Read Kpelle Wule-woo-ŋa 53 Bible Online

Wule-woo-ŋa 53 - Kpelle bible

Wule-woo-ŋa 53

¹Deeƃé ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni mai Diai dífa mɛni ŋá kaai, da mò dílii su dîyɛɛi, “Ɣâla fé ɣele ma.” Díkelee kpɔ́ díwôyai. Da mɛni nyɔ́mɔɔ maa pɔlɔ-pɔlɔɔ sii támaa kɛ̀. Ɣâla nîa mɛni kɛ́ nuu tɔnɔ kpîŋ fé dísama.

²Ɣâla káa ɣâla-taa gɛ́ núu-kpune kàa ǹɔii ma ƃɛ́. A díkâai à kɛ̀ dí táreɛ̂i, kpaa máŋ díta a vɛ̀li tɔ̃yâ-pere su.

³Díkelee da kula Ɣâla ŋɔpere sãai ma, da wôya mɛni tee-tee pú díŋuŋ su. Ɣâla nîa mɛni kɛ́ nuu tɔnɔ kpîŋ fé dísama. Vé tí a dɔnɔ kpîŋ.

⁴Ɣâla è m̀o ǹyɛɛi, “Táre da fé ǹûa ŋwana-lɔ̂ɔ-ŋai ŋí ŋuŋ su? Díƃoo ƃé m̀oɔɔ̂i? Da ŋánûai miî yɛ̂ɛ núu a kɛ̀ kpólo miî. Dífa wɔ́lɔ ḿvɛ̀li ńyãa, Ɣâla a dɔnɔ kpîŋ.”

⁵Kɛ́lɛ, da pâi yaôi, yɛ̂ɛ berei kpɔ́ dífe ta yao ní lai, kpɛ́ni fêi, Ɣâla a pâi ŋɔnûai kpɔara-ƃelai káo-ŋai taa-taai. Ɣâla a ǹyée kúla dí mu. M̀ɛni ma Eezuɛ a pâi díyee mɛi ɣâlei a ŋánaa.

⁶Ŋa Ɣâla fɛlîi a gɛɛ Eezuɛ a pâi kulâi Zãiyɔŋ é díyee mɛi ɣále. Eezuɛ-ƃelai líi a pâi nɛ̃ɛ̂i a tãi Ɣâla a pâi ŋɔ́nɔ gɛ̂i la díƃûu ƃó pôlui.