Read Kpelle Wule-woo-ŋa 17 Bible Online

Wule-woo-ŋa 17 - Kpelle bible

Wule-woo-ŋa 17

¹Deeƃé ŋɔɣâla fɛli-wooi Óo Yâwɛɛ, íwoli tɔ́ɔ ŋatɔ̃yâ làa wɔlɔ-wooi ma. Íwoli tɔ́ɔ ŋá Ɣâla fɛli-wooi ma nyii ve kulâi núu pɛlɛ-nuu lái.

²Ŋámɛnii ŋá tée í nɛ́ a gɛɛ ńzɔŋ fé zu, kpɛ́ni fêi, í dɔ̃yâi kɔ́lɔŋ.

³Í m̀ɛnii kélee kɔ́lɔŋ gáa ńii sui. Yà pà ḿbɔ a kpíni, yà ḿaa kpɛ̂ɛ, ífe pâi mɛni nyɔ́mɔɔ kélee da kâai ŋ́gbonôi. Wóo nyɔ́mɔɔ kélee da fa kûla ńa,

⁴yɛ̂ɛ ǹúu kpéli-ŋai. Ŋ́gaa kpɔ́ nɔ́ ítɔ̂ŋ-ŋai pôlu. Fa kânaŋ núu ŋɛi-maa-nɛ̃ɛ nuu da ma.

⁵Yá nɔ́ ƃé ŋ́gaa wɔ́lɔ ípôlu, ǹyaŋ fé pâi wɔ́lɔ tálanîi.

⁶Óo Ɣâla, ŋa ítòli ya ŋ́oo su-too. M̀ɛni ma, tínaŋ ḿbɔ naa pere í ŋ́oo mɛ́ni.

⁷Ŋ́uŋ ma ƃó a íwɔlɔ-wɔlɔ wɛli kɛ-maai. Yá ƃé ya diai ŋuŋ ma ƃò da pâ ípɔ naa a gɛɛ í díŋuŋ ma ƃó, í díkula díkpɔara-ƃelai yêei.

⁸M̀ɛi káa yɛ̂ɛ berei ya í ŋɛ́i-gao mɛi kâa lai. Gɛ́ ŋá kɛ́ íkoôŋ mu, íkɛ ḿaa kɔ̃ɔ,

⁹a gɛɛ ŋ̀wana-lɔ̂ɔ-ƃelai díwala-walai fé tɛ̀ɛ ḿâ. Díkaa a ḿaa kpɔara-ƃela nyɔ́mɔɔ-ŋa dítinaŋɔ̂ɔi ḿâi.

¹⁰Maloŋ-kaa fé díyêei núu da kélee mɛni ma. Da lôno a yoŋka-pere.

¹¹Dí tínaŋɔ̂i ḿâ ƃɛ́i kélee ŋa lî naai. Dí káa ḿaa kpɛɛ̂i a tãi kélee a gɛɛ dí ńzoŋ í ńdoo.

¹²Díkaa yɛ̂ɛ yala-sulu kpéyɛɛ-ŋa ƃé díŋa tɛɛ̂i a gɛɛ dí sua-ŋa soŋ.

¹³Óo Yâwɛɛ, ímu-siɣe í pɛ́lɛ dîa í díyee mɛi ɣále. Ŋ́gula ŋ̀wana-lɔ̂ɔ-ƃelai yêei a í ƃóa sɔkpɔi.

¹⁴Óo Yâwɛɛ, ŋ́gula ŋ̀éniɛi su-ƃela nyɔ́mɔɔ-ŋai yêei. Dínîa mɛni nɔ́ ƃa ŋ̀éniɛi su sãai maa mɛni. Mɛni kula maai yâ gbɛ̀tɛ dímɛni mai, gɛ́ a dia. Gɛ́ a dínîa-pɛlɛɛi, da díwɔ-ǹîa-pɛlɛɛi.

¹⁵À kɛ̀ a ńyãa, ŋa pâi kɛ̂i íŋɛi-tuɛ a teniŋ-ƃo pere. Ŋa ŋ́ɛi lá ƃò, lii-nɛ̃ɛ a pâi kɛ̂i ḿâ, kpɛ́ni fêi, ŋ́gaa íkɔlɛ ma.