Read Kpelle Táre-woo-ŋa 9 Bible Online

Táre-woo-ŋa 9 - Kpelle bible

Táre-woo-ŋa 9

¹Táre è ŋɔpɛ́rɛi tɔ̀ɔ, é mù-kɔɔ làa kɛ́ lɔ́ɔlu mɛi-feerɛ.

²È taa-tulɛ pàa, é ŋwã̂ai kpɛtɛ é zee têƃelei ŋá da m̀ii-sãai kpéli-ŋai kélee.

³È ǹyée-mu-nɛyãai tɛ̂ɛ daai su dí tɔ́ɔ ǹyéei ŋá díkɛ lolo tóo dîyɛɛi,

⁴“Diai díkili fé díyêei, tɔɔ dí pá.” Diai táre fé díyêei, táre a môi dîa ǹyɛɛi,

⁵“Ka pá ká ŋámii-sɛŋ míi ká ŋwã̂ai kpéle ŋá gbɛ̀tɛi.

⁶Ka tée ƃoo-mɛni ma ká kɛ́ ɣele ma, ka sía a táre ŋɔperei.”

⁷Ǹúui a yola kûla núu kponoi, ƃa ŋɔsɔnyɔ̂ŋ lɛ̀ ma, a pâi ɣɛ́lɛ maa kulâi íkponôi. Ǹúui a ŋwana-lɔ̂ɔ-nuu ŋɔsɔnyɔ̂ŋ lɛ̂ mai, a pâi ŋwana-lɔɔ kɛ̂i la.

⁸Ífe yola kula-nûu ŋɔsɔnyɔ̂ŋ lɛ̀ mà. Ƃà gɛ̀ tí a pâi íkpɔarâi. Kɛ́lɛ ƃà táre-nuu ŋɔpɔara-maai lɛ̀ mà, a pâi íwɛ̂lii.

⁹M̀ɛnii kélee ƃa nɛ̀ táre-nuu mai, a pâi ŋɔtárei da pûi ma. M̀ɛnii kélee ƃa mò tɔ̃yâ-nuu mai, a pâi ŋɔtárei láa fɛ̂ɛi.

¹⁰Ǹúui ŋ̀wɛ̂lii é tárei, fɛ̂ɛ é yao Ɣâla Yâwɛɛ ma a maa-ŋuŋ. Ǹúui nyii Ŋ̀âla Maa Waai kɔ́lɔŋ, a mɛni ŋá kàa.

¹¹Táre a íɣele-kuu-ŋai tâma, gɛ́ íkoraŋ da pú mà.

¹²À kɛ̀ ítâreɛi, ítâreɛi íkpîŋ mɛni ma. Ƃà kɛ̀ a yola kuláa núu-kponoi nuu, ƃa mɛni-soli kàa.

¹³Ǹúui táre fé ŋuŋ sui, gáa yɛ̂ɛ nɛnî nyii a lôno a ɣelêi-pere vé mɛni da kɔ́lɔŋ, ŋumɛ fé ŋ̀ɛ́i.

¹⁴Gáa see-ni ŋɔpɛ́rɛi lá see-sɛŋ ŋá banaŋ ma kpaa máŋ ǹyée tôŋ su daai su.

¹⁵Diai da tɛ̂ɛ naa-perei, a dítôlii, diai tɛɛ̂i ǹaa-pere díkɛ lì dítii-ŋa kɛ̂i,

¹⁶nyii-ŋai dífe mɛni kɔ́lɔŋ a mò dîa ǹyɛɛi “Ka pa ká lɔ́ ƃɛ́.” Ǹúui táre fé ǹyêei, a mò mà ǹyɛɛi,

¹⁷“Ŋúma ya nɛ̃ɛ̂i, da gbóloi núu a ŋùma é mii loo-pere sui.”

¹⁸Maa ǹúui fé gɔ́lɔŋ a gɛɛ saa-ƃela díkaa naa, a gɛɛ diai da nâa lí naai díkaa saa-ƃela kɛ̂i.