Read Kpelle Wule-woo-ŋa 68 Bible Online

Wule-woo-ŋa 68 - Kpelle bible

Wule-woo-ŋa 68

¹Deeƃé ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni mai Ɣâla a m̀u-siɣe a gɛ́ ŋɔkpɔara-ƃelai da táa-taa. Diai dí tɔɔ̂i mai da pú.

²A dítaa-taa yɛ̂ɛ berei fãa a luri tàa-taa lai, é díseɣeŋ yɛ̂ɛ ŋɔŋ a ƃɔ́ɔ sêɣeŋ. Bere ƃé Ɣâla a ŋ̀wana-lɔ̂ɔ-ƃelai su kàra la.

³Kɛ́lɛ a gɛ̀ deniŋ ƃô-ƃelai díkɛ ƃò lii-see su, dílii nɛ̃ɛ, díkɛ koi-nɛ̃ɛ kùla ŋ̀ɛ́i-túɛ díkɛ làɣi a koi-nɛ̃ɛ pere.

⁴Ka wule tóo Ɣâla ma. Ka lii-nɛ̃ɛ wule-ŋa too a ǹáa. Ka wule tóo ǹúui m̀a nyii ŋ̀ele-kɔlɔŋ káa siâi lai. Ǹáa ƃa Yâwɛɛ. Ka lii-nɛ̃ɛ kula ŋ̀ɛ́i-túɛ.

⁵Ɣâla káa ŋɔkwaa maa waai ma. Gbáaŋɔɔ̂i dee-noŋ-ŋai mɛni ma, gɛ́ bɔɔ-nɛyãai maa kɔ̃ɔ.

⁶Diai díkɛ̂i fé mai, a kwaa ma tɛ̀ɛ dípɔ. A diai ŋuŋ maa ƃò díkaa kpini-pɛrɛ-ŋa mui. Kɛ́lɛ a pâi gɛ̂i diai dí tɔɔ̂i ḿâi, díkɛ ƃò lɔii nyɔ́mɔɔ su.

⁷Óo Ɣâla, ya tɔ̀ɔ ínûai túɛ, íkɛ tɛ̀ɛ a dîa vɛ̃ɛ-kpâlaŋ su,

⁸ǹɔii a kpɛ̃liŋ, ŋ̀ele-kɔlɔŋ lá é ƃó tuna é pú, ǹɔii a wôlo zu a yá, Eezuɛ Ɣalai í sia tîŋ Sana Yeei ma.

⁹Ya gɛ̀ tuna kpɛ́ɛ pôlu é pú ǹɔii ma, ǹɔii nyɔ́mɔɔi é lɛ́lɛ sí-sãa kpɛtɛ mɛ̂ni ma,

¹⁰naa kɛ́ ƃò a ǹɛ́lɛɛ ínûai mɛni ma. Óo Ɣâla, ísɔŋ lɛ̂lɛ-laai su, ya diai kɔ́nɔŋ kùla pɔ̂ri mâa fé dîɛi.

¹¹Ǹuu-namui è ŋ̀óo tɛ́ɛ. M̀ɛnii è gɛ̀i, nɛyâa támaa dí lì a maa tûŋ.

¹²Dí mò dîyɛɛi, “Gâloŋ-ŋai da díkɔ-kuluƃa-ŋai da pûi.” Zãâi kélee dí ǹɛɛ dípôlui, ǹɛyâai dí ŋ̀áa kɔ̀lɛ díkîe-ni loai.

¹³Zãâi ŋí da-ŋa ƃa tòloŋ pɔkɔɔŋ-ŋa mɛi pɛlɛ́ɛ a káne da gôo, goôŋ kɛ́ kɛ̀ yɛ̀rɛŋ-yɛrɛŋ yɛ̂ɛ gôo lɛ́lɛɛ-ŋa. Lé mɛni ƃé Ɣâla ŋɔnûai da-ŋa dí lɛ̀ɛ la m̀ala koraŋ lá a gɔ́i kɔ́ ɣelei?

¹⁴Tãi Ŋ̀wála-wâla kélee Ɣâlai è gɛ̀ gâloŋ-ŋai dí taa-taa Samɔŋ Yeei mai, è gɛ̀ kɔ́lɛ é naa mɛi pɛ́lɛ.

¹⁵Basãŋ Yeei maa pɔlɔ-pɔlɔɔi. Dôŋ tâmaai ma.

¹⁶Káai ka Ɣâla fɛ̀li Basãŋ Yeei mai, ka tólo kulâi diai dîa da Ɣâla fɛ̀li ǹyéei ma ƃɛ́i Ɣâla è naa lɛ̀ a gɛ̂i lé mɛni ma? Naa ƃé pâi kɛ̂i a Yâwɛɛ kɛ̂i wɔ́lɔ-wɔlɔ da wɔlɔ-wɔlɔ.

¹⁷Tãi Ǹuu-namui è kùla la Sana Yeei ma gɛ́ lì ŋɔkwa maa waai mai, ŋɔkɔ́ kɔ́ keleŋ sia-sãai dí kɛ̀ a wála támaa.

