Read Kpelle Wule-woo-ŋa 89 Bible Online

Wule-woo-ŋa 89 - Kpelle bible

Wule-woo-ŋa 89

¹Ŋ̀ulei Ɛtaŋ nyii gáa a Ɛzura ŋɔsuui su-nuui è bɔ̃yɛi Óo Yâwɛɛ, ŋa pâi kɛ̂i nɔ́ wule toôi é pîlaŋ íwɔlɔ-wɔlɔ wɛli kɛ-maai ma a ɣele kélee. Ŋa pâi kɛ̂i nɔ́ íteniŋ ƃô-laai maa tûŋ toôi kúlônii da díwɔ̂ lonii-ŋai dîa.

²Ŋá gɔ́lɔŋ íwɛli kɛ́-maai kɔ́yɛŋ fé ma. Íteniŋ ƃô-laai maa mɛ̂ni káa nɔ́ yɛ̂ɛ ŋ̀ele-kɔlɔŋ. Gáa nɔ́ naa wɔ́lɔ-wɔlɔ da wɔlɔ-wɔlɔ.

³Í mò yɛ̂i, “Ŋá kpanaŋ-woo kɛ̀ ǹúui yêei ŋá zìɣe zui. Ŋá ŋ́gono tèe ŋátii kɛ́-nuui Deeƃé yêei,

⁴ńyɛɛ mai, ‘Ísuui su nuui da nɔ́ ƃe pâi wɔ́lɔ kɛ̂i a kâloŋ. Ŋɔkâloŋ-laai a pâi kɛ̂i naa wɔ́lɔ-wɔlɔ da wɔ́lɔ-wɔlɔ.’ ”

⁵Ŋ̀ele-kɔlɔŋ-ŋai kpîŋ da laa maa tɛ̂ wule too yâ íkɛ mɛni mĩli-mĩliɛɛ-ŋai mɛni ma. Ŋ̀âla-taa kela-ŋai da wule tôo yâ íteniŋ ƃô-laai mɛni ma, óo Yâwɛɛ.

⁶Óo Yâwɛɛ, sɛŋ da fé ŋ̀elei su nyii zeriɛɛi ípɔ. Vúlu-sãai kélee Ɣâla-taai, da fé seri ní ípɔ.

⁷Ŋ̀âla-taa kela-ŋai ŋ̀elei sui, díkelee da yao yâ. Díkelee da kɛ̂ íkɛmɛni kpaya-kpayai maa mɛ̂ni ƃôi díkpɔŋ gîe mai su.

⁸Ŋ̀wála-wâla kélee Ɣalai Yâwɛɛ, sɛŋ da ŋɔwála-wala-laai fé seri ní ípɔ. Óo Yâwɛɛ, íteniŋ ƃoɔ̂ɔi íkɛ mɛni kélee su.

⁹Íwala-wala-laai káa yúo mɛi. Ya gɛ̀ yúo é kpéra toôi.

¹⁰Í Yúoi zere kalii Leɣa maa pɔlɔ-pɔlɔɔi pâa. Í íkpɔara-ƃelai tàa-taa a íwála-walai.

¹¹Ŋ̀elei da ǹɔii díkaa a ípɔɔ. Yá ƃé ŋ̀éniɛi kpɛ̀tɛ da zu sãa kélee.

¹²Yá ƃé yá ŋûa-pere da yá kwára-pere kpɛ̀tɛ. Tabɔ da Ɛmɔŋ Yee-ŋai da ílaa maa tɛ̀.

¹³Íwala-walai. Íwala-wala-laai su kɛ̂tɛi, gɔ̃yɛŋ fé ma!

¹⁴Íwala-wala-laai kpóŋ seêi ƃa tɔ̃yâ-laa da tɔ̃yâ mɛni ŋá téɛɛ. Ítûa pere kélee káa a wɛli kɛ́-maa da teniŋ ƃô-laa.

¹⁵Lûwa káa diai dîa da laa maa tɛ̂ wule-ŋa too yâ díkɛ ífɛ̀lii.

¹⁶Da koi-nɛ̃ɛ kùla ísârai a ɣele kélee. Da ílaa maa tɛ̀ ísɔŋ lɛ̂lɛ-laai mɛni ma.

¹⁷Ya wála-wala-laa tɛɛ kúpɔ. Kwa kúkpɔara-ƃelai yée mɛi ɣâle íwɛli kɛ́-maai sârai.

