Read Kpelle Ikilisiati 4 Bible Online

Ikilisiati 4 - Kpelle bible

Ikilisiati 4

¹Ŋá ŋ́gili ŋá sìa ŋá gáa a gɛɛ wôya mɛni támaa káa ŋ̀éniɛi ŋí su. Ŋá ǹúui da-ŋa kàa wɔ̂lɔi núu fé naa é díŋaa nɛnɛ. Núu da fé naa é kpɔ́ŋ dîa kpɛ́ni fêi, ǹûai dí lúanii, díwala-walai a ŋánaa.

²Nya ƃe ŋá mò ńyɛ̃ɛ lii-nɛ̃ɛ támaa káa diai dîa da sàai é tɛ́ɛ diai dîa ɣele mai.

³Ǹúui nɔ́ ŋɔlii-nɛ̃ɛi tɛɛ̂i zaa-ƃelai da vúlu-ƃelai dîai ƃa nyii dífe nîi maa sɔlɔ ƃó nii. Kpɛ́ni fêi, vé nîi zɔnyɔ̂ŋ mɛni-ŋai ŋí da kɛ̂i káa ní.

⁴Ŋá gàa a gɛɛ núu-kpune ŋɔmɔ̃lɛ-laai da sɛŋ kélee a zɔlɔ ƃô zui, a kûla tólo su. Nyíŋi máŋ káa nɔ́ kpɛ́ni-kpɛni. Gâa nɔ́ yɛ̂ɛ núu a kɛ̀ vãai kpɛ̂i.

⁵M̀oo-nuui a sêe a ǹyée kpíniŋ a ǹyaa burui kɛ́ bàa.

⁶Ǹɛ̂lɛɛi sɛŋ-loŋ kɛ́ ƃò íyêei lii-see kɛ́ ƃò yâ é tɛ́ɛ la sɛŋ támaa kɛ́ ƃò íyêei íkɛ ƃò lii-sɛlɛŋ su. Nyíŋi káa nɔ́ yɛ̂ɛ núu a kɛ̀ vãai kpɛ̂i.

⁷Ŋá ŋɔ́nɔ mɛni da kàa ŋ̀éniɛi ŋí su nyii gáa nɔ́ kpɛ́ni-kpɛnii.

⁸Nalôŋ tɔnɔ è kɛ̀ naa ǹóŋ fé ma, ǹêɣe-surɔŋ kpaa máŋ ǹîa-surɔŋ. È lɛ̀ɛ kôloi a ŋánaa é tɔ́ɔ. Kɛ́lɛ lii lâa fé kɛ́ ní ǹyêei ŋɔtɔɔ-laai su. Vé gbîŋ marê kɛ́ ní ǹyɛɛi, “Gbɛ̂ɛ ƃé ŋa mɔ̃lɛi ŋí mɛni mai? Fé ŋ́gɔ̃liŋ ŋ̀á-nɛ̃ɛ kulâi lé mɛni ma?” Nyíŋi máŋ káa kpɛ́ni-kpɛni. Gélee káa nɔ́ a lii-too pôlu mɛni.

⁹Núu feerɛ kɛ́ɛ kwaa ma lɛ̂lɛɛi é tɛ́ɛ la núu tɔ̂nɔ ma, kpɛ́ni fêi, da dímɔ̃lɛ-laai ŋ̀aa-nɛ̃ɛ kula gîe ma a ǹɛ́lɛɛ.

¹⁰À kɛ̀ ǹúui dɔnɔ a tòo, m̀arâŋ a kpɔŋ mà é mu siɣe. Kɛ́lɛ gáa mɛni kpânaŋ ǹúui ma nyii gáa ǹyaa tɔ̂nɔ kwaa mai. À tòo núu da fé naa é kpɔ́ŋ mà é mù siɣe.

¹¹Ǹyaŋ à kɛ̀ núu feerɛ da làa kwaa tɔ̂nɔ ma, da díkîe-ni kponoi fãa. Kɛ́lɛ núu tɔ̂nɔ a làa ǹyaa tɔ̂nɔ, gbonôi a pɔ̂ri fãa-pere kɛ̂i léŋ?

¹²Ya pɔ̂ri núu tɔ̂nɔ yée mɛi ɣâlei a maa félaa, kɛ́lɛ núu feerɛ yée mɛi ɣâlei kpanaŋɔɔi. Ɣɛli saaƃa kpíniŋɔɔ a gîe su têei kpanaŋɔ̂ɔi.

¹³Kâloŋ kɛ́ɛ a gôloɔɔ, dáreɛɛ, lɛ̂lɛɛi é tɛ́ɛ la kâloŋ kɛ́ɛ a dɔɔ́, m̀oɔ́ɔ, va ŋ̀óli tɔ̀ɔ lia-woo ma.

¹⁴Táre nûu a pɔ̂ri kulâi kpini-pɛrɛ mu é kâloŋ-laa kɛ́ kpaa máŋ dí núu maa sɔlɔ ƃó gôloɔɔ dí gɛ́ a kâloŋ dílɔii mɛi.

¹⁵Ŋá wɔ́lɔ nûa kàa ŋ̀éniɛi su díkelee dí kɛ́ ƃò yáŋkpa tɔnɔ pôlu nyii kɛ̀ a kâloŋ. È kɛ̀ a kâloŋ tãi gâloŋ è sàa lai.

¹⁶A nɛ̃ɛ ma kpîŋ núu támaa kɛ́ ƃò kâloŋ da yée mu da dîa-ni dí kɛ̀ tíi kɛ́, maa kâloŋ tí a kùla naa, núu da fé pâi wɔ́lɔ mɛni lɛ́lɛɛ ƃôi é pîlaŋ ma. Nyíŋi kpîŋ káa nɔ́ kpɛ́ni-kpɛni. Gáa nɔ́ yɛ̂ɛ núu a kɛ̀ vãai kpɛ̂i.