Read Kpelle Táre-woo-ŋa 8 Bible Online

Táre-woo-ŋa 8 - Kpelle bible

Táre-woo-ŋa 8

¹Kákelee ka káwoli tɔ́ɔ. Táre a tóli ƃôi. Mɛni ŋá-kaa káa tɔɔ̂-ni gɛ́ kú tòli a ɣelêi-pere.

²Gáa tɔɔ̂-ni pono ŋá ǹyée-ŋai tôŋ su, bere-ŋai kɔlɛ, bere tãɣaŋ-ŋai lá.

³Gáa tɔɔ̂-ni daa-leei ŋɔsiɣãŋ lá ƃɛ́i ǹûai da tɛ̂ɛ naa díkɛ tɛ̀ daai sui. Naa ƃé gáa naa gɛ́ tóli ƃò a ɣelêi pere ǹyɛɛi,

⁴“Káa ƃé ŋa kátôlii, óo nûa, ŋ́oo káa ǹúui kélee mɛni ma.

⁵Káai káfa mɛni ŋá kàa a ǹɛ́lɛɛi, ka mɛni-ŋa-kaa maa kɔ́ri. Káai táre fé káŋuŋ sui, ka dáre wooi mɛ́ni.

⁶Ká káwoli tɔ́ɔ, ŋa pâi mɛni kpânaŋ ƃôi kâa. M̀ɛnii kélee ŋa pâi môi káai, zãâi.

⁷Tɔ̃yâ ƃé ŋa mò. Fé lɛ́ɛ-mɛni wɛ́li ní.

⁸M̀ɛnii kélee ŋa mòi, zãâi. Wôya-mɛni fé zu kpaa máŋ núu pɛlɛ mɛ̂ni.

⁹Diai da mɛni ŋá kaai, ŋ́oo kélee su ponoɔ̂i díŋɛi. Diai dítâreɛi, ǹɛ̂lɛɛi dímɛni ma.

¹⁰Ŋásɛŋ-lɛɛi síɣe káne pɔɔ ŋá, táre síɣe gôo lɛ́lɛɛ pɔɔ ŋá.

¹¹“Táre lɛ̂lɛɛi é tɛ́ɛ kɔni sɔ̃ɔ kpanaŋɔɔ-ŋa dîa. Sɛŋ lɛ́lɛɛ kélee da fé naa ya pɔ̂ri gɔɔ̂ni ma.

¹²Ńyãa ƃa Táre. Ŋa pere sã́a kɔ́lɔŋ. Ŋá ƃɛ́i kɔ́lɔŋ mɛni kɔ́lɔŋɔɔ káa naa da mɛni ŋá-kaa a ǹɛ́lɛɛi.

¹³Ǹúui a yâo Ɣâla Yâwɛɛ mai, a mɛni nyɔ́mɔɔ kpɔ̀ara. Ŋa yoŋka kpɔ̀ara, ŋɛi-tɛ, ŋwana-lɔ̂ɔ, bɛ́lɛɛ lɛ́ɛ ma.

¹⁴Lia-woo káa ńa da mɛni ŋá-teɛɛ a zã́a, mɛni ŋá-kaa bɛlɛ́ɛ wála-wala-laa ma.

¹⁵Ńzârai ƃé gâloŋ-ŋai da tíi kɛ̀ la. Ńzârai ƃé ǹúu láa túɛ-ƃelai da mɛni ŋá tèe la a zã́a.

¹⁶Ńyãa ƃa wála-wala-laa tɛ̀ɛ gâloŋ-ŋai pɔ́, da diai kélee díkaa a gɔmɛnɛi ŋuŋ-tuɛ-ƃelai.

¹⁷Diai ŋ́wɛlinii, ŋá díwɛli-ni, diai da ŋ́gɔ̂rii, da ŋ́gâa.

¹⁸Tɔɔ-sãa da ƃaa-kɛ-maa káa ńyêei a gɛɛ ŋá dɛɛ núu pɔ́, tɔ̃yâ-tua kɛ́ɛ, é pɛ́lɛ wɔ́lɔ-wɔlɔ da wɔlɔ-wɔlɔ tɔɔ-sãa ma.