¹⁸Óo Yâwɛɛ, yá ƃa kúmaa kɔ̃ɔ-nuui. Eezuɛ Ŋɔɣâla Maa Waai, yá ƃe kúkâloŋ tɛ̀ɛ kúpɔ.

¹⁹Tãi su kôyaa tɛɛ pôlu ma, í m̀o íteniŋ ƃo tii kɛ́-ƃelai dîa zĩa su, yɛ̂ɛi, “Ŋá kpɔŋ mâa tɛ̀ɛ kɔkuluƃa pɔlɔ tɔnɔ pɔ́. Ŋá zìɣe zu ŋánûai sáma ŋá gɛ́ a kâloŋ.

²⁰Ŋá wúlɔ maa waa pù ŋátii kɛ́-nuui Deeƃé ŋûa, ŋá gɛ́ a kâloŋ.

²¹Ŋa pâi mɛi kâai a ɣele kélee, ŋá gɛ́ gbonôi é kpanaŋ.

²²Gbɔara-ƃelai da fé pâi wɔ́lɔ pɔrîi ǹyée mɛi ɣâlei. Ŋwana-lɔ̂ɔ-nuu da yée fé pâi pɔrîi tɛɛ̂i ma.

²³Ŋa pâi gbɔara-ƃelai su karâi. Ǹúui kélee pâi tɔɔ̂i mai, ŋa pâi maa nuui paâi.

²⁴Ŋa pâi ŋ̀wɛ̂lii, ŋ́gɛ ƃò bôlu. Ŋa pâi gɛ̂i é gbɔara-ƃelai yée mɛi ɣále a ɣele kélee.

²⁵Ŋa pâi gɛ̂i ŋɔkâloŋ lɔii é síɣe Mɛditɛrenia Yuoi ma é seri Yufeletii Ya-leei ma.

²⁶Gɛ̀ ní a pâi m̀ôi ḿâ ǹyɛɛi, ‘Ńâŋ da Ŋáɣâlai ƃa yá. Yá ƃa ḿaa kɔ̃ɔ nuui da ŋ́uŋ ma ƃó nuui.’

²⁷Ŋa pâi gɛ̂i a ńoŋ-surɔŋ maa-ŋuŋ. Ǹyaa ƃé pâi kɛ̂i a gâloŋ gɛ́tɛi kâloŋ-ŋa kélee sáma.

²⁸Fé pâi wɔ́lɔ ŋákono tee ɣâlei kwa ǹyaa kúloai. Gbanaŋ-wooi kúloai kwa ǹyaai, a pâi wɔ́lɔ kɛ̂i nɔ́ tɔɔ̂ni dɔɔ̂i.

²⁹Ŋɔkâloŋ-laai a pâi wɔ́lɔ kɛ̂i nɔ́ naa yɛ̂ɛ ŋ̀ele-kɔlɔŋ wɔ́lɔ-wɔlɔ da wɔlɔ-wɔlɔ. Ŋɔsuui su nɔ́ ƃé gâloŋ a pâi kɛ̂i kulâi naa.

³⁰“Kɛ́lɛ à kɛ̀ ŋɔsuui su-ƃelai da dípôlu tɔ̀ɔ ŋátɔ̂ŋ-ŋai dîa, da wàla ŋámɛni kpɛtɛɛ-ŋai ŋ̀aa sèe kɛ́,

³¹à kɛ̀ da díŋɛi nàŋiɣîŋ ŋá sɛŋ lɛ́ɛi mɛi, dífe ŋátɔ̂ŋ-ŋai ŋ̀aa sèe kɛ́ ní,

³²gɛ̀ ní, ŋa pâi díkula maa kɛ̂i zɔnyɔ̂ŋ-ŋai da gɛ̂i mɛni ma. Da pâi mɔ̃lɛ̂i dítua pere nyɔ̂ŋ-ŋai mɛni ma.

³³Kɛ́lɛ ŋ̀wɛli kɛ́-maai ńyêei Deeƃé mɛni mai, va wɔ́lɔ kpèra, kpaa máŋ gono-teei ŋá gɛ̀ ǹyêei, ŋá ńyee kúla m̀ɛni su.

³⁴Gbanaŋ-wooi kwa ǹyaa kúloai fé pâi wɔ́lɔ ŋ̀âlei. Kpaa máŋ gono-teei ŋá gɛ̀ ǹyêei ŋá ŋ́oo síɣe pôlu.

