Read Kpelle Táre-woo-ŋa 23 Bible Online

Táre-woo-ŋa 23 - Kpelle bible

Táre-woo-ŋa 23

¹Ka núu kɛ́tɛ ka kɛ̀ kálaa miî, gɔ́lɔŋ ǹúui gáa lai, í ƃaa kɛ́-maa tɛ́ɛ bɔ́.

²Ƃà kɛ̀ a ǹúui mii-sɛŋ wɛli káa mai, tãi siɣe berei ƃa mii-sɛŋ miî lai.

³Ífe ŋɔmii-sɛŋ lɛ́lɛɛ dámaa mìi, tãi da a pɔ̂ri kɛ̂i a ƃáre ímɛni ma.

⁴Ífe ímàŋ tɔɔ-laa mɛni ma í tíi kɛ́ a gbanaŋɔɔ é tɛ́ɛ gɛ̂i ma. Tíi kɛ́ a táre-pere í ƃɛ́i kɔ́lɔŋ ya pɔ̂ri kperâi naai.

⁵Ísɛŋ-kaoi a kûla íyêei a maa félaa yɛ̂ɛ berei kuɛ a kɔ̂ɔŋ la a maa félaa ŋ̀elei sui.

⁶Ífe ŋɛi-kpala-nuu ŋɔkpóloi mìi, ífe ŋɔmii-sɛŋ lɛ́lɛɛi da wɛli ǹyêei.

⁷A kɛ̂ kɛ̂i yâ ǹyɛɛi, “Ílaa mii í íkpele.” Kɛ́lɛ va kɛ̂ kulâi ǹíi-pere kpɛ́ni fêi, a kɛ̂ gíli ŋá siâi zɛŋ-kaoi ma è gɔ̀lɛ m̀ii-sɛŋ mɛ̂ni mai.

⁸M̀ii-sɛŋ ƃa mìi, ƃa pâi íkɔŋ pilîi la. Ŋ̀óo lɛ́lɛɛ-ŋai ƃa mòi, gáa nɔ́ kpɛ́ni-kpɛni.

⁹Ífe ítãi kàra ƃoo-nuu ma. Vé pâi gâai ŋ̀ɛ́i a mɛni da.

¹⁰Ífe ǹɔii kóyaŋ ma kɔni-ŋai kûla dítɔ̂ɔi nyii ínuu-pɔlɔ-ŋai dí bìlaŋ naai, kpaa máŋ í tee-loŋ ŋɔlɔii kúla ǹyêei.

¹¹Ɣâla Yâwɛɛ wála-walai. A pâi dímɛi-woo ƃôi é ímɛni ŋá tée.

¹²Ísɛŋ-lɛ-nuui ŋɔlia-woo-ŋai síɣe, í íwoli tɔ́ɔ dáre-woo-ŋai dîa í ŋ̀aa sèe kɛ́.

¹³Ífe kpèra ílôloŋ kula-maa kɛ́ɛ ma. Ƃà nòkwa a fáa, vé pâi baâi.

¹⁴Ƃa nòkwa a fáa, ƃa ŋɔfúlu-laai maa tée saa yêei.

¹⁵Ńoŋ, ƃà kɛ̀ a ítareɛ, ńii a pâi nɛ̃ɛ̂i.

¹⁶Ƃà tɔ̃yâ ƃò, ńii a pâi lâai.

¹⁷Ífe sɔnyɔ̂ŋ-ƃela maa líi tèe, kɛ́lɛ yao Ɣâla Yâwɛɛ ma a ɣele kélee.

¹⁸Núu fa pɔ̂ri íkili kɛ́-zui kulâi íyêei kpɛ́ni fêi, tínaa-tuɛ-pere káa ma.

¹⁹Ńoŋ, íwoli tɔɔ, í kɛ́ a ítareɛɛ, í íkili sée dɔ̃yâ-perei ma.

²⁰Ífe kɛ̀ a ǹɔɔ-kpele-ƃelai, kpaa máŋ m̀ii-sɛŋ wɛli-ƃelai díta.