¹⁹Zɛŋ ƃa zɔlɔ ƃò ńyêei ǹɛ̂lɛɛi é tɛ́ɛ gôo lɛ́lɛɛ ma, ǹɛ́lɛɛ ŋɔ́nɔ é tɛ́ɛ káne lɛ́lɛɛ ma.

²⁰Ŋa sîa tɔ̃yâ-laa ŋɔperei ma, ŋ́gɛ lɛ̀ɛ mɛni sãa kɛ́ɛ ŋɔperei ma.

²¹Ŋa tɔɔ-laa tɛ̀ɛ diai pɔ́ dí ŋ́wɛlini, ŋa dípɛrɛi láa fɛ́ɛ a tɔɔ-sãa.

²²“Ɣâla Yâwɛɛ è ŋ́gbɛ̀tɛ a maa-ŋuŋ, tãi è ŋɔtíi kɔ́ɔ pìlaŋ lai.

²³È ŋ́gbɛ̀tɛ a maa-ŋuŋ é lɛ́ɛ pâi ŋ̀éniɛi kpɛtɛ̂i. È ŋ́gbɛ̀tɛ é lɛ́ɛ pâi ǹɔii kpɛtɛ̂i.

²⁴È ŋ́gbɛ̀tɛ yúo-ŋa dí lɛ́ɛ pâi kɛ̂i naa, da ǹya-toŋ-ŋai ƃɛ́i yá a kûla naai.

²⁵È ŋ́gbɛ̀tɛ é lɛ́ɛ pâi ǹyée kpaya-kpayai da ǹyée pɛlɛ-pɛlɛi kpɛtɛ̂i.

²⁶Ɣâla è íkpɛ̀tɛ a maa-ŋuŋ é lɛ́ɛ pâi ǹɔii da ƃɛ́i ǹûai da tíi kɛ naa kpɛtɛ̂i, kpaa máŋ é lɛ́ɛ pâi ǹɔii kpɛtɛ pɔ̂rɔi maa-ŋuŋ kpɛtɛ̂i.

²⁷Tãi Ɣâla Yâwɛɛ è ŋ̀elei kpɛ̀tɛ la yúo mɛi, ŋá kɛ̀ naa.

²⁸Tãi Ɣâla Yâwɛɛ è ŋ̀ele-kɔlɔŋ kolei kɛ̀ la ŋ̀elei sui, tãi è yúo ŋɔya-toŋ-ŋai ma lá ƃò lai,

²⁹tãi è yúo ŋɔkôya lɛ̀ la a gɛɛ vé tɛ̀ɛ naai, tãi è ǹɔii ŋɔsonôŋ-su-kɔni-ŋai pìlaŋ lai, ŋá kɛ̀ naa.

³⁰Ŋá kɛ̀ gɔlɛ ma a ŋɔkpɔŋ maa-nuu ḿaa mɛ̂ni kɛ́ ńii làa a ɣele kélee. Ŋá kɛ̀ naa ŋ́gɛ lii nɛ̃ɛ kùla.

³¹Ŋá lii-nɛ̃ɛ kùla ŋ̀éniɛi mɛni ma, ńii láa núu-kpune mɛni ma.

³²“M̀ɛni ma, ńônii, ka ŋ́oo mɛni. Lûwa káa diai dîa da sîa ŋáperei mai.

³³Ka ŋásɛŋ-lɛɛi síɣe, ká táre zu, káfe tèe bôlu.

³⁴Lûwa káa diai dîa da ŋ́oo mɛni, dí kɛ́ ƃò tɔɔ̂ni ŋákpôŋ lá a ɣele kélee, dí kɛ́ ḿaa kpɛ̂ŋ ŋápɛrɛi lai.

³⁵Diai da ŋ́gɔ̂ri dí ŋ́gaai, da fúlu-laa sɔlɔ ƃô, Ɣâla Yâwɛɛ líi láa dímɛni ma.

³⁶Kɛ́lɛ diai dífe pâi ŋ́gâai, da díkpîŋ ŋwàna, diai kélee ŋ́gbɔarâi, díkɛ saa wɛ̂li.”