Read Kpelle Wule-woo-ŋa 5 Bible Online

Wule-woo-ŋa 5 - Kpelle bible

Wule-woo-ŋa 5

¹Deeƃé ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni ma a gɛɛ díkɛ dòo a ƃɔ̀ɔ fɛ́ɛ-wooi Yâwɛɛ, íwoli tɔ́ɔ ŋáfɛli-wooi ma í zu too. Íwoli tɔ́ɔ ńyiɣɛ-wooi ma.

²Íwoli tɔ́ɔ ŋáfɛli-wooi ma, Ŋákâloŋ da Ŋáɣâlai. Ŋa ífɛlîi, óo Yâwɛɛ.

³Ya ŋ́oo mɛ̀ni a ɣele-wala. Ŋa sâla kùla a ɣele-wala, ŋá ímaa kpɛ́ŋ zu-too-mɛni ma.

⁴Íkaa a Ɣâla nyíi vé ŋwana-lɔ̂ɔ-tua wɛ́linii. Ŋwana-lɔ̂ɔ nuu da ƃɛlɛ fé íkoi.

⁵Yoŋka-nuu da fé pâi pɔrîi tɔɔ̂i íŋɛi. Ŋwana-lɔ̂ɔ-ƃela da ƃɛlɛ fé íkoi.

⁶Yâ ǹɛ́ɛ-ƃelai su-kara. Ífe wɛ́lini a núu paa-ƃela da núu pɛlɛ-ƃela.

⁷Kɛ́lɛ íwɔlɔ-wɔlɔ wɛli-kɛ-maai sarâi, ŋa pâi kɛ̂i a ípɛrɛi mu nuui da. Ŋa pâi kɛ̂i ífɛlîi ípɛrɛ maa waai ŋɛ́i-tuɛ. Ŋa pâi pîlanii ŋ́ume ŋá, ŋá ƃaa kɛ́-maa tɛ́ɛ ípɔ.

⁸Yâwɛɛ, ńdeniŋ tɔ́ɔ a ítɔ̃yâ tua-perei, kpɛ́ni fêi, ŋ́gbɔara-ƃelai tâmaai. Ítûa-perei su sã́a ḿberêi a gɛɛ ŋá sía zu.

⁹Tɔ̃yâ da kélee fé ŋ́gbɔara-ƃelai da kponôi. Mɛni su-kara mɛni nɔ́ ƃé gáa dílii su. Díkɔŋ su-wolo káa yɛ̂ɛ ƃolôŋ lá-ƃoɔɔ. Díwoo nɛ̃ɛ̂i núu wôlii, kɛ́lɛ gáa a núu pɛ́lɛ-woo da núu su-kara woo-ŋa.

¹⁰Óo Ɣâla, dímɛnii ŋá tée, í dísu-kara. Ǹɛɛ naa dí kɔ́ a díkpɔɔi ƃare-ŋai. Díkpɛ íŋɛi-tuɛ, kpɛ́ni fêi, díkaa a sɔnyɔ̂ŋ-ƃela. Dítɔɔ̂i yâ.

¹¹Kɛ́lɛ tɔɔ diai da pâ ípɔ ŋuŋ ma ƃo mɛni mai dí lii-nɛ̃ɛ kula. Ǹɛɛ naa dí lii-nɛ̃ɛ wule-ŋa too yâ. Diai íwɛlinii, dí maa kɔ̃ɔ. Da pâi lii-nɛ̃ɛ kulâi ísârai.

¹²Yâwɛɛ, yá ƃa lûwa làa dɔ̃yâ-ƃelai dîa. Ya ƃa dímalôŋ kàa í dímaa kɔ̃ɔ.