Read Kpelle Wule-woo-ŋa 81 Bible Online

Wule-woo-ŋa 81 - Kpelle bible

Wule-woo-ŋa 81

¹Asafa ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni ma a gɛɛ díkɛ́ dòo a ɣale-sãai Ka wule tóo Ɣâla ma ɣelêi pere. Ǹyaa ƃa kúmaa kɔ̃ɔ nuui. Ka laa maa tɛ̂ wule too a lii-nɛ̃ɛ Zeeka Ŋɔɣâlai ma.

²Ka wule tóo ká ɣale-sãa ɣale. Ka kɔnîŋ da nyɛ́nyɛŋ ɣále ká wule nɛ̃ɛ-ŋa too.

³Ka túru fɛ́ɛ gúu kɛ́tɛi su bɛ́mɛlɛ̂ŋ kaoi a tɔ̀ɔ a nina da tãi ǹá a fɛ̂ɛ lai.

⁴Dɔ̂ŋ ŋí káa Eezuɛ. Zeeka Ŋɔɣâlai ƃé dɛ̀ɛ Eezuɛ-ŋai pɔ́.

⁵È m̀o dîa a gɛɛ dí dɔ̂ŋ ŋí mɛi káa tãi è díkùla la Ize lɔii sui. Ŋá wóo sîi da m̀ɛni nyii fé táreni zu ǹyɛɛ ḿâi,

⁶“Ŋa pâi gbîri wuyɛɛ-ŋai kulâi káŋûa. Ŋa pâi káŋuŋ ma ƃôi tíi kpânaŋ kɛ́ mɛni su.

⁷Ká kɛ́ɛ mɛni kpɔ̂lu sui, ká ńdòli. Ŋá pà ŋá káŋuŋ maa ƃó. Ŋá kɛ̀ ŋ̀ele-gbâna ŋɔŋ su loo perei ŋá káwoo su too. Ŋá su-kɔɔŋ tɛ̀ɛ kápɔ Mɛriba ya-ɣɛli-pɛlɛɛ̂i kɔlɛ.

⁸Ŋánûa, ká káwoli tɔ́ɔ ǹîa-wooi ma ŋa dɛɛ̂i kápɔi. Eezuɛ-ŋa, ŋa ŋ̀wɛ̂lii ká káwoli tɔ́ɔ ḿâ.

⁹Káfe wɔ́lɔ ɣâla da kpɛ́ni fɛ̀li. Káfe pɛ̀lɛ ɣâla da kpɛ́ni kɔ́ɔ mu.

¹⁰Ńyãa ƃa Yâwɛɛ, Káɣâlai. Ńyãa ƃé kákùla Ize lɔii su. Ka ká lá táa, ǹyaŋ ŋa pâi ǹáa fɛ̂ɛ a mii-sɛŋ.

¹¹“Kɛ́lɛ káai a Eezuɛ-ŋai, káfe káwoli tɔɔ-ni ḿâ. Eezuɛ kpîŋ fé ŋ́oo mɛni ní.

¹²Nya ƃe ŋa ǹɛɛ la naa ŋ̀oii kpɔ̂lɔi ká kɛ̀ ŋ̀wɛ̂lii ká gɛ́i, ká kɛ́ gɛ̀. Kɛ́ kɛ̀ ká kpɔ́ɔ-kpɔɔi mɛni kɛ̂i.

¹³Ŋa ŋ̀wɛ̂lii ká káwoli tɔ́ɔ ḿâ. Ŋa ŋ̀wɛ̂ii ká sia ŋ́gɔɔ pɔ̂ɔi.

¹⁴Ŋa pâi kákpɔara-ƃelai yée mɛi ɣâlei a ŋáwala-wala-laai. Ŋa pâi ńyee kulâi kákpɔara-ƃelai mu.

¹⁵Diai kélee dí tɔɔ̂i Yâwɛɛ mai, da pâi pîlanii díŋume ŋá ŋ́gɔɔ mu a ŋumɛ-pere da yao. Díkula maa kɛ́ɛ kɔ́yɛ̃ŋ fé pâi wɔ́lɔ kɛ̂i ma.

¹⁶M̀ii-sãai kélee ŋa pâi dɛɛ̂i kápɔi a pâi kɛ̂i a m̀ii-sãai ǹɛ́lɛɛi. Ŋa pâi kɔ̃́iŋ-wulɔ lɛ́lɛɛ tɛɛ̂i kápɔ nyii pâi kálii lâai.”