³⁵“Tãi nɔ́ ŋá ŋ́gono tèe la ǹyêei, ŋ́oo tɔɔ̂i nɔ́ ƃa dɔɔ̂i. Fé pâi wɔ́lɔ lɛ́ɛ kɛ̂i Deeƃé ma.

³⁶Ŋɔsuui su nɔ́ ƃe gâloŋ a pâi kɛ̂i kulâi naa. Ŋa pâi kɛ̂i ŋɔkâloŋ-laai mɛi kâai. Ŋɔkâloŋ-laai a pâi kɛ̂i nɔ́ naa tãi nɔ́ vóloi a toôi lai.

³⁷A pâi kɛ̂i naa yɛ̂ɛ berei ŋ̀áloŋ káa la naa wɔ́lɔ-wɔlɔ da wɔ́lɔ-wɔlɔi. A pâi wɔ́lɔ kɛ̂i nɔ́ naa gɔ́yɛŋ fé ma.”

³⁸Kɛ́lɛ gáa, ya ílii ŋwána gâloŋ ma nyii í zìɣe zui. Ya íyee kúla mù, ya ípôlu tɔɔ ma.

³⁹Ya gbanaŋ-wooi ɣále ka ǹyaa káloai, ya gâloŋ-ƃɔrɔi kúla ŋ̀ûa ya bili muluŋ su.

⁴⁰Ya ziɣãŋ-ŋai wólo daa-leei ma, naa a lɛɛ fóŋkpoŋ.

⁴¹Nûa da kɛ́ nɔ́ tɛɛ̂i naa díkɛ ǹaa sãa ŋùma, naa kɔlɛ ma-ƃelai díkɛ ɣɛ̀lɛ daa-leei ma.

⁴²Ya gɛ́ gbɔara-ƃelai yée a tɛ̀ɛ mà díkɛ lii-nɛ̃ɛ kùla.

⁴³Ya gɛ́ ŋɔkɔ́kɔ sãai da kɛ́ nɔ́ ǹyêei kpɛ́ni-kpɛni. Ya gɛ́ gbɔara-ƃelai yée a tɛɛ ma kɔ́ su.

⁴⁴Ya ŋɔkâloŋ-wurii kúla ǹyêei, gâloŋ see-sɛŋ a kula ǹyêei a too ǹɔii ma.

⁴⁵Ya gɛ́ a pɔlɔ a maa félaa. Ya ƃaa kula maa sɛ̂lɛŋ ma.

⁴⁶Óo Yâwɛɛ, ya pâi kɛ̂i íloôi a tãi ɣɛɛlu? Tãi ɣɛɛlu ƃé ílii ŋwânai a pâi kɛ̂i ŋ́gerenîi la yɛ̂ɛ ŋɔŋ?

⁴⁷Gɔ́lɔŋ a gɛɛ ŋáfulu-laai su fé ŋɔ́nɔ kôya ní. Í kú kpɛ̀tɛ, kɛ́lɛ kú kɛ̀ ɣeniɛi káa nɔ́ kpɛ́ni-kpɛni.

⁴⁸Núu a pɔ̂ri kɛ̂i ɣele ma wɔ́lɔ-wɔlɔ da wɔ́lɔ-wɔlɔ? Gbɛ̂ɛ ƃa pɔ̂ri núu da ŋuŋ ma ƃôi saa yêei?

⁴⁹Ǹuu-namui, íwɔlɔ-wɔlɔ wɛli kɛ́-maai í wɔ́lɔ maa kôno tèe kɛ̀i, ǹyaa kɔɔ? Gono têei í wɔ́lɔ gɛ̀ Deeƃé yêei, dɔɔ̂i ƃa mí?

⁵⁰Gɔ́lɔŋ diai dífe kpáaŋ ní ímɛni mai, da yola kulâi ńyãai a íyee mu-nuui, ŋ́gbonôi. Da woo yɔ̂ŋ támaa pilîi ḿâ, ŋ́gɛ mɔ̀lɛ nɔ́ díyêei.

⁵¹Óo Yâwɛɛ, íkpɔara-ƃelai da ɣɛ́lɛ maa kulâi ŋ́gbonôi. Da yola kulâi ŋ́gbonôi ńyãai a gâloŋ nyii í zìɣe zui.

⁵²Ka Yâwɛɛ láa maa tɛ́ wɔ́lɔ-wɔlɔ da wɔ́lɔ-wɔlɔ! É kɛ́ tí! É kɛ́ tí!