Read Kpelle Táre-woo-ŋa 29 Bible Online

Táre-woo-ŋa 29 - Kpelle bible

Táre-woo-ŋa 29

¹Ǹúui va lia-woo sìɣei é lɛ́ɛ nɔ́ ŋuŋ-su-kpanaŋ kɛ̂i, zu a pâi karâi a maa félaa, kpɛtɛ̂i fé pâi kɛ̂i mà.

²Tɔ̃yâ-nuu à kâloŋ-laa sɔlɔ ƃô, ǹûai da líi-nɛ̃ɛ kùla, kɛ́lɛ ŋwana-lɔ̂ɔ-nuu à kɛ̀ a kâloŋ, ǹûai da kɛ̂ nyîɣɛi.

³Ǹúui táre wɛlinii a ǹâŋ líi làa, kɛ́lɛ ǹúui à kɛ̂ wulu-wulu-kɛ-nɛyaa pôlui, a gɔ̂liŋ su kàra.

⁴Gâloŋ nyii tɔ̃yâ-laa wɛlinii, ŋɔlɔii a sêe, kɛ́lɛ ŋɔkili-ŋa-siai à kɛ̀ nɔ́ sɛŋ-kao ma, a ŋɔlɔii wôlo.

⁵Ǹúui a laa-nɛ̃ɛ-maa-woo ƃò m̀arâŋ-nuu mai, a ƃáre tɛ̀ m̀ɛni ma.

⁶Ŋwana-lɔ̂ɔ-nuu a ƃáre tɛ̀ ǹyaa kpîŋ perei a ŋɔsɔnyɔ̂ŋ, kɛ́lɛ tɔ̃yâ-nuu a sîa a lii-nɛ̃ɛ.

⁷Tɔ̃yâ-nuu è kôlo-ƃela dítɔ̃yâi kɔ́lɔŋ, kɛ́lɛ ŋwana-lɔ̂ɔ-nuu fé kpáaŋ ní dí-mɛni ma.

⁸Ɣɛ́lɛ-maa-kulaa nuu kponôi-ƃela da taa pîli wúleŋ su, kɛ́lɛ tɔ̃yâ-ƃela da lii-ŋwana ŋá yèŋ.

⁹Táre-nuu à ǹúui va mɛni ŋá kàa a ǹɛ́lɛɛi kɔlɔ sîɣe, ǹúui tí va mɛni ŋá kàa a ǹɛ́lɛɛi à kɛ̂ nɔ́ ɣɛ̂lɛi, gɛ́ làɣi, gɛ́ woo-yɔŋ pìli, ǹyaŋ lii-see fa kɛ̂ naa.

¹⁰Núu paa-ƃela dífe núu sã́a wɛ́li ni, kɛ́lɛ tɔ̃yâ-ƃela da díyee sèe núu sã́a mu.

¹¹Ǹúui va mɛni ŋá kàa a ǹɛ́lɛɛi a goi-mɛni kélee ƃò lii-ŋwana kɛ́ɛ su, kɛ́lɛ táre-nuu a ŋɔlii ŋwânai maa sôŋ.

¹²À kɛ̀ kâloŋ a ŋ̀óli tɔ̀ɔ lɛ́ɛ ma, gɛ̀ ní ŋɔtíi kɛ́-ƃelai kélee da kɛ̂ a ŋwana-lɔɔ-ƃela.

¹³Kôlo-nuu da ŋwana-lɔ̂ɔ-nuu díkpɛtɛ-pere káa tɔnɔ, kpɛ́ni fêi, Ɣâla Yâwɛɛ ƃé dífeerɛŋɔɔ díŋɛi-gao kpɛ̀tɛ.

¹⁴À kɛ̀ kâloŋ a kôlo-nuu ŋɔmɛnii ŋá tèe a zã́a, ŋɔkâloŋ-laai a pâi kɛ̂i nɔ́ naa wɔ́lɔ-wɔlɔ da wɔ́lɔ-wɔlɔ.

¹⁵Fáa da tɔ̂ŋ-kpɛ-maa a pâ a táre, kɛ́lɛ lôloŋ nyii a gbîŋ nîa-mɛni kɛi, a ǹee ŋûmɛ.

¹⁶Ŋwana-lɔ̂ɔ-nuu a kâloŋ-laa sɔlɔ ƃô, ŋ̀ôyai su a kɛ̂tɛ, kɛ́lɛ dɔ̃yâ-ƃelai da pâi lɛɛ̂i a dífulu a gɛɛ dí ŋɔwála-wala-laai kpɛɛ-ŋa káa.

¹⁷Ƃa íloŋ kula-maa kɛ̂, a pâi lii-see tɛɛ̂i ípɔ da lii-nɛ̃ɛ.

¹⁸Lɔii nyii kélee Ɣâla ŋɔwóoi fé zui, ǹaa-ƃela da dínîa mɛni kɛ̀, kɛ́lɛ lûwa káa ǹúui ma a Ɣâla ŋɔtɔ̂ŋ mɛi kâai.

¹⁹Núu-woo ǹyaa tɔ̂nɔ fa núu-yee mu-nuu kula-maa kɛ̀, à nɛ̃ɛ ma máŋ é íwoo ŋá káa, vé pâi ziɣêi.

²⁰Ǹúui va mɛni ŋá kàa ǹɛ́lɛɛi maa mɛ̂ni lɛ̂lɛɛi é tɛ́ɛ la ǹúui ma va ǹɛ́ŋ tɔ̀ɔ ǹóno-woo perei.

²¹À kɛ̀ zɛŋ kélee íyee mu-nuui a ŋ̀wɛ̂lii ƃa dɛ̀ɛ bɔ́ a ǹoloŋ tãi, ɣele tɔ̂nɔ da a pâi íkɔ̃liŋ kélee siɣêi.

²²Lii-ŋwana-nuu a pâ a laa-saa, lii-fãa-goi-nuu kɛ́ pà a sɔŋyɔ̂ŋ támaa.

²³Su-mɛni kɛ̂tɛ a núu su kàra, kɛ́lɛ ǹúui ǹíi-maa yeŋɔɔ̂i a ƃaa-kɛ-maa sɔlɔ ƃô.

²⁴Ŋúma-nuu kɔlɛ-ma-nuu a gbîŋ fulu laai kpɔ̂ara, kpɛ́ni fêi vé pâi pɔ̂ri tɔ̃yâ ƃôi à kɛ̀ da lì la mɛni sâa ƃó-kere mu.

²⁵Núu-kpune ŋɔyao-maai káa yɛ̂ɛ ƃáre, kɛ́lɛ ǹúui ǹâai a Ɣâla Yâwɛɛi, ŋuŋ maa ƃôɔi.

²⁶Núu támaa da mɛni lɛ́lɛɛ kɔ̀ri kâloŋ ŋɛ́i, kɛ́lɛ Ɣâla Yâwɛɛ ƃa núu kélee ŋɔmɛnii ŋá tèe a zã́a.

²⁷Wôya-nuu ƃɛlɛ fé núu-sã́a koi. Núu-sã́a ǹyaŋ ƃɛlɛ fé wôya-nuu koi.