Read Kpelle Táre-woo-ŋa 7 Bible Online

Táre-woo-ŋa 7 - Kpelle bible

Táre-woo-ŋa 7

¹Ńoŋ, ŋ́oo-ŋai mɛi káa. Ŋátɔ̂ŋ-ŋai dí lɛ́ɛ íkili ŋá í dímɛi káa.

²Ŋátɔ̂ŋ-ŋai mɛi káa a gɛɛ í íkɛ-ɣeniɛi kɛ́. Ŋásɛŋ-lɛɛ-ŋai mɛi káa yɛ̂ɛ berei ƃa íŋɛi-gao mɛi kâa lai.

³Ŋásɛŋ-lɛɛi lɔ́ ílii su yɛ̂ɛ yée ma gbòno, í dípɔ̃yɛ ílii su.

⁴Táre sóŋ yɛ̂ɛ ísaaƃɔlɔ-nɛnî, í mɛni-ŋa-kaa síɣe yɛ̂ɛ íkaa-yɔɔ nyii í lâai la.

⁵Táre da mɛni-ŋa-kaa da pâi ímaa kɔ̃ɔ̂i núu da kpɛ́ni ŋɔnɛnîi mɛni ma, da ŋ̀ulu-wulu kɛ́-nɛnîi nyii a lôno ípɔ a laa-nɛ̃ɛ maa-wooi.

⁶Ɣele tɔ̂nɔ da, ŋá kɛ̀ tɔɔ̂-ni ŋáwônai lá ŋ́gɛ banaŋ ma kàa.

⁷Ŋá nyáŋkpa tɔnɔ kàa m̀arâai sáma nyii táre fé kɛ́ ní ŋuŋ sui.

⁸Gɛ́ɛ tɛɛ̂i berei ma ƃɛ́i nɛnî tɔ̀nɔ ŋɔpɛ́rɛi è kɛ̀ naai, è berei sîɣe gɛ́ lì ǹɛnîi ŋɔpɛ́rɛi lá.

⁹È kɛ̀ a ɣele-wulii tãi, tãi gbíni è kɛ̀ pɛlɛ̂i lai.

¹⁰Nya ƃe da ǹɛnîi dí kòyaŋ. Nɛnîi è kɛ̀ a maa ɣiriɛɛ yɛ̂ɛ berei wulu-wulu kɛ́-nɛnî a maa ɣîri lai, gbîŋ kpɛtɛɛ, ŋɔƃárei ŋá tɛ́ɛ.

¹¹Ǹɛnîi ŋí è kɛ̀ a ŋɛi kpânaŋ nɛni, ŋumɛ fa gɛ̀, va tela sèe ŋɔpɛ́rɛi lá.

¹²Tãi da a kâa kɛ̀ tɔɔ̂-ni berei ma, kpaa máŋ ǹɔ́ɔ-kpalaŋ ŋá, gɛ́ maa kpɛ̂ŋ kɛ̀ kwaa-ŋa ma bere-tãaŋ-ŋai lá.

¹³È ǹyée làa ǹyáŋkpâi kɔŋ ma é ǹá-gbɔ see ma, gɛ́ lòno bɔ́ a ŋɛi-kpanaŋ-pere ǹyɛɛi,

¹⁴“Lii-see sâla kula mɛ̂ni è kɛ̀ ḿâ. Ŋa sâa ŋákono-tee-wooi ŋaa-see kɛ́.

¹⁵M̀ɛni ma ŋá lì íkɔ̂rii, ŋâa nâa íkaa.

¹⁶Ŋa seɣe pɛ̂lɛ ŋágbìŋ ŋá, seɣe pɔ̃yɛ lɛ́lɛɛ-ŋa nyii kula Ize-lɔii sui.

¹⁷Ŋa wúru-ya da wée-paa kúŋ nɛ̃ɛ pú ŋágbìŋ ŋá.

¹⁸Pá kú lí kú láa kú kú-kîe-ni wɛ́li kúla é lɛ́ɛ la zu ɣele é ƃɔ́.

¹⁹Kpɛ́ni fêi, ŋásurɔ̂ŋ fé ƃɛ́. A lí sia kôyaa ma.

²⁰È lì a sɛŋ-kao ƃɔrɔ. Vé pâi pâi pôlu é lɛ́ɛ la zu ŋ̀áloŋ é sée yée ma.”

²¹Ǹɛnîi è zurɔ̂ŋ líi pène a ŋɔla-nɛ̃ɛ-maa woo tamaai.

²²È lɛ̀ɛ ǹɛnîi pôlu a maa félaa dí kɛ́ lì vé m̀ɛnii kɔ́lɔŋ kɛ̀ pâi kɛ̂i la yɛ̂ɛ niŋa sîrɛ ƃé da liî la baa mɛ̂ni ma, kpaa máŋ yɛ̂ɛ pîlaŋ-sua a pìli ƃáre ŋá

²³ƃɛ́i da pâi mónîi naa a sɔ̀lai, gɛ́ɛ yɛ̂ɛ ŋɔni a pìli ƃáre ŋá, vé gɔ́lɔŋ a gɛɛ ŋuŋ lá a pâi pilîi.

²⁴M̀ɛni ma, ńoŋ, íwoli tɔ́ɔ ŋ́oo ma, í mɛnii mɛ́ni ŋa môi yâi.

²⁵Ífe nɛ̀ɛ naa ǹɛnî sii kɛ́ɛ tí é ílii pene. Ífe lɛ̀ɛ ŋɔperei ma.

²⁶Diai a dímaa mɛ̂ni zui, dí tâmaai. Diai da saa síɣe bôlui, núu fa pɔ̂ri dílônoi.

²⁷Ƃà lì ŋɔpɛ́rɛi lá, gɛ̀ ní ƃa saa-taa-perei síɣe. Saa-taa-perei gbuai ká ŋí.