Read Kpelle Ikilisiati 12 Bible Online

Ikilisiati 12 - Kpelle bible

Ikilisiati 12

¹Núu-tɔɔ-ŋa, káfe ǹɛɛ naa ɣéniɛ su-sãai maa lii-nɛ̃ɛi é gɛ́ ká nia kákpɛtɛ-nuui ma. Ka gɛ́ tí, tãi ka pâi lii la kápɔlɔ yêe lai, ka pâi môi kâai, “Kúfe kúɣeniɛi ŋãa-nɛ̃ɛ kula ní.”

²Mɛni ma gili é lɛ́ɛ kákili ŋá a gɛɛ maa tãi tí vóloi, ŋ̀áloŋ da bɛ́mɛlɛŋ-kao-ŋai díleŋ su a pâi kpînii káŋɛ. Duna kpînii fé pâi wɔ́lɔ tâai ŋèlei su é pono.

³Màa tãi tí, káyee nyii ká káa ká maa kɔ̃ɔi lai, da kákɔɔ nyii-ŋai kɛ̀ a zu kpanaŋɔɔ, gélee su a sâa. Ká nyíŋ é pú káfa ŋɔ́nɔ pɔ̀ri mii-sɛŋ miî. Káŋɛi a pâi pûi káfa ŋɔ́nɔ pɔ̀ri kwaa kâai a ǹɛ́lɛɛ.

⁴Káwoli lá a pâi tɛ̂i káfa ŋɔ́nɔ pɔ̀ri sɛŋ da kélee tíŋ mɛnîi. Káfe pâi ŋɔ́nɔ pɔrîi tíi kɛ́ kɔli-sãa tíŋ mɛnîi kpaa máŋ wule wôo da kɛ́lɛ ŋ̀ɔni-ŋai wóo ƃé pâi kɛ̂i káŋɛi lá ƃôi.

⁵Ka pâi kɛ̂i yaôi a gɛɛ ká tɛ́ kwaa da ma ƃɛ́i ǹaa tɛɛ̂i ɣelêi. Ká siâi a pâi kpananîi. Káŋuŋ-leɣa a pâi poâi, káfa ŋɔ́nɔ pɔ̀ri sia-sîa kɛ̂i. Sɛŋ wɛ̂li fé ŋɔ̂nɔ pâi kɛ̂i kâa. Kwa pâi liî ƃɛ́i kwa pâi kɛ̂i naa wɔ́lɔ-wɔlɔ da wɔlɔ-wɔlɔi. Ǹyaŋ wɔ́lɔ da maloŋ tôo maa a pâi kɛ̂i bere lêe-ŋai dîa.

⁶Kákpɛtɛ núui kili é lɛ́ɛ ká ŋá tãi kákaa níi la a núu-tɔɔ, vulu-laa bare yɔlɛi é lɛ́ɛ pâi têei kpaa máŋ gôo kawului é wólo. Ǹya kɔɔ sɛŋ-foloi a pâi toôi, ǹya leɣii é wólo. Ǹya kula-ɣɛlii a pâi têei.

⁷Bɔ̂rɔi a pâi liî bɔ̂rɔi pɔ́, m̀ɔlêŋ é lí Ɣâla pɔ́ nyii dɛ̀ɛi.

⁸Ǹyãai a dáre-nuui ŋá gàa gɛɛ mɛni kélee káa nɔ́ kpɛ́ni-kpɛni, kpɛ́ni-kpɛni, kpɛ́ni-kpɛni!

⁹M̀ɛnii ŋí é lɛ́ɛ kákili ŋá. Ńyãai a zɛŋ lɛ́-nuui, dí ńzìɣe a táre-nuu. M̀ɛnii kélee ŋá maa kɔ̂rii, ŋá nɛ̀ nûa dîa. Ŋá ŋ́oli tɔ̀ɔ táre-woo támaa ma ŋá maa kpɛ́ɛ.

¹⁰Ŋá ŋ́gili ŋá sìa é pîlaŋ táre-woo-ŋa dîa nyíi nûa da mɛni da díyee sée mui. Ǹyaŋ ŋá maa woo-ŋai kélee pɔ̃yɛ.

¹¹Táre-nuu wóo káa yɛ̂ɛ ƃála mɛi káa-nuu yêei wuru nyii a ŋɔƃála-ŋai téniŋ tɔ̀ɔ la gɛ́ dímɛi kâa lai. Ŋɔtáre-woo-ŋai su-kpanaŋɔɔi yɛ̂ɛ kɔli nêre. Dáre-woo-ŋai ŋí è kùla Ɣâla yêei nyii gáa a kúkelee kú mɛi káa nuui.

¹²Ńoŋ, mɛni da kpɛ́ni káa naa nyii m̀aa nɛ̃ɛ̂i núu é mɛ̀i káa lai. Kɔlɔ támaa pɔ̃yɛɛ kóyɛŋ fé ma. Táre támaa maa kɔ́riɛɛ a gbɛ̃lɛ kpɛ̀ɛ núu kponôi.

¹³Ŋ̀óoi gbɛɛ ŋái ká ŋí. Ka ƃaa kɛ́-maa tɛ́ɛ Ɣâla pɔ́ ká ŋɔtɔŋ-ŋai kélee mɛi káa. Ŋ̀óoi ŋí káa núu-kpune kélee mɛni ma.

¹⁴Ɣâla a pâi núu kélee ŋɔmɛnii ŋá teêi nyii-ŋai noɔ̂ɔi da nyii-ŋai díkaa fíyeŋ ŋai, ǹɛ́lɛɛ kpaa máŋ ǹyɔ́mɔɔ.