Read Kpelle Ikilisiati 3 Bible Online

Ikilisiati 3 - Kpelle bible

Ikilisiati 3

¹Mɛni kélee kɛ́ tãi káa ma ŋ̀éniɛi ŋí su.

²Núu maa sɔlɔ ƃó tãi káa ma, zàa tãi kɛ́ ƃò ma. Sí-sɛŋ sí tãi káa ma, m̀á kula tãi kɛ́ ƃò ma.

³Núu paa tãi káa ma, núu ƃálo tãi kɛ́ ƃò ma. Sɛŋ kara tãi káa ma, sɛŋ kpɛtɛ tãi kɛ́ ƃò ma.

⁴Núu wɔ́lɔ tãi káa ma, núu ɣɛ́lɛ tãi kɛ́ ƃò ma. Maloŋ-too-maa tãi káa ma, núu mãla tãi kɛ́ ƃò ma.

⁵Núu da bɔ̂ŋ dílɔ-pɔ̂rɔŋ kɛ́ tãi káa ma, tãi da kɛ́ ƃò naa dífa gɛ̀ tí. Yee-see mu tãi káa ma, ƃɛlɛ kpɛɛ goi tãi kɛ́ ƃò ma.

⁶Sɛŋ kɔ́ri tãi káa ma, sɛŋ láŋ tãi kɛ́ ƃò ma. Sɛŋ laai-kɛ tãi káa ma, seŋ pili tãi kɛ́ ƃò ma.

⁷Sɛŋ fála tãi káa ma, sɛŋ sɔlɔ tãi kɛ́ ƃò ma. Núu mɛi saa tãi káa ma, núu lóno tãi kɛ́ ƃò ma.

⁸Wɛli-kɛ-maa kɛ́ tãi káa ma, núu kpɔara tãi kɛ́ ƃò ma. Kɔ́kɔ́ tãi káa ma, li-see tãi kɛ́ ƃò ma.

⁹Lé ƃé núu a pɔ̂ri zɔlɔ ƃôi ŋɔmɔ̃lɛ-laai sui?

¹⁰Ŋa gbîrii wiɛɛi kàa Ɣâla a ǹáa núu-kpune ŋûa a gɛɛ fii tɔ̂ɔ fé kɛ̀ ma.

¹¹A m̀ɛni-ŋai kélee kɛ̀ a ǹɛ́lɛɛ díkɛ tãi ma. A tínaa tuɛ-pere mɛni kɔ́lɔŋɔɔ maa târe lɛ́ kûa. Kɛ́lɛ núu-kpune fa pɔ̂ri kili-ŋa pôno lɛ́lɛɛ tɛ̀ɛ é pîlaŋ m̀ɛnii ma ǹyaa Ɣâla a gɛ̂i é kúla gɔ́ɔ pîlanii é tóo sâa ma.

¹²Ŋá ŋ̀áa kaa ma a gɛɛ m̀ɛnii nɔ́ ǹɛ̂lɛɛi kúai a núu-kpune kú mɛni ma ŋ̀éniɛi ŋí sui, ǹyaa ƃa kú lii-nɛ̃ɛ kula kú mɛni lɛ́lɛɛ kɛ́ nûa dîɛ tãi kú káa niî la ɣele mai.

¹³Ǹɛ̂lɛɛi núu é ǹîa kɛ́ zãâi su a zɔlɔ ƃô ŋɔmɔ̃lɛ laai su ŋ̀éniɛi ŋí sui. Ǹɛ̂lɛɛ é ǹáa míi, é kpele-sɛŋ kpele, kpɛ́ni fêi zãâi ŋí kélee káa a sama-sãa nyíi da kûla Ɣâla yêei.

¹⁴Ŋá gɔ́lɔŋ a gɛɛ Ɣâla kɛ́ mɛni da maa va wɔ́lɔ faleŋ. Núu da fa pɔ̂ri da pûi ma kpaa máŋ é da kula ma. È gɛ̀ tí a gɛɛ maa mɛ̂ni kíli é lɛ́ɛ núu-kpune kíli ŋá.

¹⁵M̀ɛnii kélee kɛ̂i, a kɛ́ a bɔlɔ, ǹyaŋ nyii pâi kɛ̂i a wɔ́lɔ kɛ́. Ɣâla ƃé gɛ̀ é kɛ́, a gɛ̂i gɛ́ kɛ̀, ǹyaŋ a pâi gɛ̂i dí kɛ́ kɛ̀ wɔ́lɔ-wɔlɔ da wɔ́lɔ-wɔlɔ.

¹⁶Ŋá ŋɔ́nɔ mɛni da kpɛ́ni-ŋa kàa kɛ̂i ŋ̀éniɛi su. Ŋá gàa a gɛɛ ƃɛ́i maa nɛ̃ɛ̂i tɔ̃yâ mɛni kɛ́ɛ é kɛ́ naai, naa ƃé wôya mɛni kɛ́ɛ káa naa.

¹⁷Nya ƃe ŋá mò ńyɛ̂ɛi, “Ɣâla a pâi dɔ̃yâ-ƃelai da zɔnyɔ̂ŋ-ƃelai dímɛnii ŋá teêi a bɔriɛɛ, kpɛ́ni fêi, mɛni kélee kɛ́ tãi káa ma, mɛni kélee kpɛtɛ tãi kɛ́ ƃò ma.”

¹⁸Ŋá ŋɔ́nɔ ŋ́ili ŋá sìa berei ma Ɣâla a kú su-kɔɔnii la a gɛɛ é nɛ́ kûa a gɛɛ kú káa nɔ́ yɛ̂ɛ fɛnɛ-sãa.

¹⁹M̀ɛni feerɛi ŋí da kɛ̂ a núu-kpune da fɛnɛ-sãa. Núu-kpune a lɛ̂wo gɛ́ saa, fɛnɛ-sãa díkɛ lɛ̀wo díkɛ sàa. Núu-kpune maa mɛ̂ni fé kpanaŋ ní é tɛ́ɛ fɛnɛ-sãa dîa. Kɛ-ɣeniɛ káa nɔ́ kpɛ́ni-kpɛni.

²⁰Núu-kpune da fɛnɛ-sãa díkaa tɔnɔɔ. Dí kùla kwaa tɔ̂nɔ ma ǹyaŋ da pâi liî kwaa tɔ̂nɔ ma nya ƃa bɔ̂rɔi pɔ.

²¹Gbɛ̂ɛ ƃe gɔ́lɔŋ à kɛ̀ núu-kpune ŋɔmɔ̂leŋ a tɛ̂ ŋ̀elei su fɛnɛ-sãa díwɔ̂i é yéŋ ǹɔii mu pere?

²²Ŋá gàa a gɛɛ mɛni lɛ́lɛɛ da fé naa núu-kpune mɛni ma. M̀ɛnii nɔ́ a pɔ̂ri gɛ̂i ǹya ƃa é kɔ́ é zɛŋ zɔlɔ ƃó a tíi kɛ̂i m̀ɛni mai é ŋaa nɛ̃ɛ kula. Gbɛ̂ɛ ƃé m̀ɛnii kɔ́lɔŋ pâi kɛ̂i la ŋ̀éniɛi kpɛɛ́ pôlu mai?