Read Kpelle Ikilisiati 7 Bible Online

Ikilisiati 7 - Kpelle bible

Ikilisiati 7

¹Láa lɛ́lɛɛ lɛ̂lɛɛi é tɛ́ɛ wúru-ya kúŋ nɛ̃ɛ ma. Núu saa ɣêle lɛ́lɛɛ é tɛ́ɛ maa sɔlɔ ƃó ɣele ma.

²Ǹɛ̂lɛɛi núu é lí ƃɛ́i nûa da maloŋ-see ƃôi naai é tɛ́ɛ núu liɛ́ɛ ma ƃɛ́i da kúu kɛ́tɛ kɛ̂i naai, kpɛ́ni fêi núu kélee é kɛ́ a gɔ́lɔŋɔɔ a gɛɛ a pâi saâi.

³Lii-too pôlu lɛ̂lɛɛi é tɛ́ɛ ɣɛ́lɛ ma. A núu ŋɛ́i malôŋ kɛ́lɛ a gíli ŋá pòno.

⁴Táre-nuu kélee a gíli-ŋa sìa é pîlaŋ saa ma. Kɛ́lɛ m̀oo-ƃelai nîa mɛni nɔ́ ƃa lii-nɛ̃ɛ mɛni.

⁵Ǹɛ̂lɛɛi táre-nuu é lóno yâ é tɛ́ɛ la ƃoo-nuu kɛ́ɛ ƃaa kɛ́-maa wule toôi yâ.

⁶Ƃoo-nuu ɣɛ́lɛ-woo káa nɔ́ yɛ̂ɛ ɣalêŋ ƃé pôrɛi ŋɔŋ ŋá. Ǹyaŋ nyíŋi máŋ káa nɔ́ kpɛ́ni-kpɛni.

⁷Táre-nuu à ǹyée sèe yee-pɛlɛ ǹá-sɛŋ mu, a gɛ̀ a ƃoo-nuu. Yee-pɛlɛ ǹá-sɛŋ a núu su kàra.

⁸Mɛni kpɛɛ-ŋa lɛ̂lɛɛi é tɛ́ɛ gɔ́ɔ pîlanii ma. Lii-kpele lɛ́lɛɛ é tɛ́ɛ su-mɛni kɛ̂tɛ ma.

⁹Ífe kɛ̀ a ǹúui a ǹíi ŋ̀wana a maa félaai. Lii-ŋwana káa a ƃoo mɛni.

¹⁰Ífe wɔ́lɔ mò yɛ̂ɛi, “Lé ƃé kɛ̀ wɔ́lɔ-wɔlɔi tí è kɛ̀ a ǹɛ́lɛɛ é tɛ́ɛ sâa mai?” Táre fé m̀are kɛ̂ɛ sii ŋí su. Ífe wɔ́lɔ gɛ̀.

¹¹Táre káa a sɛŋ lɛ́lɛɛ. Diai da zɔlɔ ƃôi gáa díyêei yɛ̂ɛ pɔɔ-sɛŋ.

¹²Táre a núu maa kɔ̃ɔ nɔ́ yɛ̂ɛ berei sɛŋ-kao a núu maa kɔ̃ɔ lai. Mɛni kɔ́lɔŋɔɔ ŋ̀ɔi ƃa é ǹɛ́ núu ma a gɛɛ táre a pɔ̂ri m̀ɛi kâai.

¹³Zãâi káa Ɣâla a díkpɛ̀tɛi. Nyii-ŋai è díkpɛ̀tɛ é dísu kpĩlaŋ, gbɛ̂ɛ ƃa pɔ̂ri dísu sãai?

¹⁴Ŋ̀éniɛi a ŋ̀ɛi lɛ́lɛɛ tìnaŋ ípɔ naa pere, lii-nɛ̃ɛ kula. A tela ŋ̀ɛ́i pôlu fè yɛ̂, yéei sée mu kpɛ́ni fêi, Ɣâla ƃé mɛni feerɛi ŋí kpɛ̀tɛ. Mɛni ma, núu da fé m̀ɛnii kɔ́lɔŋ pâi kɛ̂i tínaai.

¹⁵Ŋá kɛ́-ŋeniɛ kɛ̀ a ŋa-ƃalaŋ maa pere. Kɛ́lɛ ŋá m̀ɛni feerɛi ŋí maa kpɛ̂ɛ kɛ̀-ŋ̀éniɛi ŋí su. Mɛni lɛ́lɛɛ kɛ́-nuui a sâa a sumoɔɔ, zɔnyɔ̂ŋ nuui kɛ́ lɛmu ɣele ma.

