Read Kpelle Wule-woo-ŋa 50 Bible Online

Wule-woo-ŋa 50 - Kpelle bible

Wule-woo-ŋa 50

¹Asafa ŋɔwulei Ŋ̀wála-wâla kélee Ɣâlai, Yâwɛɛ è lono. È ŋ̀éniɛi su-ƃelai kélee tòli é síɣe vóloi kulâi pere é tóo vóloi liî-pere.

²Ɣâla ŋɔfólo-laa kɛ́tɛi è kùla Zãiyɔŋ, nyii gáa a daa-lee kɛ́tɛi nyii maa-waai ŋɔlɛ́lɛ laai sui.

³Kúɣâlai fé m̀ɛi saa ní gɛ́ pà. Ŋɔŋ sôŋ kɛ́tɛ káa dúɛ gɛ́ pà. Fãa kɛ́tɛ tínaŋɔ̂ɔi m̀a.

⁴È ŋ̀elei da ǹɔii tôli a gɛɛ díkɛ a ŋɔsêre-ŋa, díkɛ gàa gɛ́ ŋɔnûai dímɛnii ŋá tèe.

⁵Ɣâla è m̀o ǹyɛɛ, “Tɔɔ ŋáteniŋ ƃô-ƃelai dípa ŋɛ́i-tuɛ, diai nyii-ŋai kpanaŋ-woo kɛ̀ ǹyêei a sâla kuláa ḿîi.”

⁶Ŋ̀ele-kɔlɔŋ è m̀o a gɛɛ Ɣâla téniŋ ƃôɔɔi, kpɛ́ni-fei, ǹyaa kpîŋ gáa a mɛni sâa ƃó-nuu.

⁷Ɣâla è mò ǹyɛɛi, “Ŋánûa, ka káwoli tɔ́ɔ. Ŋa pâi lônoi, ŋá ká mɛni nyɔ́mɔɔi lɛ́ kâa, káai a Eezuɛ-ƃelai. Ńyãa ƃa Ɣâla, nyii gáa a Káɣâlai.

⁸Ḿve kákùla maa kɛ́ ní kásâla-ŋai mɛ̂ni ma, da géreŋ-sala-ŋai ká pá la ḿbɔ a tài kélee ḿɛ̂ni ma.

⁹Ḿve niŋa sîrɛ da wɛ̂lii nyii-ŋai díkaa kákpâlaŋ ŋái, kpaa máŋ m̀oli sîrɛ ŋai díkaa kákpâlaŋ ŋái.

¹⁰Vɛnɛ-sãai díkaa ǹɔii sui, díkelee díkaa a ḿbɔɔ. Ǹiŋa-ŋai díkaa ǹyée wála tɔnɔi (1,000) mai, díkaa a ḿbɔɔ.

¹¹Ŋ̀ɔni-ŋai kélee káa a ḿbɔɔ, da vúlu-sãai kélee díkaa ǹɔɔi sui.

¹²“Eêi kɛ̀ puru kɛ́ ŋ́gɛ̀, ḿvêe kámarê kɛ̀ díta maa mɛ̂ni mà, kpɛ́ni-fei, ŋ̀éniɛi da zu-sãa kélee káa a ḿbɔɔ.

¹³Ḿva niŋa sîrɛ-ŋa sua mîi, kpaa máŋ ŋá ƃoli-ŋa ŋãa kpéle?

¹⁴Ka sɛɣɛ-fei tɛ̀ɛ ḿbɔ a kásâla sama-sãai ḿɛ̂ni ma. Ká zãai nyii kélee ká kákono-tee lai, tɛ́ɛ ḿbɔ ńyãai a Ŋ̀âla Kɛ́tɛi.

¹⁵Tãi kélee ka kɛ̂ la mɛni kpɔ̂lu sui, ka ńdoli. Ŋa pâi ká ŋuŋ maa ƃôi. À kɛ̀ tí, ka pâi ńaa maa tɛ̂i.”

¹⁶Kɛ́lɛ Ɣâla è m̀o ŋ̀wana-lɔ̂ɔ-ƃelai dîa ńyɛɛ, “Lé mɛni ƃé ka ŋátɔ̂ŋ-ŋai ƃôi la kákili ŋái? Lé mɛni ƃé ká lônoi la gɛ́ pìlaŋ ŋá kpanaŋ-wooi mai?

¹⁷Káfe fáa ní mà a gɛɛ ŋá káteniŋ tɔɔ. Ká káyee kúla ŋ́oo mù.

¹⁸Ŋúma-nuu nyii kélee ká gàai, ká gɛ̀ a kálâwoi, ká kákpîŋ kɛ́ a wulu-wulu kɛ́-ƃela díƃarâa.

¹⁹“Kákpîŋ kpɛtɛ̂ɛi nɔ́ a gɛɛ ká lóno nyɔ́mɔɔ-ŋa kɛ́. Kafa tãi sìɣe a gɛɛ kálɛɛ kɛ́.

²⁰Ká kpîŋ kpɛtɛ̂ɛi a gɛɛ ká mɛni lɛ́ɛ kákayɔɔ-ŋai dîa, kákɛ dísɔŋ kɔ̂ri dîa.

²¹Ka m̀ɛni-ŋai ŋí kélee kɛ̀, kɛ́lɛ ḿve nîi mɛni da kɛ́ ní zu. M̀ɛni ma ká kɛ̀ gâai yɛ̂ɛ sɛŋ ƃé ŋ́gaa yɛ̂ɛ káa. Kɛ́lɛ ŋa pâi nâa kákula maa kɛ̂i, ŋá m̀ɛnii-ŋa lɛ́ kpɔ́ kâa a zu-ponoɔɔ.

²²“Kâai káfa káwoli tɔ̀ɔ ḿâi, ka nyíŋi mɛ́ni. À wàla kɛ́ tí, ŋa pâi ká su karâi, ǹyaŋ núu da fé pâi kɛ̂i naa é ká kula yêei kɛ́.

²³Sɛɣɛ-fei tɛ̂ɛ ƃé gáa a zãâi nyii a ƃaa-kɛ ma tɛ̂ɛ ḿbɔ. Tɔ̃yâ ma ŋa pâi diai kélee da díwoli tɔ̂ɔ ḿâi ŋuŋ-ma ƃoi.”