Read Kpelle Táre-woo-ŋa 31 Bible Online

Táre-woo-ŋa 31 - Kpelle bible

Táre-woo-ŋa 31

¹Gâloŋ Lɛmuɛ nyii kùla Masai ǹee wóo-ŋai ká ŋí nyii è nɛ̀ mài.

²“Óo ńoŋ, óo ŋ́goi lôŋ! Ŋákono-tee-loŋ, lé ƃé ŋá m̀ó yâi?

³Ífe íwala-walai kélee pù lɔ-pɔ̂rɔŋ kɛ́ɛ su. Nyíŋi kɛ́ɛ a kâloŋ ŋuŋ lá pìli.

⁴Óo Lɛmuɛ, vé lɛ́lɛ ni a gɛɛ kâloŋ-ŋa dí kɛ́ nɔ́ ŋwã̂ai kpaa máŋ kpele-sɛŋ kpanaŋ támaa kpèle.

⁵Dà gɛ̀ tí, da pâi niâi dɔ̂ŋ-ŋai dîa dí gôlo-ƃelai dímɛni-ŋai ŋá tée a nyɔ́mɔɔ.

⁶Kpele-sɛŋ kpanaŋ tɛɛ diai pɔ́ da saa yêe tɛ̂i, ŋwã̂ai tɛɛ diai pɔ́ mɛni kpɔ̂lu a pâ dípɔi.

⁷Tɔɔ dí díkpele dí nia díkôlo-laai ma da dímɛni sôli kaai.

⁸“Lóno diai mɛni ma dífa pɔ̂ri lônoi díkpîŋ mɛni ma, í ƃò a dímɛni lɛ́lɛɛ-ŋai maa-kɔ̃ɔ-nuu.

⁹Lóno dímɛni ma í ƃò a dítɔ̃yâ mɛni saa-ƃo-nuu. Gôlo-ƃelai dímɛni lɛ́lɛɛ-ŋai maa kɔ̃ɔ da diai pɔ̂ri maa fé dîɛi.”

¹⁰Gbɛ̂ɛ ƃa pɔ̂ri nɛnî sɔŋ lɛ́lɛɛi kâai? Ǹɛnîi tí sɔ̃ɔ kɛ̂tɛi é tɛ́ɛ kɔni sɔ̃ɔ kpanaŋɔɔ ma.

¹¹Ŋɔsurɔ̂ŋ a gíli tɔ̀ɔ ma, ǹyaŋ va kôlo.

¹²Ǹɛnîi ŋí a kɛ̂ nɔ́ mɛni lɛ́lɛɛ kɛ̂i ŋɔfúlu-laai su ŋɔsurɔ̂ŋ mɛni ma. Va mɛni nyɔ́mɔɔ kɛ̀ la.

¹³A ƃála-leɣa kɔ̀ri da yee, gɛ́ tíi kɛ̀ a ǹyée a lii-nɛ̃ɛ pere.

¹⁴Gáa yɛ̂ɛ pɔni-tɔɔ-ƃela díya-ŋa-keleŋ a pà a mii-sɛŋ nyii a kûla kwaa kôya mai.

¹⁵A mu sìɣe gbínii su gɛ́ mii-sɛŋ kpɛ̀tɛ ŋɔnûai mɛni ma, gɛ́ ǹyée mu-nɛyãai dítii-ŋai lɛ̀ dîa.

¹⁶À lɔii maa kpɛ̂ɛ é ǹyá. A kpɔmɔ-ƃa kpalaŋ kɛ̀ a zɛŋ-kaoi è zɔlɔ ƃô ŋɔpɔni-tɔɔi sui.

¹⁷Gáa a tíi kpanaŋ kɛ́-nuu.

¹⁸A gàa berei ŋɔpɔni-tɔɔ-tii a pâ la a gênii. A tíi kɛ̀ a gbanaŋɔɔ é lɛ́ɛ la zu gbínii é lí zâmai.

¹⁹A gbɔ́ɔi yee pɔ̃lɔ, gɛ́ bàla.

²⁰Ǹyée foaŋɔ̂ɔi ma gôlo-ƃelai mɛni ma gɛ́ diai sàma sɛŋ fé díyêei.

²¹Va yâo kɔ́lɛ ma ŋɔpɛ́rɛi-mu-ƃelai mɛni ma. Kpɛ́ni fêi, kɔ́lɛ-sêɣe káa ǹyêei ŋɔnûai kélee mɛni ma.

²²A gbìŋ ŋá-seɣe pàla gbîŋ mɛni ma. Ŋɔseɣei káa a seɣe kpɔ̂lu mu teɣiɛɛ nenɛ-fɛfɛ.

²³Da ŋɔsurɔ̂ŋ kɔ̂lɔŋ goyâŋ su, ƃɛ́i da ǹɔii-ƃelai túɛ-ƃelai da sêe naai.

²⁴A seɣe pâla da bɛ̂ti gɛ́ gɔ̀lɛ bɔni-tɔɔ-ƃelai dîa.

²⁵Dɔɔ̂i lɛ̂lɛɛi ƃaa-kɛ-maa kɛ́ ƃò mà, va yâo tínaa tuɛ-pere mɛni ma.

²⁶A lôno a táre-pere gɛ́ nûa lia-woo ƃò a ƃaa kɛ́-maa-pere.

²⁷A ŋɔpɛ́rɛi mu mɛni-ŋai ŋ̀aa-see kɛ̀. Vé nyɛ̃-nyɛŋ ní.

²⁸Ŋɔnîa-pɛlɛɛi da ǹáa-maa tɛ̀, ŋɔsurɔ̂ŋ kɛ́ ƃaa-kɛ-maa tɛ̀ɛ bɔ́ ǹyɛɛi,

²⁹“Nɛnî sɔŋ lɛ́lɛɛ támaa káa naa, kɛ́lɛ ítɛɛ̂i díkelee dîa.”

³⁰Nɛnî lóno-woo lɛ́lɛɛ ǹá a núu pɛ̀lɛ. Núu ŋɔlɛ́lɛ-laa kɛ́ pù, kɛ́lɛ nɛnî nyii a yâo Ɣâla Yâwɛɛ mai, nûa da ǹáa-maa tɛ̀.

³¹Ǹɛ̂lɛɛi í ƃaa-kɛ-maa tɛ́ɛ bɔ́ ŋɔtíi lɛ́lɛɛi mɛni ma. Ǹɛ̂lɛɛi ǹúui kélee dí ǹáa maa tɛ́ panaŋ ma.