¹⁶Ífe kɛ̀ a ísɔŋ lɛ́lɛɛ a ŋánaa. Ífe tela kɛ̀ a ítareɛɛ a ŋánaa. Ya gɛ̀ tí, gɛ̀ ní ya pɔ̂ri íkpîŋ su karâi.

¹⁷Ífe kɛ a ísɔŋ nyɔ́mɔɔ a ŋánaa. Ífe tela kɛ̀ a íƃoɔɔ a ŋ̀ánaa. Ya gɛ̀ tí, gɛ̀ ní ya pâi saâi ítãi é lɛ́ɛ pâi serîi.

¹⁸Ífe kɛ́ a m̀ɛni feerɛi ŋí da kɛ́ nuu. Yao Ɣâla ma. Ya gɛ́ tí, Ɣâla a pâi íkɛ-mɛni kélee ƃûu ƃôi ŋ̀éniɛi ŋí su.

¹⁹Táre a gɛ̀ núu tɔ̂nɔ ŋɔwála-walai é tɛ́ɛ taa-lee puu láa túɛ kaloŋ-ŋa dîa.

²⁰Núu da fé ɣéniɛ nyii deniŋ ƃôɔi nyii va pɔara mâa kɛ̀.

²¹Ífe íwoli tɔ̀ɔ m̀ɛnii kélee ma nûa da mòi. Tãi da íyee mu-nuui a pâi ílarânii.

²²Kɛ́lɛ gɔ́lɔŋ a gɛɛ tãi da yá máŋ ya wɔ́lɔ núu da larâŋ tãi támaa tɛɛ pôlu ma.

²³Ŋá m̀ɛni-ŋai su kɔ̀ɔŋ a ŋátarei ŋá mó ńyɛ̃ɛi, “Ŋa wɛ̂lii ŋá kɛ́ a táre-nuu.” Kɛ́lɛ fé wɔ́lɔ táre ní ŋ̀éniɛi su mɛni-ŋai su.

²⁴Núu da fa pɔ̂ri târei ɣéniɛ mɛni kélee su. Ɣéniɛ mɛni su siŋɔ̂ɔi, ŋ̀á kâai kpanaŋɔɔ.

²⁵Ŋá m̀ɛnii kélee maa kpɛɛ a gɛɛ ŋá táre sɔlɔ ƃó zu. Ŋá ŋ̀á kàa ma a gɛɛ ŋwana-lɔ̂ɔ da ƃoo tûa díkaa nɔ́ kpɛ́ni-kpɛni.

²⁶Ŋá mɛni tɔ̂nɔ kàa ŋ̀wânaai é tɛ́ɛ saa ma. Nya ƃa surɔ̂ŋ wɛli-nɛni. Surɔ̂ŋ wɛli-nɛnii ŋɔwɛli kɛ́-maai káa yɛ̂ɛ ƃáre. Núu a tòo ŋ̀á a kpîniŋ la yɛ̂ɛ deɣaŋ. Kɛ́lɛ diai da Ɣâla wóo mɛnii, dífe pâi kɔ́i a ŋɔƃárei. Zɔnyɔ̂ŋ-ƃelai nɔ́ ƃé pâi kɔ̂i la.

²⁷Ńyãai a zɛŋ lɛ́-nuui ŋá môi a gɛɛ ŋaâ ŋɔ́nɔ mɛni da maa kɔ́ri a too nyii-ŋai dîa ŋá gɔ́lɔŋ a bɔlɔi.

²⁸Ŋá kɛ̀ gɔ̂rii kɛ́lɛ fé niî kɛ̀ gáa ní. Sinâa wála tɔnɔ sáma ŋá tɔ̃yâ-nuu kàa naa, kɛ́lɛ fé pɔri ní tɔ̃yâ-nuu tɔnɔ kpîŋ kâai nɛyâa wála tɔnɔ sáma.

²⁹M̀ɛnii ŋí ŋâa gɔ́lɔŋ kpɔ́ a gbîŋ. Ɣâla è núu-kpune kpɛ̀tɛ a naa fii-kpɛɛ, kɛ́lɛ núu-kpune a gbîŋ kɛ́-pere kpânaŋ.