Read Kpelle Wule-woo-ŋa 98 Bible Online

Wule-woo-ŋa 98 - Kpelle bible

Wule-woo-ŋa 98

¹Wule-woo Ka wule nina too Yâwɛɛ ma, kpɛ́ni fêi, gɛ́ mɛni kpaya-kpayai. A ŋɔkpɔara-ƃelai yée mɛi ɣále a ŋɔwála-wala-laa maa-waai da ŋɔkponoi kpânaŋ.

²Yâwɛɛ a gbɔara-ƃelai yée mɛi ɣále mɛni tuŋ too. A ŋɔŋuŋ maa ƃô-laai lɛ́ ŋ̀éniɛi gwaa kélee.

³Ŋɔwɛli kɛ́-maa kpanaŋɔɔi maa kono-teei, maa mɛni kíli è lɛ̀ɛ ŋá ŋɔnûai Eezuɛ-ŋai mɛni ma. Ɣâla a ǹɛ́ núu kélee ma berei a ŋɔnûai ŋuŋ ma ƃò lai.

⁴Káai ŋ̀éniɛi gwaa kéleei, ka koi-nɛ̃ɛ wule too Yâwɛɛ ma. Ka ǹáa ma tɛ́ wule-woo nɛ̃ɛ-ŋa su.

⁵Ka Yâwɛɛ láa ma tɛ́ wule-ŋa su. Ka kɔnîŋ ɣale, ka wule tóo, ká ǹáa ma tɛ́.

⁶Ka túru fɛ́ɛ, ka láɣi ɣelêi pere a lii-nɛ̃ɛ kúkâloŋ Yâwɛɛ ma.

⁷Yúo da zu sãa kélee, ka Ɣâla láa maa tɛ́. Ǹɔii da zu sãa kélee ka ǹáa maa tɛ́.

⁸Ya-lee-ŋa, ka káyee ŋá lókwa. Yée-ŋa, ka koi-nɛ̃ɛ wule too gîe ma Yâwɛɛ ŋɛ́i-tuɛ.

⁹Ka gɛ́ tí, kpɛ́ni fêi, a pâi a gɛɛ gɛ́ ƃò ǹɔii mɛi. A pâi ǹûai mɛi kâai a tɔ̃yâ da teniŋ ƃô pere.