Read Kpelle Wule-woo-ŋa 85 Bible Online

Wule-woo-ŋa 85 - Kpelle bible

Wule-woo-ŋa 85

¹Kora ǹônii díwulei nyii dí bɔ̃yɛ ŋ̀ule too-ƃelai láa túɛ-nuui mɛni mai Yâwɛɛ, ya lûwa láa ǹɔii ma. Ya gɛ̀ ǹaa mɛni-ŋai kélee ŋaa-see kɛ́ kɛ̀ a ǹɛ́lɛɛ Eezuɛ-ŋai yêei yɛ̂ɛ berei è kɛ̀ la a bɔlɔi.

²Í ínûai su mɛni lɛ̀ɛ zɔnyɔ̂ŋ-ŋai dí gɛ̀i m̀ɛni ma. Mɛni nyɔ́mɔɔ-ŋai kélee dí gɛ̀i, í íyee kùla zu.

³Í ílii ŋáa yèŋ, í ílii ŋwâna su kɛ́tɛi maa sòŋ.

⁴Óo Ɣâla, pá a kûa pôlu. Yá ƃa kúŋuŋ ma ƃó-nuui. Ílii fé tòo pôlu kúmɛni ma!

⁵Ya pâi kɛ̂i nɔ́ a ílii ŋwánaa kûa wɔ́lɔ-wɔlɔ da wɔ́lɔ-wɔlɔ? Ífe pâi wɔ́lɔ ílii ŋá yenîi?

⁶Gɛ́ kúkponôi é kpanaŋ. Yà gɛ̀ tí, gɛ̀ ní kúai a ínûai kwa pâi kɛ̂i nɔ́ laa maa tɛ̂ tɛɛ̂i ípɔ.

⁷Óo Yâwɛɛ, íwɛli kɛ́ maa kpanaŋ lɛ́ kûa, í kúŋuŋ ma ƃó.

⁸Ŋ́oli tɔɔ̂i Ɣâla Yâwɛɛ ma. A lii-see maa kono tee kɛ̂i kúyêei, à kɛ̀ kwa kúlii pène, kwa pâi zɔlɔ ƃôi.

⁹Gbîŋ kpɛtɛɛi kpɔ́ a tɔ̃yâ a gɛɛ é diai ŋuŋ ma ƃó da vɛlii, gɛ́ ƃò díkɔlɛ ma a ɣele kélee.

¹⁰Wɛli kɛ́ maa da teniŋ ƃô-laa da pâi pûi díkîe ma yɛ̂ɛ núu-kpune, tɔ̃yâ-laa da lii-see dí kpulɔ̂ŋ díkîe ni dîa yɛ̂ɛ laoi-laa ƃela.

¹¹Tɔ̃yâ-laa mɛni a pâi kɛ̂i ǹɔii ma ƃɛ́, teniŋ ƃô-laa mɛni é kúla ŋ̀elei su.

¹²É máŋ kɛ́ tí, zãâi kélee ǹɛ̂lɛɛi kúmɛni mai, Yâwɛɛ a pâi dɛɛ̂i kúpɔ. A pâi gɛ̂i kúsi-sãai díkɛ kpɛtɛ ǹɔii ma.

¹³Teniŋ ƃô-laa ƃé pâi kɛ̂i Kúɣâlai Yâwɛɛ túɛ pere, gɛ́ ŋɔsia perei su sãa.