Read Kpelle Wule-woo-ŋa 63 Bible Online

Wule-woo-ŋa 63 - Kpelle bible

Wule-woo-ŋa 63

¹Ŋ̀ulei Deeƃé è dòo tãi è kɛ̀ la Zuda fɛ̃ɛ-kpalaŋ sui Óo Ɣâla, Ŋáɣâlai nɔ́ ƃa yá. Yá nɔ́ ƃé ŋà í fɛ̀lîi. Ímaa mɛni kpanaŋɔɔ̂i ḿâ, yɛ̂ɛ lɔii kpâla mà ƃɛ́i yá fé naai.

²Ŋ́ɛi káa yâ íkwaa maa waai ma, ǹyaŋ íwala-wala-laai da íkɛtɛ-laai káa naa.

³Íwɔlɔ-wɔlɔ wɛli-kɛ-maai tɛɛ̂i fúlu-laa ma. Ǹyaŋ ŋa pâi kɛ̂i nɔ́ ílaa maa tɛ̂i.

⁴Ŋa pâi kɛ̂i nɔ́ ílaa maa tɛ̂i tãi nɔ́ ŋ́gaa la ɣele mai. Ŋa pâi ńyee tɛ̂i ɣelêi ŋ́gɛ í fɛ̀li.

⁵Ŋa pâi kúu kɛ́tɛ kɛ̂i ŋá ílaa maa tɛ́ a lii-nɛ̃ɛ pere. Ŋa pâi lii-nɛ̃ɛ wule-ŋa toôi a ílaa.

⁶Ŋà kɛ̀ laani ŋágbîŋ ŋá, ŋà lɛ̂ɛ ŋ́gili ŋá siâi ímɛni ma é lɛ́ɛ la zu ɣele é ƃɔ́,

⁷kpɛ́ni fêi, yá ƃa ŋákpɔŋ-maa nuui. Íninîŋ mu ƃé ŋ́gaa naa ŋ́gɛ wule tôo a lii-nɛ̃ɛ pere.

⁸Ŋ́ganaŋɔ̂ɔi yâ, ǹyaŋ yá ƃé ya ḿaa kɔ̃ɔ.

⁹Diai kɔ̂i a gɛɛ dí ŋáfulu-laai su karai, da pâi saâi.

¹⁰Da pâi dípâai kɔ́ su a ƃóa-sɔkpɔ-ŋa. Dípoma a pâi kɛ̂i a fɛ̃nɛ-sãa kɔ̃nɔŋ.

¹¹Kɛ́lɛ gâloŋ a pâi lii-nɛ̃ɛ kulâi, kpɛ́ni fêi, Ɣâla a gɛ́ a ŋɔkpɔara-ƃelai yée mɛi ɣále. Diai da díkono tèe Ɣâla yêei, da pâi laa ma tɛ̂ tɛɛ̂i Ɣâla pɔ́. Kɛ́lɛ Ɣâla a pâi ǹɛ́ɛ-ƃelai lá tɛ̂i.