Read Kpelle Wule-woo-ŋa 97 Bible Online

Wule-woo-ŋa 97 - Kpelle bible

Wule-woo-ŋa 97

¹Yâwɛɛ káa a kâloŋ. Ŋ̀éniɛi su-ƃelai kélee, ka koi-nɛ̃ɛ kula. Káai máŋ dîŋ-ŋai sui, ka lii-nɛ̃ɛ kula.

²Ɣele-kɔlɔŋ-ŋa da kpíni su pîlaŋɔɔ tinaŋɔɔ̂i m̀a. Tɔ̃yâ da teniŋ ƃô laa ƃa ŋɔkâloŋ-laai kpóŋ seêi.

³Ŋɔŋ káa dúɛ pere, gbɔara-ƃelai dí tínaŋɔ̂ɔi mai, gɛ́ díkèreŋ.

⁴Ŋɔɣele-gbânai ŋɔmãla-mãlai a ǹɔii gwaa kélee mâ pono. Ŋ̀éniɛi su-ƃelai da naa kàa da kpɛ̃liŋ.

⁵Ǹyée-ŋai da sêɣeŋ Yâwɛɛ ŋɛ́i-tuɛ yɛ̂ɛ ƃɔ́ɔ. Da sêɣeŋ Ǹuu-namui ŋɛ́i-tuɛ nyii ŋ̀éniɛi kpɛ̀tɛi.

⁶Ŋ̀ele-kɔlɔŋ-ŋai da berei lɛ̀ gáa la a tɔ̃yâ Ɣalai. Ǹɔii-ŋuŋ-ŋai kélee da ŋɔfólo-laai kâa.

⁷Diai kélee da sãâ pɔkɔɔŋ-ŋa fɛ̀lii, da pâi ŋumɛ̂i. Ŋ̀âla da kpɛ́ni-ŋai da pâi pûi Yâwɛɛ kɔ́ɔ mu.

⁸Zãiyɔŋ-ƃelai líi nɛ̃ɛ̂i, Zuda taa-lee-ŋai su-ƃelai díkɛ koi-nɛ̃ɛ kùla. Da lii-nɛ̃ɛ da koi-nɛ̃ɛ kulâi ítɔ̃yâ mɛni ŋá téɛɛi mɛni ma, óo Yâwɛɛ.

⁹Yâwɛɛ, yá ƃa Ŋ̀âla Kɛ́tɛi ŋ̀éniɛi gwaa kélee. Í kɛ̂tɛi é tɛ́ɛ ŋ̀éniɛi su ɣala-ŋai dîa.

¹⁰Yâwɛɛ è diai wɛ́lini dífa díyee pù mɛni nyɔ́mɔɔ kɛ́ɛ sui. A ŋɔnûai maa kɔ̃̂ɔ, gɛ́ díkùla ŋ̀wana-lɔ̂ɔ-ƃelai yêei.

¹¹Yà sìa a dɔ̂ŋ wóo, íkɛ tɔ̃yâ mɛni kɛ̀, ya pâi kɛ̂i kwaa ponóɔɔ su, lii-see kɛ́ ƃò íyêei.

¹²Káai a dɔ̃yâ-ƃelai, ka koi-nɛ̃ɛ kula m̀ɛnii ma Yâwɛɛ a gɛ́ kâai, ká zɛɣɛ̂i fé ŋɔláa maa waai mɛni ma.