Read Kpelle Táre-woo-ŋa 1 Bible Online

Táre-woo-ŋa 1 - Kpelle bible

Táre-woo-ŋa 1

¹Deeƃé ǹóŋ Saloma nyii kɛ̀ a Eezuɛ kaloŋ, dáre-woo-ŋai ká ŋí è mòi.

²M̀ɛni-ŋûŋ-ŋai dáre-woo-ŋai ŋí sui ƃa dí kpɔŋ-maa tɛɛ núu pɔ́ a gɛɛ é táre kɔ́lɔŋ, teniŋ-tɔɔ da ŋ̀óo su-siŋɔɔ-ŋai dísu-kulai.

³Dáre-woo-ŋai ŋí da pâi táre lɛ̂i yâ, teniŋ ƃô-laa, tɔ̃yâ-tua kɛ́ɛ da núu kélee mɛni siɣeɛ a bɔriɛɛ.

⁴Da pâi táre lɛ̂i nûa dîa dítarei láa fé fɛ́ɛ nii, dí gɛ́ ǹyáŋkpa-ŋai dí mɛni ŋá-kaa, dí kɛ́ pɔ̀ri mɛni kpɛtɛɛ kɛ̂i díkpîŋ mɛni ma.

⁵Tɔɔ dáre-nuui máŋ é ŋ̀óli tɔɔ dîa a gɛɛ ŋɔtárei su é kɛ́tɛ. Tɔɔ zɛŋ-kɔlɔŋ-nuui é dília-wooi síɣe,

⁶a gɛɛ dí dáre-woo-ŋai ŋá káa da m̀ɛni-kɔɔŋ-ma-ŋai, é pɛ́lɛ dáre-ƃelai díwoo-ŋai dîa da dí-kuleŋ-kee-woo-ŋai.

⁷Ǹúui ŋ̀wɛ̂lii é tárei, fɛ̂ɛ é yao Ɣâla Yâwɛɛ ma a maa-ŋuŋ, kɛ́lɛ ǹûai dífa mɛni ŋá kàa a ǹɛ́lɛɛi da táre da lia-woo maa mɛ̂ni sìɣe nɔ́ kpɛ́ni-kpɛni.

⁸Ńoŋ, íwoli tɔ́ɔ ínâŋ ŋɔsɛŋ-lɛɛi ma. Ífe ílee ŋɔlia-wooi pîli

⁹kpɛ́ni fêi, dísɛŋ-lɛɛi a pâi ítûa-perei kɛ̂i é lɛ́lɛ yɛ̂ɛ berei núu ŋûa ƃɔrɔ da kɔŋ-ma-kɔyɛŋ da núu maa ɣîri la a ǹɛ́lɛɛi.

¹⁰Ńoŋ, à kɛ̀ sɔnyɔ̂ŋ-ƃela da díyee làa yâ, ífe fàa ma.

¹¹À kɛ̀ da mò dîyɛɛ, “Pá kwáa lí kú núu kɔ́ri kú baa. Kwaa kúloo kwaa núu sóŋ nyii vé mɛni nyɔ́mɔɔ kɛ́ níi.

¹²Berei máŋ díkaa la ɣele ma díkɔlɔi ponoɔɔi, kwaa dí páa kú nia dímɛni ma.

¹³Kwa pâi tɔɔ-sãa sii támaa sɔlɔ ƃôi, kú kúpɛrɛ-ŋai láa fɛ̀ɛ a dia.

¹⁴Pá kú kɛ́ zu tɔnɔɔ, sɛŋ kélee kwa ŋùmai, kwa pâi íwɔ̂i tɛɛ̂i.”

¹⁵Ńoŋ, ífe lɛ̂ɛ núu kɛ́ɛ-ŋai tí pôlu. Ímaa kula dîa.

¹⁶Díkpɛtɛ̂ɛi mɛni nyɔ́mɔɔ kɛ́-mɛni ma. Díkɔɔ maa felâai a gɛɛ dí núu páa.

¹⁷Ve lɛ́lɛɛ-ni í ƃáre tɛ́ ŋɔni ŋɛ́i ƃa ŋ̀wɛ̂lii í gulai.

