Read Kpelle Wule-woo-ŋa 45 Bible Online

Wule-woo-ŋa 45 - Kpelle bible

Wule-woo-ŋa 45

¹Ŋ̀wɛli kɛ́-maa wulei Kora ǹônii-sinaai dí bɔ̃yɛ ŋ̀ule too-ƃelai láa túɛ-nuui mɛni mai Wóo lɛ́lɛɛ-ŋa da ńii láa fɛ̂ɛ, ŋa kɛ̀ wule toôi gâloŋ ma. Berei kpɔ́ nɔ́ kɔlɔ pɔ̃yɛ-nuu a kɔlɔ-kpáu sìɣe la gbɛtɛɛ kɔlɔ pɔ̃yɛ mɛni mai, bere nɔ́ ƃé ŋ́gbîŋ kpɛtɛ̂ɛi la ŋ̀ulei ŋí too mɛ̂ni ma.

²Yá ƃa zurɔ̂ŋ lɛ́lɛɛi ŋ̀éniɛi su sinaai kélee sáma. Ya lôno a zu ponoɔɔ. M̀ɛni ma, Ɣâla a lûwa láa yâ wɔ́lɔ-wɔlɔ da wɔ́lɔ-wɔlɔ.

³Íƃoa-sɔkpɔi tóo íleɣei, gâloŋ wála-walaai. Ímu wuyɛ̂ɛi, ƃaa kɛ́-maa kɛ́ ƃò yâ.

⁴Ímu-siɣe ímu wûyɛ-laai su í kɔ́ yée mɛi ɣále tɔ̃yâ-laa da teniŋ ƃô-laa maa kɔ̃ɔ mɛni ma. Ya pâi lɔii ŋuŋ láa túɛ-ƃela wála-wala-ŋa dámaa yée mɛi ɣâlei a íwala-walai.

⁵Ítɔ̃a-ŋai ŋá séniɛɛ̂i. Ya pâi íkpɔara-ƃelai ƃônii la é seri dílii gbɛ̃ ma é ƃɔ́ zu. Lɔii-ŋuŋ támaa da pâi toôi íkɔɔ mu.

⁶Gâloŋ-laai Ɣâla a dɛɛ ípɔi, gɔyɛŋ fé ma. Ya ínûai mɛi kâai a teniŋ ƃô-pere.

⁷Í tɔ̃yâ mɛni wɛ́lini. Ífe wɛ́lini a mɛni nyɔ́mɔɔ kélee da. Sâpoi ŋí ƃé Ɣâla nyii gáa a Íɣâlai a ísiɣe la, a íkɛ a kâloŋ, a ísee. Kâloŋ da fé seri ní ípɔ.

⁸Wúru-ya kúŋ nɛ̃ɛ puɔɔ̂i íseɣei ma gwaa kélee. Ípɛrɛi mu kpɛtɛɛ̂i a séle nyîŋ-ŋa, wule too-ƃela díkɛ kɔnîŋ ɣàle yâ, ílii láa.

⁹Kâloŋ-lonii nɛyaa díkaa ǹɛyâai sáma nyii-ŋai ƃaa kɛ́-maa kɛ́tɛ káa dîa íkâloŋ-laai sui. Ípɛrɛ-leei káa tɔɔni ílaa mii yee mɛi pere, m̀aa ɣiriɛɛ a gôo maa ɣiri-sãa.

¹⁰Yái gâloŋ a gbɛ̀tɛ a gɛɛ é íkula a nɛnîi, íwoli tɔ́ɔ m̀ɛnii ma ŋa pá m̀ôi yâi. Nia ínûai dîa da íkaa-laai su-ƃelai kpéle-ŋai.

¹¹Ílɛlɛ pere a pâi gɛ̂i gâloŋ é íwɛli. Ǹyaa ƃa ínuu-namui, fɛ̂ɛ í ŋ̀óo mɛni.

¹²Taya taa-leei su-ƃelai da pâi pâi a sama sãa ípɔ. Dɔɔ-ƃela kpaya-kpayai da pâi pâi a dítɔɔ-sãa sɔ̃ɔ kpanaŋɔɔ-ŋai zîi támaa ípɔ a gɛɛ dí ílii kúla.

¹³Gâloŋ ǹóŋ-nɛnii káa gâloŋ-pɛrɛi mu maa ɣiriɛɛi kpɔ́ a ǹɛ̂lɛɛ. Zeɣei gáa m̀ai, balâai a gôo yee-karo.

¹⁴Ŋɔyokpoi pɔ̃yɛ lɛ̂lɛɛi. M̀arâŋ nɛni-kpela-ŋai da tɔɔni bôlu pere, díkɛ pà gâloŋ pɔ́ naa pere.

¹⁵Dílii nɛ̃ɛ̂i díkɛ koi-nɛ̃ɛ kùla, díkɛ lɔ̀ gâloŋ pɛrɛi mu.

¹⁶Yá ƃa ŋákâloŋ. Ya pâi lônii-sinaa támaa maa sɔlɔ ƃôi. Da pâi kâloŋ-laa kɛ̂i nɔ́ yɛ̂ɛ dínûa pɔlɔ-ŋai. Ya pâi díkɛ̂i a nûa láa túɛ-ƃela ŋ̀éniɛi gwaa kélee ma.

¹⁷Ŋa pâi gɛ̂i ŋ̀éniɛi su-ƃelai kélee díkɛ ƃaa kɛ́-maa tɛɛ ípɔ. Da pâi kɛ̂i ílaa ma tɛ̂i wɔ́lɔ-wɔlɔ da wɔ́lɔ-wɔlɔ.