Read Kpelle Wule-woo-ŋa 59 Bible Online

Wule-woo-ŋa 59 - Kpelle bible

Wule-woo-ŋa 59

¹Deeƃé ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni ma tãi Gâloŋ Sɔ̂ɔ è kpakolo-ŋa tɛ̀ɛ la ŋɔpɛ́rɛi la a gɛɛ dí baai Óo Ŋáɣâlai, ŋ́uŋ ma ƃó ŋ́gbɔara-ƃelai yêei. Ŋ́uŋ ma ƃó diai yêei da gbã tèe ḿberêi.

²Ŋ́uŋ ma ƃó ŋ̀wana-lɔ̂ɔ-ƃelai yêei, í ŋ́gula yêei kɛ́ ǹúu paa-ƃelai yêei.

³Gáa, da gbã tée ḿberêi a gɛɛ dí ḿbaa. Ŋwana-lɔ̂ɔ-ƃela tɔɔ̂i ḿâ. Fé tá sɛŋ da kɛ́ ní a dia, kpaa máŋ mɛni nyɔ́mɔɔ da kpɛ́ni.

⁴Da ŋ̀wɛ̂lii dí ŋáfulu-laai su láŋ nɔ́ kpɛ́ni. Óo Yâwɛɛ, pá í ŋ́uŋ ma ƃó díyêei.

⁵Ŋ̀wála-wâla kélee Ɣalai Yâwɛɛ, ímu siɣe í kpɔŋ ḿâ. Eezuɛ Ŋɔɣâlai, ímu-siɣe í diai kula maa kɛ́ dífe kpáaŋ ní a ímaa mɛ̂nii. Ífe dɔnɔ kpîŋ ŋɛ́i malôŋ kàa. Ífe gíri-ƃela nyɔ́mɔɔ-ŋai da ŋɛ́i malôŋ kàa.

⁶Da pâ pôlu daa-leei su a ɣele-wulii ŋɔŋ ma, dísũa pilíɛɛ ɣelêi yɛ̂ɛ ɣîla-ŋa díkɛ nàa maa tînaŋ.

⁷Da núu nàɣaŋ díkɛ núu maa yâo woo-ŋa ƃò. Díwoo a ƃɔ̀ núu kponôi yɛ̂ɛ ƃóa-sɔ̂kpɔ. Ǹyaŋ da kɛ̂ gâai yɛ̂ɛ núu da fa díwoo mɛ̀ni.

⁸Kɛ́lɛ yá Yâwɛɛ, ya kɛ̂ ɣɛ̂lɛi dîa. Diai kélee dífe kpâani a ímaa mɛ̂nii, ya kɛ́ nɔ́ ɣɛ̂lɛi dîa.

⁹Ńâai kpɔ́ a íwala-wala-laai maa mɛ̂ni. Yá ƃa ŋ́uŋ ma ƃó nuu, óo Ɣâla.

¹⁰Ŋáɣâlai è ŋ́wɛlini, ǹyaŋ a pâi pâi ŋ́wɔlɔ-woo ma. A pâi gɛ̂i ŋá ŋ́gbɔara-ƃelai yée mɛi ɣâlei káa.

¹¹Ífe dípaa, óo Ɣâla, ŋánûai dífa lâa nia la. Gɛ́ nɔ́ dítaa-taa a íwala-wala-laai díkpɔara-ƃela dí díyee mɛi ɣále. Óo Yâwɛɛ, yá ƃa kú maa kɔ̃ɔ-nuui.

¹²Ŋ́gbɔara-ƃelai díkaa a lɛ́ɛ-ƃela tee-tee. M̀ɛni ma, ǹɛɛ naa díyoŋka lɛɛ-ŋai dí dílɛɛ mɛ̂nii, kpɛ́ni fêi, da nûa ǹaɣaŋ, díkɛ lɛ́ɛ kɛ̀.

¹³Dísu kara a lii ŋwâna pere. Ífe da malôŋ kàa. À kɛ̀ tí, ǹûai da pâi gɔ̂lɔnii a gɛɛ Ɣâla ƃa Eezuɛ-ƃelai láa túɛ-nuu, ŋɔwála-wala-laai kɛ́ ƃò ǹɔii gwaa kélee mɛi.

¹⁴Da pâ pôlu daa-leei su a ɣele-wulii ŋɔŋ ma, dísũa pilíɛɛ ɣelêi yɛ̂ɛ ɣîla-ŋa díkɛ nàa maa tînaŋ.

¹⁵Da kɛ́ tînanii ǹaa ma yɛ̂ɛ ɣîla-ŋa ƃé díkɔnɔ̃ŋ kɔ̂rii, da wàla pela dí kɛ́ kpeɣe.

¹⁶Kɛ́lɛ ŋa pâi wule toôi é pîlaŋ íwala-wala-laai ma. Ŋa pâi kɛ̂i wule toôi a ɣele-wala kélee é pîlaŋ íwɛli kɛ́-maa kpanaŋ ma. Yá nɔ́ ƃa ŋ́uŋ ma ƃó nuu. Ŋa kɛ̀ mɛni kpɔ̂lu su, yá ƃa ŋ́gûla zu.

¹⁷Yá ƃa ḿaa kɔ̃ɔ-nuui. Ŋa pâi ílaa maa tɛ̂i. Yá ƃa ŋ́uŋ ma ƃó nuu, óo Ɣâla. Yá ƃa Ɣâla nyii ŋ́wɛlinii.