Read Kpelle Ikilisiati 6 Bible Online

Ikilisiati 6 - Kpelle bible

Ikilisiati 6

¹Ŋa ŋɔ́nɔ mɛni nyɔ́mɔɔ tɔnɔ káa ŋ̀éniɛi su nyii gáa a kpîri wuyɛ́ɛ núu-kpune mai.

²Ɣâla a tɔɔ-laa tɛ̀ɛ núu da pɔ́, mu-wuɛ-laa da maa núui nîa-sɛŋ kélee. Kɛ́lɛ va ǹɛɛ naa maa ǹúui é zãâi ŋí ŋ̀aa-nɛ̃ɛ kula fɛ̂ɛ ŋɔ̃ya-ŋa. Nyíŋi káa nɔ́ kpɛ́ni-kpɛni, gɛ́ ƃò a lii-too pôlu ŋánaa.

³Núu a pɔ̂ri kɛ̂i ɣele ma a kóraŋ támaa é nîa-pɛlɛɛ ŋuŋ tɔ̂nɔ maa sɔlɔ ƃó. Kɛ́lɛ a nɛ̃ɛ ma ǹúui tí é namu ɣele ma, à wàla gɔ̃liŋ ŋ̀aa nɛ̃ɛ kula a sàa dí ǹoo a ǹɛ́lɛɛ, ŋa m̀ôi a gɛɛ ǹôloŋ dí màa sɔlɔ ƃôi vé tɛ́ ní taâi, m̀aa nɛ̃ɛ̂i é tɛ́ɛ ǹúui kpîŋ ma.

⁴È pà kpînii é lí pôlu kpînii. Núu da fé ǹáa kɔ́lɔŋ.

⁵Berei máŋ vé vóloi káa ní la kpaa máŋ é kili-ŋa-pono sɔlɔ ƃó é pîlaŋ mɛni da kélee mai, gáa lii-see su é tɛ́ɛ dɔɔ nûui ma,

⁶nyii gɔ̂liŋ è kɛ̀ a zu kɛ́tɛ kɛ́lɛ vé ŋ̀aa nɛ̃ɛ kula ní berei máŋ è kɛ̀ la ɣele ma a kóraŋ támaai. A nɛ̃ɛ ma é kɛ́ tí, díkelee da liî kwaa tɔnɔ ma.

⁷Núu-kpune ŋɔmɔ̃lɛ-laai kélee káa nɔ́ goi mɛ̂ni ma. Kɛ́lɛ ǹíii fa lâa.

⁸Táre-nuu tɔɔ̂i fé kɛ́tɛ ní é tɛ́ɛ ƃoo-nuu ma. Lé ƃé gôlo-nuui a zɔlɔ ƃô ŋ̀éniɛi su mɛni-ŋai kélee kɔ́lɔŋɔɔ sui?

⁹Maa nɛ̃ɛ̂i ílii é kɛ́ a ǹáa zãâi mɛni ma íyêei é tɛ́ɛ la zãâi ma íŋɛi a gàai. Nyíŋi kélee káa nɔ́ kpɛ́ni-kpɛni. Gáa nɔ́ yɛ̂ɛ núu à kɛ̀ vãai kpɛ̂i.

¹⁰M̀ɛnii kélee a kɛ̂i, gáa a mɛni kpɛtɛɛ a bɔlɔ. Núu da fa pɔ̂ri kɔ̂i ǹúui pɔ́ ǹyée tɛɛ̂i mai.

¹¹Núu à kɛ̀ lônoi a dámaa a kɛ̂ ƃoo wôo-ŋa ƃôi. Lé ƃé núu a pɔ̂ri gulâi lóno támaa sui?

¹²Gbɛ̂ɛ ƃa pɔ̂ri núu-kpune nîa-sãa kɔ́lɔnîi ŋ̀éniɛi ŋí su nyii a tɛ̂ɛ nɔ́ mãla yɛ̂ɛ ninîŋ? Gbɛ̂ɛ ƃé m̀ɛni-ŋai kɔ́lɔŋ pâi kɛ̂i ŋ̀éniɛi su zaá pôlu mai?