Read Kpelle Táre-woo-ŋa 2 Bible Online

Táre-woo-ŋa 2 - Kpelle bible

Táre-woo-ŋa 2

¹Ńoŋ, zɛŋ ŋa nɛ̀ yâi, gɛ́. Ífe wɔ́lɔ nìa m̀ɛni-ŋai dîa ŋá mò yâ a gɛɛ í gɛi.

²Íwoli tɔ́ɔ dáre-woo-ŋai dîa. Kɔ́ í díŋa káa.

³Ɣâla kpera fé a gɛɛ é kili-ŋa pôno tɛɛ ípɔ da mɛni-ŋa káa.

⁴Gɔ́ri a gbanaŋɔɔ yɛ̂ɛ berei nûa da káne kɔ̀ri lai, kpaa máŋ yɛ̂ɛ diai da tɔɔ-sãa sɔ̃ɔ kpanaŋɔɔ kɔ̀ri nyii gáa loo-perei.

⁵À kɛ̀ ƃà gɛ̀ tí, gɛ̀ ní ƃa pâi Ɣâla Yâwɛɛ ŋɔyao-maai ŋá kâai, í ŋɔ́nɔ táre m̀aa mɛ̂ni su.

⁶Ɣâla Yâwɛɛ ƃa táre tɛ̀ɛ. Ǹyaa ƃé sɛŋ kɔ́lɔŋɔɔ da mɛni ŋá-kaa a kûla ǹyêei.

⁷A kpɔŋ diai dîa dítûa-pere sãai, gɛ́ dɔ̃yâ-ƃelai maa kɔ̃ɔ.

⁸A diai mɛi kâa da tûa sãa kɛ̀ a nûa da kpɛ́nii, gɛ́ diai mɛi kâa da díkpîŋ tɛ̀ɛ bɔ́i.

⁹Ƃà íwoli tɔ̀ɔ ḿâ, gɛ̀ ní ƃa pâi táre kɔ́lɔnîi, teniŋ ƃô-laa, tɔ̃yâ-tua kɛ́ɛ da núu kélee mɛni siɣeɛ a bɔriɛɛ.

¹⁰Táre a pâi kɛ̂i íŋuŋ su, mɛni ŋá-kaa é lii-nɛ̃ɛ tɛɛ ípɔ.

¹¹Í mɛni kpɛtɛɛi lɛ́lɛɛi a pâi ímɛi kâai, mɛni ŋá-kaa é ímaa kɔ̃ɔ.

¹²Táre a pâi íkulâi mɛni nyɔ́mɔɔ maa pere su da ǹúu pɛlɛ-ƃelai dínuu pɛlɛ-woo-ŋai.

¹³Ǹûai ŋí dí gwaa-ponoɔi ŋɔpere-sãai lɛ̀ɛ, dí gbínii ŋɔperei síɣe sɔnyɔ̂ŋ kɛ́ mɛni ma.

¹⁴Ǹûai ŋí da lii-nɛ̃ɛ kùla mɛni nyɔ́mɔɔ kɛ́ɛ su da wôya-tua kɛ́ɛ.

¹⁵Dítûa-pere fé sã́a ní. Da tûa a wôya-pere.

¹⁶Táre a pâi íkulâi núu da kpɛ́ni ŋɔnɛnî yêei, nyii a kɔ̂ a gɛɛ é ǹyée láa yâ a la-nɛ̃ɛ-maa wooi,

¹⁷nyii a bôlu tɔ̀ɔ ŋɔsurɔ̂ŋ ma, é nia ŋɔkono-tee-wooi ma è gɛ̀ Ɣâla ŋɛ́i-tuɛi.

¹⁸À kɛ̀ ƃà lɔ̀ ŋɔpɛ́rɛi mu, gɛ̀ ní íkaa saa kɔ̂rii. À kɛ̀ ƃà lì naa, gɛ̀ ní ƃa saa táa pere siɣe.

¹⁹Diai kélee da ǹaa kaai, dífa pà pôlu. Dífe pâi wɔ́lɔ pâi pôlu fúlu-laa ŋɔperei ma.

²⁰Ya pìlaŋ táre pôlu, a pâi gɛ̂i ílɛɛ dɔ̃yâ-ƃelai díperei ma, í sía a pere sã́a.

²¹Kpɛ́ni fêi, ǹɔii a pâi kɛ̂i a ǹúu sãa-ŋai pɔ́ɔ, dɔ̃yâ-ƃelai dí sée naa.

²²Kɛ́lɛ Ɣâla a pâi ŋ̀wana-lɔ̂ɔ-ƃelai kpɛ̂i ǹɔii ma, é zɔnyɔ̂ŋ-ƃelai kúla yɛ̂ɛ kala.