Read Kpelle Wule-woo-ŋa 94 Bible Online

Wule-woo-ŋa 94 - Kpelle bible

Wule-woo-ŋa 94

¹Óo Yâwɛɛ, íkaa a Ɣâla nyii a mɛni kpa kulai. Gba kula Ɣâlai, íkpîŋ lɛ́ kûa.

²Óo ǹɔii ŋɔmɛni ŋá tée Ɣalai, ímu-siɣe, í ǹyoŋka-ƃelai féla fé dítûa-perei ma.

³Óo Yâwɛɛ, tãi ɣɛɛlu ƃé ŋ̀wana-lɔ̂ɔ-ƃelai da pâi kɛ̂i lii-nɛ̃ɛ kulâi lai? Tãi ɣɛɛlu ƃé da pâi kɛ̂i nɔ́ ŋwana-lɔ̂ɔ-tue kɛ̂i lai?

⁴Lé mɛni ƃé da pâi kɛ̂i nɔ́ yoŋka têei la zɔnyɔ̂ŋ-ŋai da gɛ̂i m̀ɛni mai?

⁵Yâwɛɛ, da ínûai Eezuɛ-ŋai luânii díkɛ mɛni ŋánaa kɛ̀ a dia.

⁶Da bɔ̀ɔ-nɛyãai paâi, díkɛ dee-loŋ-ŋai pâa, da ŋɔ̃ya-ŋai díkaa kúlɔii sui,

⁷díkɛ m̀o dîyɛɛi, “Yâwɛɛ fé kúkâai. Eezuɛ Ŋɔɣâlai fé m̀ɛnii kɔ́lɔŋ kwa gɛ̂i.”

⁸Ŋánûa, káfa mɛni ŋá kàa lé mɛni ma? Ka pâi târei a lé tãi?

⁹Ɣâla nyii wóli kpɛtɛi, va mɛni mɛ̂ni? Ǹyaa ƃé ŋɛ́i kpɛ̀tɛ, va kwaa kâa?

¹⁰A ǹɔii ŋuŋ-ŋai kula maa kɛ̂, káfe láa ní la a gɛɛ a pâi kú ŋwana lɔ̂ɔ-kaloŋ-ŋai kula maa kɛ̂i? Gáa a sɛŋ lɛ́-nuu kɛ́tɛ, káfe láa ní la a gɛɛ a pɔ̂ri sɛŋ lɛ̂i kûa?

¹¹Yâwɛɛ è núu-kpune líi su mɛni-ŋai kélee kɔ́lɔŋ. È gɔ́lɔŋ berei táre fé la kúkili ŋa sîai sui.

¹²Yâwɛɛ, ya lûwa làa diai kélee dîa ya dí kula maa kɛ̂i, íkɛ ítɔ̂ŋ lɛ̀ dîai.

¹³Da tòo mɛni kpɔ̂lu su, ya díkùla naa é lɛ́ɛ la zu díkpɔara-ƃelai dí tóo lóa kpóŋ kôyaa su nyii dí dèe dímɛni mai.

¹⁴Yâwɛɛ fé pâi ǹyée kulâi ŋɔnûai mu. Vé pâi ǹyée kulâi diai mu díkaa a bɔ́ɔi.

¹⁵Gâloŋ-ŋai da pâi kɛ̂i mɛni-saa ƃôi a teniŋ ƃô-pere. Deniŋ ƃô-ƃelai da pâi tɔɔ̂i díwoo pôlu.

¹⁶Gbɛ̂ɛ ƃé pâi tɔɔ̂i ḿɛni ma ŋ̀wana-lɔ̂ɔ-ƃelai ŋɛ́i-tuɛi? Gbɛ̂ɛ ƃé pâi tɔɔ̂i ḿɛni ma m̀ɛni nyɔmɔɔ-kɛ́-ƃelai ŋɛ́i-tuɛi?

¹⁷Yâwɛɛ eî wàla kpɔŋ ḿâ, gɛ̀ ní ŋa saa.

¹⁸Nya ƃe ŋá m̀o ńyɛ̂ɛi, “Ŋá kɛ́ saâi.” Kɛ́lɛ óo Yâwɛɛ, ŋá ŋɔ́nɔ ḿu sìɣe ŋá tɔ́ɔ íwɔlɔ-wɔlɔ wɛli kɛ-maai sârai.

¹⁹Ŋ́gili ŋá a pù, ńii kɛ́ sɛ̀lɛŋ, ya gɛ̀ kili kɛ zu é kɛ́ ńyêei.

²⁰Ífe wɛ́li ní a wôya mɛni saa ƃó-ƃela, nyii-ŋai da mɛni sâa ƃò a fili perei.

²¹Da tɔ̂ɔ dɔ̃yâ-ƃelai dîa, dí díŋuŋ lá píli.

²²Kɛ́lɛ Yâwɛɛ a tɔ̂ɔ ḿbôlu. Ŋáɣâlai ƃa ḿaa kɔ̃̂ɔ.

²³A pâi ǹúu ŋwana-lɔ̂ɔ-ŋai kula maa kɛ̂i, é dísu kara zɔnyɔ̂ŋ-ŋai da gɛ̂i m̀ɛni ma. Kúɣâlai Yâwɛɛ a pâi dísu karâi.