²¹Lɔɔ-kpeleɛ ŋánaa da mii-sɛŋ-wɛli a pâ a kôlo-laa núu pɔ́. Seɣe a pâi sâai yâ à kɛ̀ ya kɛ̀ nɔ́ mii-sɛŋ miî íkɛ nyìi a ŋánaa.

²²Ínâŋ wóo mɛ́ni, kpɛ́ni fêi, ǹyaa ƃé í maa sɔlɔ ƃô. Ílee à pɔ̀lɔ, ífe íyee kùla mu.

²³Kɔ́ a gbanaŋɔɔ a gɛɛ í tɔ̃yâ-laa maa kɔ́ri, táre, sɛŋ maa kɔ́riɛɛ da mɛni-ŋa-kaa. Ífe tèe dîa.

²⁴Tɔ̃yâ-nuu ǹâŋ a lii-nɛ̃ɛ kùla. Lôloŋ táreɛɛ ŋɔkáa-ƃelai líi a nɛ̃ɛ.

²⁵Tɔɔ ínaŋ da ílee dí lii-nɛ̃ɛ kúla. Tɔɔ ílee líi é nɛ̃ɛ kpɛ́ni fêi, ǹyaa ƃé ímaa sɔlɔ ƃô.

²⁶Ńoŋ, íwoli tɔ́ɔ ŋ́oo ma, í ńdûa-pere maa kpɛ́ɛ í sía ŋ́gɔɔ-pɔɔi.

²⁷Wulu-wulu kɛ́-nɛni da nɛnî nyii surɔŋ káa ǹyêei kɛ́lɛ va sêe ŋɔpɛ́rɛi lai, díkaa a ƃáre.

²⁸Da kɛ̂ núu maa kpɛ̂nii yɛ̂ɛ ŋúma-nuu dí kɛ́ gɛ̀ zinâai dámaa dífa ŋɔ́nɔ kɛ̀ a dísãa dínɛnâai yêei.

²⁹Gbɛ̂ɛ ƃé mɛni kpɔ̂lu sui? Gbɛ̂ɛ ƃé mɛni-soli kâai? Gbɛ̂ɛ ƃé pà a ǹaa-saai? Gbɛ̂ɛ ƃé pà a m̀ɛni-saai? Gbɛ̂ɛ ƃé lókwa-pala káa gbonô ma ǹyaŋ vé m̀ɛni kɔ́lɔŋ? Gbɛ̂ɛ ƃé ŋãa káa ŋɛi-gao mai?

³⁰Dia ƃa ǹûai da sêe ŋwã̂ai kɔlɛ a zu kôyaa díkɛ ŋwã̂ai sumoɔɔ kpèle.

³¹Ífe nɛ̀ɛ naa lɔɔ é ítumo, berei máŋ ǹɛ̂lɛi la gɛ́ kpɔlu, gɛ́ fìlɛ kɔ̂pui su, gɛ́ tɛ̀ɛ núu kwana nɔ̃mɔlɔŋ.

³²Kɛ́lɛ nàa pôlu ma, a pâi íkɛ̂i nɔ́ yɛ̂ɛ kali nyɔ́mɔɔ a núu nyìŋ.

³³Íŋɛi a kɛ̂ kɛ̂i zĩ̂a-zĩ̂a, sãâ díkɛ tɛ̀ɛ-tɛɛ íŋɛi, ífa pɔ̂ri íkili ŋá siâi a ǹɛ́lɛɛ, kpaa máŋ í lóno a zã́a.

³⁴Ƃa pâi kɛ̂i yɛ̂ɛ núu ƃé yá-ŋa-keleŋ su nyii vãai a kɛ̂ dúmo-tumoi fɛ̂ɛ é sɛŋ da soŋ.

³⁵Gɛ̀ ní ya pâi môi yɛ̂ɛi, “Dí ǹokwa, kɛ́lɛ dífe ŋwána ní, dí ńzàa, kɛ́lɛ fé gíli kɔlɔŋ ní. Lé tãi ƃé ŋa pâi ŋ́ɛi lá ƃôi lai? Ŋa pâi ŋɔ́nɔ da kpelêi.”