Read Kpelle Táre-woo-ŋa 18 Bible Online

Táre-woo-ŋa 18 - Kpelle bible

Táre-woo-ŋa 18

¹Ƃɛlɛ kpɛɛ-goi-nuu kpáaŋɔ̂ɔi nɔ́ gbîŋ mɛni ma, va fâa núu da kpɛ́ni ŋɔmɛni kpɛtɛɛ lɛ́lɛɛ ma.

²Ƃoo-nuu fé kpáani mɛni-ŋa-kaa mɛni ma, a ŋ̀wɛ̂lii nɔ́ é ǹɛ́ a gɛɛ dáreɛ̂i.

³Ŋwana-lɔɔ a pâ a ŋumɛ mɛni. À kɛ̀ ya ƃaa kula-maa mɛni kɛ̀, da pâi í ŋumɛ̂i.

⁴Táre-nuu wóo káa yɛ̂ɛ pari siŋɔɔ, è ƃò ŋɔ́nɔ yɛ̂ɛ ya-toŋ-ma ƃɛ́i yá fa kpɛ̂ɛ naai.

⁵Vé lɛ́lɛ ní a gɛɛ dí tɔ́ɔ wôya-nuu pôlu, kpaa máŋ dí díŋɛi naŋiŋ tɔ̃yâ-nuu ŋɔ-tɔ̃yâi mɛi.

⁶Ƃoo-nuu lóno-woo a pâ a laa-saa, gɛ́ ŋɔ́nɔ pà bɔ́ a tɔ̂ŋ-kpɛ-maa.

⁷Ƃoo-nuu lóno-woo a bìli mɛnîi. Da zòŋ ǹóno-woo ma.

⁸Laa-ƃo-kɛ-nuu wóo káa yɛ̂ɛ sɛŋ nɛ̃ɛ nyii núu a mìi a maa félaa é yéŋ goi a ǹɛ́lɛɛi.

⁹Nyɛ̃ŋ-nyɛŋ-nuu káa a núu-su-kara-nuu ǹêɣe.

¹⁰Ɣâla Yâwɛɛ wóo káa yɛ̂ɛ yeŋkêŋ kpanaŋɔɔ. Núu sã́a a lî naa a gɛɛ é ŋuŋ ma ƃô sɔlɔ ƃó.

¹¹Gáa tɔɔ-nuu kíli ŋá a gɛɛ ŋɔtɔɔ-sãai da pɔ̂ri maa kɔ̃ɔ̂i yɛ̂ɛ berei siɣãŋ kpanaŋɔɔ a taa ma kɔ̃̂ɔ lai.

¹²Su-mɛni kɛ̂tɛ a pâ a su-kara núu pɔ́, ma-yeŋ-tua kɛ́ pà a ƃaa-kɛ-maa.

¹³Mɛni mɛ́ni í lɛ́ɛ pâi zu-toôi, à wàla kɛ́ tí, da pâi íkâai a ƃoo-nuu dí íŋumɛ.

¹⁴Kɔlɔ-fela fa lii-kpele-nuu líi tòo pôlu, kɛ́lɛ gbɛ̂ɛ ƃa pɔ̂ri lii-too pôlu-nuu líi mu siɣêi?

¹⁵Táre-nuu a mɛni ŋá-kaa kɔ̀ri, gɛ́ ŋ̀óli tɔ̀ɔ táre ma.

¹⁶Sama-sɛŋ tɛɛ́ a pere láa ƃò núu mì, gɛ́ gɛ̀ núu kɛ́ pà núu kɛ́tɛ ŋɛ́i-tuɛ.

¹⁷Ǹúui a lôno a maa-ŋuŋ, ŋɔmɛnii a kɛ̂ a ǹɛ́lɛɛ ǹûai ŋɛ́i í lɛ́ɛ la zu m̀arâŋ-nuui é pɛ́lɛ m̀arê kɛ̂i.

¹⁸Kpɛɛŋ tooɔ a laa-saa kpèra, gɛ́ wála-wala-ƃela loai mɛni ŋá tèe.

¹⁹Kpɔŋ íbarâŋ-nuui ma, gɛ̀ ní a pâi ímaa kɔ̃ɔ̂i yɛ̂ɛ taa-lee nyii siɣãŋ tínaŋɔɔ̂i mai. Kɛ́lɛ à kɛ̀ ka dîa-ni ka laa-saa kɛ̀, da pâi díkpôŋ láa tɛ̂i íperei.

²⁰M̀ɛnii núu a mòi gáa a ǹíi láa mɛni, kɛ́lɛ m̀ɛnii a kûla zui, gáa a m̀aa mɛ̂ni.

²¹Saa da fúlu-laa díwala-wala-laai káa núu lágbɔ̀ ma. M̀ɛnii lágbɔ̀ a môi, ǹâmu maa mɛ̂ni ƃè.

²²Ƃà nɛnî kùla, ƃa mɛni lɛ́lɛɛ sɔlɔ ƃó, ƃa lûwa sɔlɔ ƃó Ɣâla Yâwɛɛ yêei.

²³Kôlo-nuu a lôno a fɛli-kɛ-woo, kɛ́lɛ tɔɔ-nuu a ŋ̀óo su tòo a nyɔ́mɔɔ.

²⁴Nɛ̃ɛ-laa da káa naa zu kpanaŋɔɔi é tɛ́ɛ íkaayɔɔ ŋɔi ma.