é kpɔ́ŋ ḿâ. Núu da fé naa a gɛɛ é ḿaa kɔ̃ɔ. Núu da fé kpáaŋ ní a ḿaa mɛ̂ni.

⁵Yâwɛɛ, ŋa wɔ̂lɔi yâ kpɔŋ mâ mɛni ma. Yâwɛɛ, yá nɔ́ ƃé íkaa a ḿaa kɔ̃ɔ-nuu. Yá nɔ́ ƃé ŋa íwɛ̂lii ŋáfulu-laai su.

⁶Íwoli tɔ́ɔ ŋ́wɔlɔ-woo ma, ńii a too pôlu a ŋánaa. Ŋ́uŋ mâ ƃó í ŋ́gula ŋ́gbɔara-ƃelai yêei, díwala-walaai é tɛ́ɛ ḿâ.

⁷Ŋ́uŋ mâ ƃó í ŋ́gula ŋá lii-too pôlui su. À kɛ̀ tí, ŋa pâi ílaa maa tɛ̂i ínûai sáma gbɔŋ kɛ́tɛi su, ítûa-pere lɛ́lɛɛi mɛni ma.