Read Kpelle Wule-woo-ŋa 54 Bible Online

Wule-woo-ŋa 54 - Kpelle bible

Wule-woo-ŋa 54

¹Deeƃé ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni ma a gɛɛ díkɛ dòo a ɣale-sãa tãi Zifi taai su-sinaai dí mò la Sɔɔ ma a gɛɛ Deeƃé káa loo-perei dílɔii kpîniŋ sui Óo Ɣâla, ḿalo mî a íwala-wala laai, íŋuŋ-ma ƃó a íwala-wala laai.

²Óo Ɣâla, íyee see ŋá Ɣâla-fɛli wooi mu, í íwoli tɔ́ɔ ŋ̀óo ma!

³Su-mɛni kɛ̂tɛ-ƃela da pâi a gɛɛ dí pɛ́lɛ ḿâ. Ŋwana-lɔ̂ɔ-ƃela da pâi a gɛɛ dí ḿbaa. Díkaa a ǹûai nyii-ŋai dífe kpáani Ɣâla mɛni mai.

⁴Kɛ́lɛ Ɣâla káa a ŋákpɔŋ ma nuu. Ǹuu-namui káa a ḿaa kɔ̃ɔ nuu.

⁵Tɔ́ɔ Ɣâla é gɛ́ ŋ́gbɔara-ƃelai díŋwana-lɔɔi é tínaŋ pôlu dîa. A pâi dí su-karai, kpɛ́ni fêi ǹyá ƃé deniŋ ƃôɔɔi.

⁶Óo Yâwɛɛ, ŋa pâi sâla kulâi yâ nyii kulâi ńii sui. Ŋa pâi sɛɣɛ fêi tɛɛ̂i ípɔ kpɛ́ni fêi, ísɔnyɔŋ lɛ̂lɛɛi.

⁷Ya ŋ́gula ŋámɛni kpɔ̂lui kélee su, ǹyaŋ ŋa ŋ́gbɔara-ƃelai yée mɛi ɣâlei káa.