Read Kpelle Wule-woo-ŋa 75 Bible Online

Wule-woo-ŋa 75 - Kpelle bible

Wule-woo-ŋa 75

¹Asafa ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni mai Óo Ɣâla, kwa ísɛɣɛ̂i fêi. Kwa ísɛɣɛ̂i fêi, kú kɛ́ íkɛtɛ-laai, da íkɛ tîi kpaya-kpayai maa mɛ̂ni ƃò.

²Ɣâla a m̀ó ǹyɛɛi, “Ŋâa tãi kpɛtɛ mɛni-saa ŋá tée mɛni ma. Ŋa pâi ǹûai dímɛnii ŋá têei a bɔriɛɛ.

³Ǹɔii a kɛ̀ kpɛ̃lini da zu-ƃela kélee, ńyãa ƃa gɛ̀ é sée tɔ̀ŋ zu-ƃela dí kpéra kpɛ̃linîi.

⁴Ŋá mò ŋ̀wana-lɔ̂ɔ-ƃelai dîa a gɛɛ dí kpéra su-mɛni kɛ̂tɛ kɛ̂i.

⁵Ŋá m̀ó yòŋka tée-ƃelai dîa a gɛɛ dí kpéra yoŋka têei.”

⁶M̀ɛni ŋá téɛɛi fé pâi kulâi fólo kulâi-pere, kpaa máŋ fólo liî-pere, yá-ŋûa pere, kpaa máŋ séɣai pere.

⁷Ɣâla nɔ́ ƃa m̀ɛni ŋá tée-nuui. A m̀ɛni lɛ́lɛɛ kɛ́-ƃelai tɛ̀ ɣelêi, é m̀ɛni nyɔ́mɔɔ kɛ́-ƃelai pú gɔ́ɔ mu.

⁸Kɔ̂pu káa Yâwɛɛ yêei. Ŋɔlii ŋwânai káa ǹá fɛ́ɛ gɛ́ fûle yɛ̂ɛ ŋwã̂ai kpanaŋ. A pâi ǹyênii ǹɔii ma. Ŋ̀wana-lɔ̂ɔ-ƃelai kélee da pâi gbelêi é lɛ́ɛ la zu gélee é kpɛ́ɛ.

⁹Fé pâi wɔ́lɔ kperâi Zeeka Ŋɔɣâlai láa maa tɛ̂i. Ŋa pâi kɛ̂i nɔ́ koi-nɛ̃ɛ laa maa tɛ wule-ŋa toôi ma.

¹⁰A pâi ŋ̀wana-lɔ̂ɔ-ƃelai pûi gɔ́ɔ mu, é zɔŋ lɛ̂lɛ-ƃelai maa tɛ́.