Read Kpelle Wule-woo-ŋa 88 Bible Online

Wule-woo-ŋa 88 - Kpelle bible

Wule-woo-ŋa 88

¹Ŋ̀ulei Emaŋ nyii gáa a Ɛzura ŋɔsuui su-nuui è bɔ̃yɛ ŋ̀ule too-nuu kɛ́tɛi mɛni ma nyii Kora ǹônii dí dòo a ƃɔɔ fɛ́ɛ wooi Óo Ŋáɣâlai Yâwɛɛ, ŋa wɔ̂lɔi yâ kpɔŋ mâa mɛni ma a ɣele kélee da kpíni kélee yái íkaa a ḿalo-nuui.

²Íwoli tɔ́ɔ ḿvɛli-wooi ma. Ŋ́ɔlɔ-wooi mɛ́ni í zu too.

³Mɛni kpɔ̂lu támaa a láa ḿâ. Ŋa kɛ́ saa wôlo lá.

⁴Ŋa ƃóloŋ diai dîa díkaa saa wôlo lái. Pɔ̂ri mâa fé ŋɔ́nɔ mî.

⁵Ya íyee kúla ḿu zaa-ƃelai sáma. Ŋa kɛ́ nɔ́ yɛ̂ɛ boma-ŋai lâani ƃolôŋ sui, ŋ́gɛ ƃò yɛ̂ɛ ǹúui maa mɛ̂ni fé ŋɔ́nɔ íkili ŋai, ǹyaŋ kpɔŋ mâa da fé ŋɔ́nɔ íyêei dímɛni ma.

⁶Yá ḿbili lóa kpóŋ kôyaa su kpíniɛɛ su.

⁷Ílii ŋwânai a ḿɛi pɛ́lɛ, gɛ́ tɛ̀ɛ yɛ̂ɛ ya-ɣiliŋ.

⁸Ya gɛ́ ŋáwɛli kɛ́ maa-ƃelai da díyee kúla ḿù. Ḿbɛlɛ kpɛɛ̂i díkoi. Ŋa kɛ́ nɔ́ yɛ̂ɛ núu ƃé kpini-pɛrɛ mu bú pere fé ma.

⁹Ŋa mɔ̃lɛ̂i, ŋ́ɛi fé ŋɔ́nɔ pɔrîi kwaa kâai. Yâwɛɛ, ŋa wɔ̂lɔi yâ a ɣele kélee. Ŋa ńyee tɛ̀ ɣelêi ŋ́gɛ ífɛ̀li.

¹⁰Ya ŋɛi kɛ́-maa mɛni-ŋa kɛ̀ zaa-ƃelai mɛni ma? Da pɔ̂ri dímu siɣêi dí ílaa ma tɛ́?

¹¹Núu da káa saa-taa nyii a pɔ̂ri íwɔlɔ-wɔlɔ wɛli kɛ-maai, kpaa máŋ íteniŋ ƃô-laai maa tûŋ ƃôi? Kpao, maa nûu fé naa.

¹²Zaa-ƃelai da pɔ̂ri íŋɛi kɛ́-maa-ŋai naa kâai gwaa kpíniɛɛi tí ma? Da pɔ̂ri m̀ɛni lɛ́lɛɛ-ŋai ya gɛ̀i naa kâai ƃɛ́i núu a nia naa mai? Kpao, ve tí.

¹³Yâwɛɛ, ŋa wɔ̂lɔi yâ kpɔŋ mâa mɛni ma. Ŋa í fɛ̀li a ɣele-wala kélee.

¹⁴Óo Yâwɛɛ, ya íyee kulâi ḿu lé mɛni ma? Ya ípôlu fêi mî lé mɛni ma?

¹⁵Ŋa mɔ̃lɛ é síɣe ńôloŋ tãi ma, naa a lɛ̀ɛ a gùro ŋá sáa. Ŋa mɔ̃lɛ ímɛni kula maa ŋánaai yêei. Pɔ̂ri mâa da fé ŋɔ́nɔ mî.

¹⁶Ílii ŋwânai kɛ́tɛi a ńzu kara. Ya pɛlɛ ḿâ a lii ŋwâna ya ńzu kara.

¹⁷Dí tínaŋɔɔ̂i ḿâ yɛ̂ɛ ya-fɛ̂ɛ é síɣe ɣele wâla ma é tóo ɣele wûlii ma. Dí kélee da tínaŋ ḿâ ḿƃela kélee ma.

¹⁸Ya gɛ́ ŋáwɛli kɛ́-maa-ƃelai kpîŋ da dípôlu tɔɔ ḿâ. Kpíni nɔ́ ƃa lɛɛ a ŋáwɛli kɛ́-maa nuui.