Read Kpelle Wule-woo-ŋa 73 Bible Online

Wule-woo-ŋa 73 - Kpelle bible

Wule-woo-ŋa 73

¹Asafa ŋɔwulei Tɔ̃yâ kpîŋ ma Ɣâla sɔŋ lɛ̂lɛɛi Eezuɛ-ŋai mɛ̂ni ma. A mɛni lɛ́lɛɛ kɛ̀ diai dîɛ dílii su waai.

²Kɛ́lɛ ŋálaa-lai bîlaŋɔɔi Ɣâla mai, su è gbâa sàa. Kili kɛ-zu fé ŋɔ́nɔ kɛ́ ní ńyêei,

³kpɛ́ni fêi, fa ŋ̀wɛli ŋá ŋ̀wana-lɔ̂ɔ-ƃelai da zu-mɛni kɛ̂tɛ-ƃelai káa ƃûu ƃôi. À kɛ̀ tí, ŋa tólo kùla dîa.

⁴Dífa kɛ̂ mɔ̃lɛ̂i sɛŋ-soli maa da yêei. Díkɔlɔi a kɛ̂ a bonoɔɔ díkponôi kpanaŋɔɔ.

⁵Dífa m̀ɔ̃lɛ yɛ̂ɛ díƃarâai. Mɛni kpɔ̂lu da fé dîa yɛ̂ɛ berei gáa la nûa da kpɛ́ni-ŋa diai.

⁶Da su-mɛni kɛ̂tɛ tòo díkɔŋ ma yɛ̂ɛ yɔlɛ. Dímɛni su-kara tuai a kɛ̂ dîa yɛ̂ɛ núu kɔŋ ma seɣe.

⁷Díkili ŋa siâi nyɔ̂mɔɔi. Dímɛni kpɛtɛɛ-ŋai kélee nyɔ́mɔɔ.

⁸Da ɣɛ́lɛ maa kûla nûa kponôi. Dísu mɛ̂ni kɛ̂tɛi. Da mɛni nyɔ́mɔɔ-ŋa kpɛ̀tɛ é pîlaŋ nûa dîa.

⁹Da lóno nyɔ́mɔɔ-ŋa kɛ̀ é pîlaŋ Ɣâla ma Ɣâla-taa. Da ǹɛ a gɛɛ wála-wala-laa káa díyêei ǹɔii ma ƃɛ́.

¹⁰M̀ɛnii ŋí a gɛ̀ nûa dí tínaŋ dípɔ naa pere díkɛ dílaa maa tɛ̀. Maa-ƃelai da lâa a m̀ɛni-ŋai da m̀o dîai.

¹¹Da kɛ̂ m̀ôi dîyɛɛi, “Ɣâla fé pâi m̀ɛnii kɔ̂lɔnii. Ŋ̀âla Kɛ́tɛi fé pâi mɛni da kɔ̂lɔnii é pîlaŋ ma.”

¹²Ǹyaŋ bere ƃé ŋ̀wana-lɔ̂ɔ-ƃelai díkaa la. Dí tɔɔ̂i, díkɔ̃̂liŋ su kɛ́ kɛ̀tɛ nɔ́ a ɣele kélee.

¹³Ŋa ŋ́gbîŋ màa waa, ŋá ńyee kúla mɛni nyɔ́mɔɔ kɛ́ɛ su káa kpɛ́ni-kpɛni?

¹⁴Óo Ɣâla, ya ḿɔ̃lɛ ƃɔɔlɔ. Í ŋ́gula maa kɛ̂ a ɣele-wala kélee.

¹⁵Ŋà m̀ɛni sîi-ŋai ŋí ƃò, gɛ̀ ní fé kɛ́ ní tûai yɛ̂ɛ ínûai da.

¹⁶Ŋá ŋ́gili ŋá sìa é pîlaŋ m̀ɛni-ŋai ŋí dîa, kɛ́lɛ è kɛ̀ a gbanaŋɔɔ a gɛɛ ŋá ŋ̀á káa,

¹⁷fɛ̂ɛ tãi ŋá lì la Ípɛrɛ Kɛ́tɛi mui, maa tãi ƃé ŋá gɔ̀lɔŋ la m̀ɛnii pâi kɛ̂i a ŋ̀wana-lɔ̂ɔ-ƃelai.

¹⁸Tɔ̃yâ ma ya pâi dípûi kwaa ma laa-lâa ma, í dísu-kara.

¹⁹Ya pâi dísu karâi tãi kpua yée mu. Díɣeniɛi kpɛɛ-ŋai a pâi kɛ̂i a nyɔ́mɔɔ.

²⁰Díkɛ ɣéniɛi káa nɔ́ yɛ̂ɛ see-woo nyii núu a ŋ̀ɛ́i lá ƃò nɔ́ a ɣele-wala é nia ma.

²¹Tãi ŋá kɛ̀ la maloŋ tôo maa támaa su, ńii kɛ́ tòo pôlui,

²²ŋá kɛ̀ a ḿoɔɔ, ŋ́ôlii kpɔ́lɔɔ yɛ̂ɛ fɛnɛ-sɛŋ. Fé kɛ́ ní târei íwoo su.

²³É máŋ kɛ́ tí, fa wɔ́lɔ ḿaa kôya yâ. Ńyee káa nɔ́ íyêei a ɣele kélee.

²⁴Ƃa ḿɛi kâa, íkɛ ńia-woo ƃò. Gbɛɛ ŋái, ya pâi íyee seêi ḿû a ƃaa kɛ́-maa pere.

²⁵Gbɛ̂ɛ ƃé ŋ́gili káa ma ŋ̀elei su perei, yá fêi? Sɛŋ da fé naa nyii ŋ̀wɛli káa ḿâ ǹɔii mâ ƃɛ́ é tɛ́ɛ yâ.

²⁶Ŋ́gili ŋá à pù, Ɣâla a táre tɛ̀ɛ ḿbɔ. Ŋ́gbonoi fíi a kpɛ̀ɛ, ǹyaa ƃa ŋ́gbonôi kpanaŋ. Ǹyaa tɔ̂nɔ nɔ́ ƃé ŋ́gili káa m̀a.

²⁷Diai dífe kpáaŋ ní ímaa mɛ̂ni mai, da pâi saa tí-ti ƃôi. Diai dífe teniŋ ƃô níi, ya pâi dísu karâi.

²⁸Kɛ́lɛ à kɛ̀ à ńyãa, ǹɛ̂lɛɛi núu kɛ́ ƃò a ǹɛɣɛɛ a Ɣâla. Ŋa Ǹuu-namui Yâwɛɛ siɣe a ḿaa kɔ̃ɔ-nuu. Ŋa pâi kɛ̂i gɛ́ mɛni kpaya-kpayai maa mɛ̂ni ƃôi.