Read Kpelle Wule-woo-ŋa 71 Bible Online

Wule-woo-ŋa 71 - Kpelle bible

Wule-woo-ŋa 71

¹Óo Yâwɛɛ, ŋa pá ípɔ a gɛɛ í ḿaa kɔ̃ɔ. Ífe nɛ̀ɛ naa ŋ́gbɔara-ƃelai dí ńyee mɛi ɣále.

²Ḿaa kɔ̃ɔ, íŋuŋ mâa ƃó, íteniŋ ƃô-laai su. Íwoli tɔ́ɔ ḿâ, í ŋ́uŋ maa ƃó.

³Íkaa a ḿɛi káa-nuu kpanaŋɔɔ yɛ̂ɛ kɔni nyii ŋ́gili tɔɔ̂i mai. Yá ƃa ḿɛi káa-nuu nyii ŋa ŋuŋ maa ƃô sɔlɔ ƃô ǹyêei.

⁴Ŋ́uŋ ma ƃó ŋ̀wana-lɔ̂ɔ-ƃelai yêei, óo Ŋáɣâlai. Ŋ́uŋ ma ƃó ŋ̀ôya-ƃelai da zɔnyɔ̂ŋ-ƃelai yêei.

⁵Óo Ǹuu-namui Yâwɛɛ, yá ƃé ŋ́gili tɔɔ̂i yâ. Ŋà láa a yá é síɣe tãi ma ŋá kɛ̀ la a nyáŋkpai.

⁶Yá ƃé ŋ́gili tɔɔ̂i yâ é síɣe ḿaa sɔlɔ ƃó tãi ma. Yá ƃé gɛ̀ ńee é ḿaa sɔlɔ ƃó. Ŋà ílaa ma tɛ̂ a ɣele kélee.

⁷Ŋáfulu-laai káa a mɛni kɔɔŋ maa núu támaa mɛni ma, kpɛ́ni fêi, yá ƃa ḿɛi káa-nuu kpanaŋɔɔi.

⁸Ŋà ílaa ma tɛ̂ a ɣele kélee. Ŋà íkɛtɛ-laai mɛ̂ni ƃò a tãi kélee.

⁹Ŋâa nâa pɔlɔ. Ífe íyee kùla ḿu. Wála-wala da kélee fé ŋɔ́nɔ ńyêei. Ífe ǹia ḿâ.

¹⁰Ŋ́gbɔara-ƃelai da lôno a ǹyɔ́mɔɔ é pîlaŋ ḿâ. Diai dí tɔɔ̂i ḿâi, da kɛ̂ ńzîa-pere maa kpɛɛ̂i a gɛɛ dí ḿbaa.

¹¹Da m̀o dîyɛɛi, “Ɣâla a kula bôlu. Kwaa gbɛ́ kú zoŋ. Núu da fé naa é gula kúyêei.”

¹²Óo Ŋáɣâlai, ífe ímaa kôya ḿâ. Pá a maa félaa í kpɔ́ŋ ḿâ.

¹³Ŋ́gbɔara-ƃelai yée mɛi ɣále, í dísu-kara. Diai kɔ̂i ḿbɔi, ƃâa kula dîa, í dí ŋumɛ.

¹⁴Ŋákili tɔɔ maai káa nɔ́ yá tɔnɔ yâ a tãi kélee. Ŋa pâi ílaa maa tɛ̂i a zu kɛ́tɛ.

¹⁵Ŋa pâi íteniŋ ƃô-laai mɛni ƃôi, da íŋuŋ maa ƃô-laai a ɣele kélee, berei máŋ fa târe la zui.

¹⁶Ŋa pâi kɛ̂i nɔ́ Ɣâla Yâwɛɛ ŋɔwála-wala-laai mu. Ŋa pâi ǹáa ma tɛ̂i ŋɔteniŋ ƃô-laai mɛ̂ni ma.

¹⁷Óo Ɣâla, ya wɔ́lɔ ŋ́gili ŋá pono tãi ŋá kɛ̀ la a nyáŋkpai. Ŋa pâi kɛ̂i nɔ́ íkɛ-mɛni kpaya-kpayai maa mɛ̂ni ƃôi.

¹⁸A nɛ̃ɛ maa kpîŋ ŋá pɔlɔ, ŋ́uŋ é kole, Ɣâla, ífe íyee kùla mu, é lɛ́ɛ la zu ŋá íkɛ-mɛni kpaya-kpayai da íwala-wala-laai maa mɛni ƃó diai dîa díkaa ɣele mai, da kúwɔ̂ lonii kélee pâi pâi.

¹⁹Óo Ɣala, íteniŋ ƃô-laai maa mɛ̂ni seriɛɛ̂i ŋ̀ele-kɔlɔŋ su. Ya mɛni kpaya-kpaya támaa kɛ́. Óo Ɣâla, gbɛ̂ɛ ƃé zeriɛɛ̂i ípɔi?

²⁰Ya ŋ́gɛ ŋa mɛni kpɔ̂lu támaa ŋɛ́i káa. Kɛ́lɛ ya pâi ŋ́uŋ ma ƃôi, í ŋ́gula saa yêei.

²¹Ya pâi ŋá ƃaa kɛ́-maai su kɛ̂tɛi, í ŋɔ́nɔ ŋá-nɛnɛ.

²²Ŋa pâi kɛ̂i kɔnîŋ ɣâlei, ŋ́gɛ ílaa maa tɛ̀, íteniŋ ƃô-laai mɛ̂ni ma, óo Ŋáɣâlai. Ŋa pâi kɛ̂i kɔnîŋ ɣalêi yâ, ŋ́gɛ laa maa tɛ̂ wule-ŋa too, óo Eezuɛ Ŋɔmaa Wâa Nuu Tɔnɔi.

²³Ŋa pâi lâɣii ɣelêi-pere a lii-nɛ̃ɛ, tãi ŋa kɛ̀ ílaa ma tɛ̂i lai, kpɛ́ni fêi, ya ŋ́uŋ ma ƃó.

²⁴Ŋa pâi kɛ̂i lônoi é pîlaŋ íteniŋ ƃô-laai mɛ̂ni ma tãi nɔ́ ŋ́gaa la ɣele mai, kpɛ́ni fêi, ya ƃâa kula diai dîa kɛ̀ ŋ̀wɛ̂lii dí ŋáfulu-laai su karai, ya dí su-kara.