Read Kpelle Wule-woo-ŋa 99 Bible Online

Wule-woo-ŋa 99 - Kpelle bible

Wule-woo-ŋa 99

¹Yâwɛɛ káa a kâloŋ. M̀ɛni ma, nûa, ka kpɛ̃lîŋ. Gáa ŋɔkâloŋ see-sɛŋ ŋá ŋ̀âla-taa kooŋ-sãai loai, gɛ́ ŋɔnûai mɛi kâa. Tɔɔ ǹɔii é kpɛ̃lîŋ.

²Yâwɛɛ kɛ̂tɛi Zãiyɔŋ. Gáa ǹûai kélee mɛi.

³Tɔɔ ǹûai kélee dí ǹáa kɛ́tɛ mĩli-mĩliɛɛi maa tɛ́. Ǹáa maa wâai.

⁴Gâloŋ Kɛ́tɛi, íwɛlini a tɔ̃yâ da teniŋ ƃô mɛni. Yá ƃé tɔ̃yâ mɛni kɛ́ɛ kɔ́ɔ pìlaŋ Eezuɛ lɔii su. Yá ƃa gɛ́ tɔ̃yâ da teniŋ ƃô mɛni kɛ́ ƃò naa.

⁵Ka Kúɣâlai Yâwɛɛ láa maa tɛ́ ká vɛli, kpɛ́ni fêi, m̀aa wâai.

⁶Mose da Eelɔŋ dí kɛ̀ a ŋɔsâla láa soŋ-ƃelai da. Samia ǹyaa máŋ è vɛ̀li. Dí Yâwɛɛ fɛ̀li, ǹyaŋ è dífɛli-wooi su tòo.

⁷È lòno dípɔ, ŋ̀óo kɛ́ kùla ŋ̀ele-kɔlɔŋ kolei su. M̀ɛnii kélee è m̀o dîai, dí m̀ɛni dí gɛ́.

⁸Óo Yâwɛɛ, Kúɣâlai, ya ínûai dífɛli-wooi su too. Í ǹɛ́ dîa a gɛɛ íkaa a Ɣâla nyii a sɔnyɔ̂ŋ su mɛni lɛ̀ɛi, berei máŋ í díkula maa kɛ la dísɔnyɔ̂ŋ-ŋai mɛni mai.

⁹Ka Kúɣâlai Yâwɛɛ láa maa tɛ́. Ka vɛli ŋɔyée maa waai ma. Kúɣâlai Yâwɛɛ káa a Ɣâla maa waa.