Read Kpelle Táre-woo-ŋa 13 Bible Online

Táre-woo-ŋa 13 - Kpelle bible

Táre-woo-ŋa 13

¹Táre-loloŋ a ǹâŋ wóo mɛ̀ni, kɛ́lɛ su-mɛni kɛ̂tɛ lòloŋ fa ŋ̀óli tɔ̀ɔ lia-woo ma.

²Tɔ̃yâ-nuu a mɛni lɛ́lɛɛ sɔlɔ ƃô ǹóno-woo su, kɛ́lɛ wôya-nuu ŋɔtíi nɔ́ ƃa ŋɔŋwana-lɔ̂ɔi.

³Ǹúui a tãi sìɣe ǹóno-woo mai, a ŋɔfúlu-laai maa kɔ̃ɔ, kɛ́lɛ ǹúui a lôno a dámaai, a gbîŋ kàra.

⁴Zɛŋ ŋ̀wɛli káa nyɛ̃ŋ-nyɛŋ-nuu mai, va zɔlɔ ƃô, kɛ́lɛ zɛŋ tíi-kpanaŋ kɛ́-nuu a ŋ̀wɛ̂lii, a zɔlɔ ƃô.

⁵Tɔ̃yâ-nuu fé lɛ́ɛ-mɛni wɛ́li ní, kɛ́lɛ ŋwana-lɔ̂ɔ-nuu tûa-pere a pâ a wôya-mɛni da ŋumɛ.

⁶Tɔ̃yâ-nuu ŋɔtɔ̃yâ-laai a mɛi kâa, kɛ́lɛ sɔnyɔ̂ŋ-nuu a gbîŋ su kâra a ŋɔŋwana-lɔ̂ɔi.

⁷Núu da-ŋa da díkpîŋ sìɣe a tɔɔ-ƃela ǹyaŋ sɛŋ da fé díyêei. Ǹúui da-ŋa díkɛ díkpîŋ siɣe a kôlo-ƃela, ǹyaŋ sɛŋ támaa é ƃò díyêei.

⁸Tɔɔ-nuu a sɛŋ kao kɔ̀lɛ a gɛɛ é gbîŋ kula ŋwana-lɔ̂ɔ-nuu yêei, kɛ́lɛ ŋwana-lɔ̂ɔ-nuu fa kôlo-nuu maa yâo a gɛɛ é sɛŋ kúla ǹyêei.

⁹Tɔ̃yâ-nuu ŋɔfúlu-laai káa yɛ̂ɛ laŋpo-leŋ nyii a lêŋ é núu maa pono, kɛ́lɛ ŋwana-lɔ̂ɔ-nuu ŋɔfúlu-laai káa yɛ̂ɛ laŋpo nyii a kɛ́ pâi líiŋ nîi.

¹⁰Yoŋka-nuu a pâ a laa-saa, kɛ́lɛ táre a pâ a ǹúui nyii a lia-woo mɛ̀nii.

¹¹Ǹúui a gbîŋ tɔ̀ɔ a maa felaai, a kôlo, kɛ́lɛ ǹúui a tɔɔ-sãa kɔ̀ri a bɛlɛ-pɛlɛɛi, zu a kɛ̂tɛ.

¹²À kɛ̀ íkili káa sɛŋ da ma, ƃà wàla zɔlɔ ƃó, ílii a tôo pôlu, kɛ́lɛ à kɛ̀ ƃà zɛŋ zɔlɔ ƃô íkili káa mai, ílii a lâa.

¹³Ƃà wàla lia-woo mɛni, ƃa pîli mɛni kpɔ̂lu su. Ƃà dɔ̂ŋ mɛi kâa, ƃa ƃâlo.

¹⁴Táre-nuu ŋɔsɛŋ-lɛɛi káa yɛ̂ɛ fúlu-laa-ya, a núu kùla saa ŋɔƃáre ŋá.

¹⁵Ǹúui a mɛni ŋá kàa a ǹɛ́lɛɛi, a ƃaa-kɛ-maa sɔlɔ ƃô, kɛ́lɛ ǹúui ve teniŋ ƃô-nii, a ǹáa kàra.

¹⁶Táre-nuu a gíli ŋá sìa m̀ɛnii ma a pâi gɛ̂i, kɛ́lɛ ƃoo-nuu fa gíli ŋá sìa a m̀ɛnii a pâi gɛ̂i kɛ́lɛ a yòŋka tèe a ŋɔƃoo tûai.

¹⁷Worɛ̂-woo ƃó-nuu nyii vé ŋɔtíi kɔ́lɔŋ a núu pìli mɛnîi, kɛ́lɛ ŋ̀orɛ̂-woo ƃó-nuui nyii ŋɔtíi kɔ́lɔŋ, a pâ a lii-see.

¹⁸Ǹúui va lia-woo siɣei, kôlo-laa da ŋumɛ a pâ bɔ́, kɛ́lɛ ǹúui a ŋ̀óli tɔ̀ɔ lia-woo mai, a ƃaa-kɛ-maa sɔlɔ ƃô.

¹⁹Ƃa zɛŋ zɔlɔ ƃô ƃa ŋ̀wɛ̂lii, a ílii laa, kɛ́lɛ ŋwana-lɔ̂ɔ-nuu fa bôlu tɔ̀ɔ ŋɔsɔnyɔ̂ŋ ma.

²⁰Ka táre-nuu kà sìa, ƃa târe. Ka wôya-nuu ka sìa, ƃa mɛni-soli kàa.

²¹Mɛni kpɔ̂lu káa sɔnyɔ̂ŋ-nuu pôlu a tãi kélee, kɛ́lɛ tɔ̃yâ-nuu a mɛni lɛ́lɛɛ sɔlɔ ƃô.

²²Tɔ̃yâ-nuu kɔ̂liŋ káa a ǹônii díwɔ̂-lônii pɔ́ɔ, kɛ́lɛ sɔnyɔ̂ŋ-nuu ŋɔtɔɔ-sãai a lî tɔ̃yâ-nuu pɔ́.

²³Kôlo-nuu ŋɔlɔii lɛ̂lɛɛi a mii-sɛŋ támaa tɛ̀ɛ bɔ́, kɛ́lɛ wôya-ƃela da gélee kùla ǹyêei.

²⁴À kɛ̀ ífe íloŋ kula-maa kɛ́ ní, gɛ̀ ní ífe ŋ̀wɛlii ni, kɛ́lɛ à kɛ̀ í ŋ̀wɛlini, gɛ̀ ní ƃa gula-maa kɛ̀.

²⁵Mii-sɛŋ támaa káa tɔ̃yâ-nuu yêei, kɛ́lɛ puru káa nɔ́ ŋwana-lɔ̂ɔ-nuu ma.