Read Kpelle Wule-woo-ŋa 33 Bible Online

Wule-woo-ŋa 33 - Kpelle bible

Wule-woo-ŋa 33

¹Káai kélee a Yâwɛɛ ŋɔnûai, ka koi-nɛ̃ɛ kula ɣelêi pere gɛ́ mɛ̂ni lɛ́lɛɛ-ŋai mɛni ma. Káai kélee ka Yâwɛɛ wóo mɛnii, ka ǹáa maa tɛ́.

²Ka sɛɣɛ-fei tɛ̀ɛ Yâwɛɛ pɔ́ a kɔnîŋ-woo. Ka kɔnîŋ ɣale mà a lii-nɛ̃ɛ-pere.

³Ka wule nina too mà. Ka kɔnîŋ ɣale mà a ǹɛ́lɛɛ ká wule tóo a ɣelêi-pere.

⁴Yâwɛɛ wóo-ŋai kélee káa a tɔ̃yâ woo-ŋa. Núu a pɔ̂ri gíli tɔɔ̂i gɛ́ mɛ̂ni-ŋai dîa.

⁵È wɛ́lini a teniŋ ƃô da tɔ̃yâ mɛni-ŋa. Ŋɔwɛli kɛ́ maa kpanaŋɔɔi a ǹɔii láa fɛ́ɛ.

⁶Yâwɛɛ è ŋ̀ele-kɔlɔŋ-ŋai kpɛ̂tɛ a ŋ̀óo, da dísu sãa kélee, vóloi, ŋ̀áloŋ da bɛ́mɛlɛŋ kao-ŋai.

⁷È ǹyúo-ŋai kélee ŋáa tɛ̀ gîe ma kwaa tɔ̂nɔ ma, é gao ma kɛ́ a sãa pûi kɛ̂i.

⁸Káai kélee ǹɔii ma ƃɛ́i, ka Yâwɛɛ fɛli, ka ŋumɛ mâa tɛɛ bɔ́.

⁹È ŋ̀éniɛi kpɛ̀tɛ a ŋ̀óo. È lòno, ǹyaŋ m̀ɛni-ŋai kélee è m̀oi, ŋ̀aa-see è kɛ̀.

¹⁰Yâwɛɛ a ǹɔii-ŋûŋ-ŋai su-ƃelai kíli ŋá pù. M̀ɛni nyɔ́mɔɔ-ŋai kélee da gbɛtɛi, ŋaa see fa kɛ̂ a dɔnɔ kpîŋ.

¹¹Yâwɛɛ kpɛtɛ mɛ̂ni da fa fɛ̂ɣɛ. Ŋɔmɛni kpɛtɛɛ-ŋai káa nɔ́ naa wɔ́lɔ-wɔlɔ da wɔlɔ-wɔlɔ.

¹²Lûwa káa diai dîa Díɣâlai ƃa Yâwɛɛi. Lûwa káa diai dîa Yâwɛɛ a ǹyée sée dímu a ŋɔnûai.

¹³Yâwɛɛ káa Ɣâla-taa gɛ́ núu-kpune kàa. A núu-kpune kélee maa kpɛɛ̂i.

¹⁴Ƃɛ́i kélee ŋɔwála-walai káa naa mɛi, a naa mɛi kâai, gɛ́ núu kélee maa kpɛ̂ɛ ǹɔii ma.

¹⁵È díkili ŋa sîai kélee kɔ́lɔŋ, gɛ́ ƃò a díkɛ mɛni-ŋai kélee kɔ́lɔŋɔɔ.

¹⁶Kâloŋ maa kpɛ́-ƃela dia tɔ̂nɔ dífa pɔ̂ri ŋ̀uŋ ma ƃôi. Kɔkuluƃa ŋɔkponoi kpânaŋ ŋánaa ǹyaa tɔ̂nɔ fa pɔ̂ri gulâi gbɔara-ƃelai yêei.

¹⁷Kɔ́ kɔ́-soo-ŋa dífe a sɛŋ núu é gíli tɔ́ɔ dîa kɔ́ su. Dia tɔ̂nɔ díwala-walai fa pɔ̂ri gɛ̂i núu é m̀arâai yée mɛi ɣále kɔ́ su.

¹⁸Yâwɛɛ a diai mɛi kâa da ŋ̀óo mɛnii. A diai mɛi kâa dílâai a ŋɔwɛli kɛ́-maa kpanaŋɔɔi maa mɛ̂nii.

¹⁹A díkùla saa wôlo lá, é gɛ́ puru fa dípâa.

²⁰Kwa kúkili kɛ́ Yâwɛɛ ma. Ǹyaa ƃa kúmaa kɔ̃ɔ, gɛ́ kpɔŋ mâa tɛ̀ɛ kúpɔ yɛ̂ɛ kɔ-kuluƃa maa kɔ̃ɔ kɔli-kalaŋ.

²¹Kúlii nɛ̃ɛ̂i m̀ɛni ma, kpɛ́ni fêi, kú lâai a ŋɔláa maa waai maa mɛ̂ni.

²²Yâwɛɛ, lûwa láa kûa íwɛli kɛ́ maa kpanaŋɔɔi sârai, yɛ̂ɛ berei kwa kúkili tɔ̀ɔ la yâi.