Read Kpelle Ikilisiati 11 Bible Online

Ikilisiati 11 - Kpelle bible

Ikilisiati 11

¹Ka kásɛŋ-kaoi tɛ́ɛ sɛŋ-kao lâai kɛ́ kwaa ma laai kɛ̂-pere su. Ǹaa a nàmu, ka pâi zɔlɔ ƃôi da gêni.

²Ka kákɔ̃liŋ-ŋa tɛɛ lɔii da kpɛ́ni-ŋa su kpɛ́ni fêi, káfe tãi kɔ́lɔŋ kɔ́ a pâi toôi la kálɔii sui.

³À kɛ̀ tuna a dɛ̀, ǹɔii ma nɔ́ ƃé a pû naa. Ƃɛ́i kélee wúru a tôo naai, nàa nɔ́ ƃé a lɛ̂ɛ naa. A nɛ̃ɛ ma é kɛ̀ a yá-ŋua pere kpaa máŋ séɣai pere.

⁴Kpâlaŋ-ŋa tii kɛ́-nuu ŋɛ́i à kɛ̀ nɔ́ ŋ̀elei su fãai ma, vé pâi wɔ́lɔ ŋɔsí-sãai sîi. Ŋ̀ɛ́i a kɛ̀ nɔ́ ŋ̀elei su a ɣele kélee va ŋɔsí-sãai m̀á kùla.

⁵Núu da fé vãai tɛɛ-pere kɔ́lɔŋ kpaa máŋ berei núu-kpune maa mɛ̂ni a pîlaŋ la nɛnî mai. Bere sîi ŋí nɔ́ ƃé núu da fa târe la Ɣâla ŋɔtíi kɛ́-pere su nyii gáa a zɛŋ kélee kpɛtɛ-nuui.

⁶Ka kási-sãa kao-ŋai sí a ɣele-wala da vólo ma láai, kpɛ́ni fêi, káfe gɔ́lɔŋ zí-sãa kaoi nênɛ ƃé pâi kpɛtɛ̂i a ǹɛ́lɛɛ.

⁷Ɣéniɛ ŋ̀aa nɛ̃ɛ kuláa lɛ̂lɛɛi.

⁸Tãi ká káa la ɣele mai, ka kɛ́ ɣéniɛ ŋ̀aa nɛ̃ɛ kulâi. Kɛ́lɛ ka gɔ́lɔŋ a gɛɛ núu fa tûa fɛ̂ɛ m̀olôŋ. Nyíŋi kélee káa nɔ́ kpɛ́ni-kpɛni.

⁹Núu tɔɔ-ŋa, ka lii-nɛ̃ɛ kula tãi kákaa niî la kánuu-tɔɔ kɔlɔi. M̀ɛnii kélee ka wɛ̂lii ka gɛ̂i ka gɛ́. Zãâi ka wɛ̂lii ká gáai, ka gáa. Kɛ́lɛ é kɛ́ kákili ŋá a gɛɛ Ɣâla a pâi núu kélee ŋɔmɛnii ŋá têei tɛi-tɛi.

¹⁰Ka tée lii ŋwâna mɛni pôlu. Káfe ǹɛɛ naa mɛni da kɛ́ ƃò nɔ́ kálii su gɛ́ sòli kâa. Káfe pâi lɛɛ̂i a núu tɔ̂ɔ a zu kôyaa.