Read Kpelle Wule-woo-ŋa 44 Bible Online

Wule-woo-ŋa 44 - Kpelle bible

Wule-woo-ŋa 44

¹Kora ǹônii-sinaai díwulei nyii dí bɔ̃yɛ ŋ̀ule too-ƃelai láa túɛ-nuui mɛni mai Óo Ɣâla, m̀ɛni-ŋai ya gɛ̂i, kúa kpîŋ kwa mɛni a kúkpîŋ woli. Kúnâŋ pɔlɔ-ni dí m̀ɛni kpaya-kpayai mɛni ƃò kûa í gɛ̀, tãi su kôyaa tɛɛ pôlu mai.

²Dí m̀o kûa berei diai dífe láa ní a ímaa mɛ̂nii, í díkpɛ̀ la ǹɔii ma, í dɛ́ɛ ínûai pɔ́i. Kú m̀ɛni berei í lɔii-ŋuŋ-ŋa su-ƃela kula maa kɛ̀ la, da berei í lûwa làa la ínûai dîa a gɛɛ dí ƃûu ƃói.

³Ínûai dífe ǹɔii su-ƃelai yée mɛi ɣále ní a díƃoa-sɔkpɔ-ŋai, kpaa máŋ díkpîŋ wala-wala-laai. Kɛ́lɛ yá ƃé gɛ̀ a íwala-wala-laai da íkɛ naa-laai. Íkɛ naai maa laa laai è ǹɛ a gɛɛ í díwɛlini.

⁴Yá ƃa ŋákâloŋ da Ŋáɣâlai. Yá ƃa gɛ̀ ínûai dí kɛ́ díkpɔara-ƃelai yée mɛi ɣâle.

⁵Íwala-wala-laai ƃa gɛ̀ kúkɛ kúkpɔara-ƃelai yée mɛi ɣâle.

⁶Fé láa ní a ŋátɔ̃ai, kpaa máŋ ŋáƃoa-sɔkpɔi ŋ́uŋ ma ƃó mɛ̂ni ma.

⁷Kɛ́lɛ ya kúŋuŋ ma ƃó kúkpɔara-ƃelai yêei, diai dítɔɔ̂i kûai í díyee mɛi ɣále.

⁸Kwa yoŋka tèe a ímaa mɛ̂ni a ɣele kélee, kúyee séɛɛ m̀ɛni lɛ́lɛɛi mu ya gɛ́ kûɛ a ɣele kéleei.

⁹Kɛ́lɛ gáa, ya íyee kúla kúmù, ya gɛ́ kúkpɔara-ƃelai da kúyee mɛi ɣále. Ífe ŋɔ́nɔ kɔ̂i kúmɛni ma.

¹⁰Ya gɛ́ kwa pú kúkpɔara-ƃelai yêei, da kúkɔ̃liŋ kélee síɣe da lí a dia.

¹¹Ya gɛ́ nûa díkɛ kúpàa yɛ̂ɛ ƃála-ŋa. Kwa táa-tàa lɔii-ŋuŋ da kpɛ́ni-ŋa su.

¹²Ya íkpɔɔi nuai kɔlɛ̂i a dísɔ̃ɔ kuro-te yɛ̂ɛ ǹyaa ƃé dímɛni fé kpanaŋ ní, ǹyaŋ ífe gêni da sɔlɔ ƃôi zu.

¹³Kúkɔlɛ ma-ƃelai da m̀ɛnii kâai ya gɛ̂i a kúai, díkɛ ɣɛ́lɛ maa kùla kúkponôi.

¹⁴Ya gɛ́ kwa kɛ́ nɔ́ a ɣɛ́lɛ maa sɛŋ ǹɔii-ŋuŋ da kpɛ́ni-ŋa su-ƃelai yêei. Da kɛ́ tɛɛ̂i, díkɛ díŋuŋ kpɛ̂mɛŋ a kúa.

¹⁵Ƃaa kûla maa sɛ̂lɛŋɔɔi ḿâ, ŋumɛ kpɛ́ɛ pôlu a ḿbaa.

¹⁶Nûa da kpɛ́ni-ŋa da kɛ́ ɣɛ̂lɛi ḿâ díkɛ dísĩa mìi a ńyãa, da kɛ̀ ŋ́gbɔara-ƃelai kâai díyee kɛ́ tɛɛ ḿâ.

¹⁷M̀ɛni-ŋai ŋí kélee da kɛ̂i a kûa, berei máŋ kúfe niâi la yâ, kpaa máŋ kú gbanaŋ-wooi ɣále nyii gáa kwa kâa ni kúloai.

¹⁸Kúfe niî kúpôlu fé ní yɛ̂, kpaa máŋ kú kúyee kúla ítɔ̂ŋ-ŋai mu.

¹⁹Ǹyaa ká ŋí yâa gɛ́ kɔlɔ a kpɛɛ kûa kwa lɛɛ fɛnɛ-sãa sáma, ya kú lɛ́ɛ kpíni su pîlaŋɔɔ su.

²⁰À kɛ̀ kwa kpera Kúɣâlai fɛlîi, kúkɛ lɔii-ŋuŋ da kpɛ́ni-ŋa su-ƃela díkpɛtɛ ɣâla-ŋa fɛ̂li,

²¹gɛ̀ nî ya gɔ́lɔŋ, kpɛ́ni fêi, í kúlii su mɛni kélee kɔ́lɔŋ.

²²Kɛ́lɛ ímaa mɛ̂ni ƃé nûa da kútama ɣele kúpaâi la a kpíni da fólo, díkɛ kúta-ŋa sòŋ a ǹyɔ́mɔɔ yɛ̂ɛ ƃála-ŋa ƃé da pá dípaâi.

²³Ǹuu-namui, ímu-siɣe, ífe ǹyii. Ya nyiî lé mɛni ma? Ímu-siɣe. Ífe íyee kùla kúmù wɔ́lɔ-wɔlɔ da wɔ́lɔ-wɔlɔ.

²⁴Ya íŋɛi loôi kûa lé mɛni ma? Ífe nìa kúmɔ̃lɛ-laai da kúmɛni kpɔ̂lui ma.

²⁵Kwa too kpɔ́ ǹɔii ma kpala-ɣala, kúkɛ ƃò lâani m̀uluŋ su.

²⁶Pá í kpɔ́ŋ kûa, í kúŋuŋ ma ƃó íwɛli kɛ́-maai sârai.