Read Kpelle Wule-woo-ŋa 52 Bible Online

Wule-woo-ŋa 52 - Kpelle bible

Wule-woo-ŋa 52

¹Deeƃé ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni ma a tãi Idɔŋ-nuui Doɛɛ è mò la Sɔɔ ma a gɛɛ Deeƃé a lí Abimelɛ pɔnaai Lé mɛni ƃé ya íkpîŋ kɛ̂tɛi la, yá ŋwana-lɔ̂ɔ-nuui ŋí? Ɣâla ŋɔteniŋ ƃô laai kaa wɔ́lɔ naa.

²Ya mɛni kpɛ̂tɛ a gɛɛ í íƃarâai su-kara. Ínɛŋ ŋáliɛɛi yɛ̂ɛ ŋuŋ-ƃo kɔli. Íkaa nɔ́ lɛ́ɛ mɛni kpɛtɛ̂i a tãi kélee.

³Í mɛni nyɔ́mɔɔ wɛ̂li-ni é tɛ́ɛ mɛni lɛ́lɛɛ ma. Í lɛ́ɛ wɛ̂li-ni é tɛ́ɛ tɔ̃yâ ma.

⁴Yá ŋ̀wɛli nɔ́ a gɛɛ í íƃarâai su-kara a íwoo, yá lɛ̀ɛ-nuui tí.

⁵M̀ɛni ma Ɣâla a pâi wɔ́lɔ kɛ̂i nɔ́ ímaa yenîi. A pâi ísonîi é íkula ípɛrɛi mu. A pâi íƃulenîi é íkula vúlu-ƃelai dílɔii su.

⁶Deniŋ ƃô-ƃelai da pâi ǹaa kâai dí yao. Gɛ̀ ní da pâi ɣɛ̂lɛi yâ dí m̀o dîyɛɛi,

⁷“Ka ƃɛ́ káa, núu da ká ŋí nyii vé gíli tɔɔ ní Ɣâla ma a gɛɛ é m̀álo. Kɛ́lɛ, è gíli tɔ̀ɔ nɔ́ ŋɔtɔɔ-sãai dîa, gɛ́ ŋɔŋuŋ-ma ƃôi kɔ̂ri ŋɔŋwana-lɔ̂ɔ-tuai su.”

⁸Kɛ́lɛ, ŋ́gaa nɔ́ yɛ̂ɛ ɔle-wuru nyii gáa ƃɔlɔ̂i Ɣâla ŋɔpɛ́rɛi mui. Ńâai a ŋɔwɛli-kɛ-maa kpanaŋɔɔi wɔ́lɔ-wɔlɔ da wɔlɔ-wɔlɔ.

⁹Ɣâla, ŋa pâi wɔ́lɔ kɛ̂i nɔ́ ísɛɣɛi fêi m̀ɛnii ya gɛ̂i ḿɛ̂ni ma ínûai ŋɛ́i-tuɛ. Ŋa pâi môi a gɛɛ ítûa-pere lɛ̂lɛɛi.