Read Kpelle Wule-woo-ŋa 83 Bible Online

Wule-woo-ŋa 83 - Kpelle bible

Wule-woo-ŋa 83

¹Asafa ŋɔwulei Óo Ɣâla, ífe lɛ̀ɛ a ímɛi sâa. Ífe lɛ̀ɛ a ímɛi sâa kpaa máŋ í ílii ma soŋ.

²Gáa, íkpɔara-ƃelai da díkpîŋ kpɛ̂tɛi ímɛni ma. Diai dítɔɔ̂i yâi, da ímaa fôoi.

³Da mɛni kpɛtɛɛ nyɔ́mɔɔ kɛ̂i loo pêrei ínûai mɛni ma. Da gbã tée diai perêi í díwɛlinii.

⁴Da môi dîyɛɛi, “Kwaa Eezuɛ-ŋai kélee páa dísuu da fé lɛ̀ɛ ɣele ma.”

⁵Da mɛni kpɛtɛɛ kɛ́ da díwoo pú gîei, da díkpɔŋ mâa-ƃela kɔ́rii a gɛɛ dí kɔ́ ípɔ.

⁶Gbɔŋ mâa-ƃelai ŋí ƃa Idɔŋ-ŋai da Isimai suui su-ƃelai, Môa-ŋai da Agari suui su-ƃelai,

⁷Geba-ŋai, Amɔŋ-ŋai, Amɛlɛ-ŋa Felesia-ŋai da Taya-ŋai.

⁸Asiria-ŋai dia máŋ da too dîa. Díwala-walai yɛ̂ɛ La ǹônii Amɔŋ da Môa dísuui su-ƃelai.

⁹Díkula maa kɛ́ yɛ̂ɛ berei í Midiaŋ-ŋai kula maa kɛ̂ lai í dísu-kara yɛ̂ɛ berei í Sisera da Zabiŋ-ƃelai kula maa kɛ̂ la Kisoŋ Ya-leei mai.

¹⁰Í díyee mɛi ɣâle Ɛŋdɔŋ, dípoma é lɛ́ɛ a dáa tâa ǹɔii ma dí lûla.

¹¹Dílaa túɛ-ƃela wála-wala-ŋai kula maa kɛ́ yɛ̂ɛ berei í gɛ̀ la a Ore da Zɛɛ. Díkâloŋ-ŋai kula maa kɛ́ yɛ̂ɛ berei í gɛ̀ la a Zeba da Zamunai,

¹²kpɛ́ni fêi, dí m̀o dîyɛɛi, “Kwa pâi Ɣâla ŋɔlɔii kúwɔ̂i teêi ma.”

¹³Óo Ɣâla, dítaa tâa yɛ̂ɛ fãa a muluŋ fɛ̂ɛ, í dífɛɛ yɛ̂ɛ fãa a kòoŋ a kala.

¹⁴Berei kpɔ́ ŋɔŋ a têe la wolâ su gɛ́ gèreŋ, ǹéŋ kɛ́ pìli ǹyée-ŋai sui,

¹⁵bere ƃé í díkpɛ la a ífãa su kpanaŋɔɔi, í dímaa yáo a zu kɛ́tɛ a lii-ŋwana pere.

¹⁶Óo Yâwɛɛ, gɛ́ díŋumɛ kpɔ́ a ŋ̀ánaa a gɛɛ dí kɛ́ íwala-wala-laai mu.

¹⁷Gɛ́ díkpɔara-ƃelai dí díyee mɛi ɣále, yao kɛ́ ƃò díkɔlɔi wɔ́lɔ-wɔlɔ da wɔ́lɔ-wɔlɔ. Gɛ́ ƃaa kûla maa é sɛ̂lɛŋ dîa dísaa.

¹⁸Gɛ́ dí gɔ́lɔŋ a gɛɛ yá nɔ́ ƃa Yâwɛɛ, ǹyaŋ íwala-wala-laai káa ŋ̀éniɛi gwaa kélee mɛi.