Read Kpelle Wule-woo-ŋa 9 Bible Online

Wule-woo-ŋa 9 - Kpelle bible

Wule-woo-ŋa 9

¹Deeƃé ŋɔwulei nyii è bɔ̃yɛ ŋ̀ule too-ƃelai láa túɛ-nuui mɛni mai Ŋa pâi sɛɣɛ-fei tɛɛ̂i Yâwɛɛ pɔ́ a ńii kélee. Ŋa pâi gɛ́-mɛni kpaya-kpayai maa tuŋ toôi.

²Ŋa pâi wule toôi ya a lii-nɛ̃ɛ pere. Ŋ̀âla Kɛ́tɛi, ŋa pâi ílaa ma tɛ̂i wule-woo su.

³Ƃa íkpîŋ lɛ̀ ŋ́gbɔara-ƃelai dîa, da pâi tínanîi dí tóo dí sáa.

⁴Íkaa a tɔ̃yâ-nuu, ísãa mɛni ŋá tée pere su. Ya ŋámɛnii su káa, ya gáa a gɛ́ɛ ńzɔŋ fé zu.

⁵Ya ŋ̀wana-lɔ̂ɔ-ƃelai dímɛnii ŋáa tée ya dísu-kàra ǹɔii-ŋûŋ-ŋai su, ya gɛ́ da láa fé ŋɔ́nɔ pâi kɛ̂i ɣele ma wɔ́lɔ-wɔlɔ da wɔ́lɔ-wɔlɔ.

⁶Dítà fé ŋɔ́nɔ ɣele ma. Í dísu kàra da dítaa-lee-ŋai. Da maa mɛ̂ni kíli fé ŋɔ́nɔ núu da kíli ŋá.

⁷Kɛ́lɛ Yâwɛɛ, íkaa a kâloŋ wɔ́lɔ-wɔlɔ da wɔlɔ-wɔlɔ. Íkaa naa mɛni ŋá tée mɛni ma.

⁸Ya ǹɔii mɛi kâa a tɔ̃yâ-pere, í kɛ́ zu-ƃela dímɛnii ŋá tèe a bɔriɛɛ.

⁹Diai da dílùaŋ, Yâwɛɛ ƃé gáa a díŋuŋ ma ƃó-nuu. Ǹyaa ƃa diai mɛni kpɔ̂lu sui, dí kili tɔɔ maai.

¹⁰Diai dí ílaa kɔ́lɔŋ dia ƃa dílaa-lai pù íkponôi. Núu da a pà ípɔ óo Yâwɛɛ, ífa íyee kùla maa nûui mu.

¹¹Ka laa ma tɛ̂ wule-ŋa too Yâwɛɛ ma. Zeêi ƃa Zãiyɔŋ Yeei ma. Ka gɛ́-mɛni kpaya-kpayai maa mɛ̂ni ƃó ǹûai dîa.

¹²Diai da mɔ̀lɛi, dímaa mɛ̂ni káa Ɣâla kíli ŋá. Va nîa dí wɔ́lɔ-woo ma. Diai da ǹûai ŋí mɔ̃lɛi, a dí kula maa kɛ̂.

¹³Óo Yâwɛɛ, ḿalôŋ káa. Gáa berei ŋa mɔ̃lɛ̂i la ŋ́gbɔara-ƃelai yêei. Óo Yâwɛɛ, ŋ́gula mî saa yêei.

¹⁴Yà gɛ̀ tí, ŋa pâi ílaa ma tɛ̂i Zerusâlɛŋ, ŋa m̀ɛni-ŋai ƃó nûa dîa ŋa ílaa ma tɛ̂i m̀ɛni mai. Ŋa pâi ílaa ma tɛ̂i, kpɛ́ni fêi, yâ ŋ́uŋ ma ƃó.

¹⁵Diai Ɣâla mɛni fé díkponôi, dí lóa tèe dí tóo díkpɔɔi loai su. Dí kɔ̀ a díkpɔɔi ƃare-ŋai.

¹⁶Yâwɛɛ a gbîŋ lɛ́ dîa, a ŋɔmɛni ŋá téɛɛ sãai. Zɔnyɔ̂ŋ-ƃelai dí kɔ̀ a díkpɔɔi ƃare-ŋai.

¹⁷Ŋ̀wana-lɔ̂ɔ-ƃelai da pâi saâi. Diai kélee da nîa Ɣâla mai dia máŋ díteniŋ tɔɔ̂i saa ma.

¹⁸Ɣâla fa nîa diai dîa pɔ̂ri mâa fé dîɛi. Vé pâi nɛɛ̂i naa díŋuŋ lá é píli wɔ́lɔ-wɔlɔ da wɔlɔ-wɔlɔ.

¹⁹Óo Yâwɛɛ, ímu-siɣe, ífe ǹɛɛ naa núu-kpune é gbîŋ mɛni ŋá tée. Dímɛnii ŋá tée yá kpîŋ.

²⁰Óo Yâwɛɛ, yao pú díkponôi. Tɔɔ dí gɔ́lɔŋ a gɛ́ɛ díkaa nɔ́ a núu-kpune.