¹⁸È tɛ̀ ŋ̀elei su póŋ-poŋ a kɔ-soŋ támaa. Nûa dí sama-sãa támaa tɛ̀ɛ bɔ́. Ŋɔkpɔara-ƃelai dí sama-sãa tɛ̀ɛ bɔ́ máŋ. Ɣâla Yâwɛɛ a pâi seêi naa.

¹⁹Lûwa é kɛ́ Ǹuu-namui ma. Ǹyaa ƃa kúkpîri-ŋai sîɣe a ɣele kélee. Ǹyaa ƃa kúŋuŋ maa ƃó Ɣalai.

²⁰Kúɣâlai káa a ŋuŋ maa ƃô Ɣala. Ǹyaa ƃa Kúnuu-namui Yâwɛɛ. Ǹyaa ƃa kúkùla saa yêei.

²¹Ɣâla a pâi ŋɔkpɔara-ƃelai ŋuŋ wólo tí-ti ƃôi, da diai díyee káa nɔ́ wɔ́lɔ sɔnyɔ̂ŋ sui.

²²Ǹuu-namui è m̀o ǹyɛɛi, “Ŋa pâi kákpɔara-ƃelai kulâi Basãŋ ŋá pá a dia pôlu. Ŋa pâi díkulâi yúo káo ma ŋá pá a dia pôlu.

²³Ŋa pâi pâi a dia pôlu a gɛɛ ká ƃɔ́rɔŋ díŋãa su, káɣîla-ŋai dí da kpele.”

²⁴Óo Ɣâla, ŋákâloŋ, ǹûai da mɛni a gɛɛ íyee a tɛɛ íkpɔara-ƃelai dîa. Da siâi dí kɛ́ pà íkwaai maa waai ma.

²⁵Ŋ̀ule too-ƃelai díkɛ̀ tuɛ pere, ŋ̀ale-sãa ɣale-ƃelai dí kɛ́ ƃò pôlu-pere, nɛnî-kpela-ŋai díkɛ ƃò sâmai díkɛ díɣale-sãai ɣâle.

²⁶Dí kɛ̀ môi dîyɛɛi, “Ka laa maa tɛ̂ tɛɛ Ɣâla pɔ́ ǹûai sáma. Káai a Eezuɛ ŋɔsuui su-ƃelai ka Yâwɛɛ láa maa tɛ́.”

²⁷Bɛŋsima nyii gáa a Eezuɛ nuu-suui guro-tei, é kɛ́ a maa-ŋuŋ. Zuda-ƃelai da dínûa laa túɛ-ƃelai díkɛ̀ dípôlu pere. Zɛbulɔŋ da Nɛfɛtɛli dísuui su-ƃelai láa túɛ-ƃelai ƃé lɛ̀ɛ ǹaa pôlu.

²⁸Óo Ɣâla, íwala-wala-laai lɛ́ ŋɔ́nɔ kûa, yɛ̂ɛ berei í gɛ̀ la kú maa mɛ̂ni ma a bɔlɔi.

²⁹Gɛ́ tí kpɛ́ni fêi, kâloŋ-ŋa da pâi pâi a sama-sãa ípɛrɛi kɛ́tɛi mu Zerusâlɛŋ.

³⁰Zua-ŋai bârai sui díkula maa kɛ́. Ǹɔii-ŋuŋ kula maa kɛ́ nyii zu-ƃelai díkaa yɛ̂ɛ niŋa sîrɛ-ŋai. Gɛ́ díkɛ tɔ̀ara díkɛ pà a díkane sama-sãa. Ǹɔii-ŋuŋ-ŋai zu-ƃela dí wɛ́lini a kɔ́kɔ mɛnii, gɛ́ dí táa-taa.

³¹Gɛ́ Ize-ƃelai dí pá a díƃara sama-sãai a wála-wala-laa. Gɛ́ Itiopia-ƃelai dí pá a sama-sãa a maa félaa.

³²Káai a ŋ̀éniɛi su kaloŋ-laai kélee ka Ɣâla láa maa tɛ̀. Ka laa maa tɛ̂ tɛɛ Ǹuu-namui pɔ́.

³³Ka laa maa tɛ̂ tɛɛ ǹúui pɔ́ nyii a kɛ́ siâi ŋ̀ele-kɔlɔŋ pɔlɔ-pɔlɔɔi sui. Ka káwoli tɔ́ɔ ŋ̀óo ma ká láɣi a zu-kɛtɛ.

³⁴Ka Ɣâla ŋɔwála-wala-laai maa-tuŋ too. Ŋɔwála-wala-laa kɛ́tɛi káa Eezuɛ mɛi. Ŋɔwála-wala-laai káa ŋ̀elei su.

³⁵Ɣâla maa pɔlɔ-pɔlɔi à kɛ̀ kulâi ŋɔpɛ́rɛi maa waai mu. Ǹyaa ƃa Eezuɛ Ŋɔɣâlai. A wála-wala-laa da kponoi kpânaŋ tɛ̀ɛ ŋɔnûai pɔ́. Ka laa maa tɛ̂ tɛɛ Ɣâla pɔ́.