¹⁸Kpɛ́ni fei núu kɛ́ɛ-ŋai tí da ƃáre tɛ̀ díkpîŋ mɛni ma, ǹyaŋ m̀aa ƃârei tí ƃé pâi dífulu-laai su karâi.

¹⁹Ǹúui a sɛŋ kɔ̂ri ŋwana-lɔ̂ɔ-pere sui, a ŋɔfúlu-laai su kàra.

²⁰Ka káwoli tɔɔ. Táre káa yɛ̂ɛ núu nyii tóli ƃôi berei ma da ǹɔ́ɔ-kpalaŋ-ŋai ŋái.

²¹A tóli ƃôi a ŋ̀óo su kɛ́tɛ daa-leei ŋɔsiɣãŋ-ŋai lá da ƃɛ́i kélee nûa da díŋa tɛ̀ naa gîe ma ǹyɛɛi,

²²“Káai káfa mɛni ŋá kàa a ǹɛ́lɛɛi, ka pâi lɛ̂ɛi m̀ɛnii ŋí su a tãi ɣɛɛlu? Káai a ŋ̀ɛ́lɛ-maa-kula-ƃelai, lé-tãi ƃé ka pâi kperâi la kánîa-kɛɛ ma ɣɛlɛ-maa kuláa sui? Káai táre fé káŋuŋ sui, káfe pâi wɔ́lɔ mɛni maa kɔ̂rii?

²³À kɛ̀ kà káwolii tɔ̀ɔ ŋália-wooi ma, gɛ̀ ní ŋa pâi ŋámɔ̂leŋ ŋɔtárei kélee tɛɛ̂i kápɔ, ŋa ŋɔ́nɔ ŋ́oo-ŋai su-kulâi lɛ́ kâa.

²⁴Tãi ŋá wɔ́lɔ ƃɛlɛ tôli ƃò la a káa a gɛɛ ká pái, káfe káwoli tɔɔ ni. Tãi ŋá wɔ́lɔ ńyee sã̀a lai, káfe ǹaa káa ni.

²⁵Ka wɔ́lɔ ŋália-woo-ŋai kélee pìli, ka ŋásɛŋ-lɛɛ-ŋai síɣe nɔ́ kpɛ́ni-kpɛni.

²⁶M̀ɛni ma, tãi mɛni kpɔ̂lu a kûla la kâai, ńyãa máŋ ŋa pâi ɣɛ́lɛ-maa kulâi kákponôi. Tãi mɛni maa pɔlɔ-pɔlɔ a kûla la kâai, ŋa pâi ɣɛ̂lɛi kâa.

²⁷Tãi màa yâo mɛni-ŋa da pâi pâi la kápɔ yɛ̂ɛ tuna kpînii, da mɛni kpânaŋ-ŋa yɛ̂ɛ fãa kɛ́tɛi, tãi ka pâi mɔ̃lɛ̂i la mɛni-sôli sui,

²⁸m̀aa tãi tí ƃé ka pâi táre maa mare-kɛɛ kɛ̂i la, kɛ́lɛ fé pâi káwoo su toôi. Ka pâi ŋ́gɔ̂rii kwaa kélee mà, kɛ́lɛ káfe pâi ŋ́gâai.

²⁹Ká táre kpɔ̀ara káfe gbɛtɛ ní kákili ŋá a gɛɛ ká yáo Ɣâla Yâwɛɛ ma.

³⁰Káfe ŋália-wooi siɣe ní, ká káŋɛi nàɣiŋ ŋáteniŋ-tɔɔ-woo-ŋai mɛi.

³¹M̀ɛni ma zɛŋ ka zii, ka pâi m̀á kulâi, ǹyaŋ kákpɔɔi kɛ́-mɛni-ŋai tí ƃé pâi kákɛ̂i ká kɔ́lɛ.

³²Diai dífa mɛni ŋá kàa a ǹɛ́lɛɛi, da pâi saâi kpɛ́ni fêi, da dípôlu tɔ̀ɔ táre ma. Diai dífa mɛni ŋá kàa a ǹɛ́lɛɛi, dítûa-perei ƃé pâi dísu karâi.

³³Kɛ́lɛ núui a ŋ̀óli tɔ̀ɔ ḿâi, lii-see a pâi kɛ̂i ǹyêei. Lii-sɛlɛŋ fé pâi kɛ̂i ma da yao.”